بلوگنىڭ تەكلىپلىك ئاپتۇرى مۇقەددەس مىجىت شىنجاڭ سەنئەت ئىنىستوتىنىڭ ئۇسۇل سىنىپىغا 11 يېشىدا قۇبۇل قىلىنىپ بۇ يەردە ئۇسۇل ۋە پىئانىنو ئورۇنلاش بويىچە سىستىمىلىق تەربىيەلەنگەن. 2003-يىلى فىرانسىيەگە ئوقۇشقا بېرىپ پارىژ  10- ئۇنۋېرسىتى (Université Paris Ouest-Nanterre) دا مىللەتلەر مۇزىكىشۇناسلىغى (ethnomusicology) يۈنۈلۈشى بويىچە ئاسپىرانتلىقتا ئوقۇشقا كىرگەن بولۇپ ھازىر شۇ يۈنۈلۇش بويىچە دوكتورلۇق ئۈچۈن تەتقىقاتىنى داۋاملاشتۇرۇۋاتىدۇ. ئو ئوقۇشتىن سىرت ئۇيغۇر مۇزىكا ۋە مەدىنىيتىنى چەتئەللەرگە تۇنۇشتۇرۇشتا كۆۋرۈكلۇك رول ئويناۋاتقان بولۇپ 2005-يىلى دولان مۇقامچىلىرىنىڭ  پارىژدا ئويۇن قويۇشى ئۈچۈن زور كۈچ چىقارغان ۋە بۇ  توغرىلىق يازغان خاتىرىسى « بىر ئۇيغۇر قىزىنىڭ پارىژدا كۆرگەن بىلگەنلىرى» نامىدا تەڭرىتاغ ژورنىلىدا ئىلان قىلىنغان. ئۇندىن  باشقا يەنە يىقىنقى يىللاردا ئۇيغۇر سەنئەتكارلارنىڭ فرانسىيە، ئىسپانىيە، گىرمانىيە، ئەزەربەيجان قاتارلىق جايلاردا ئويۇن قويۇشىنى ئويۇشتۇرغان ياكى ياردەم بەرگەن. ھازىر ئوقۇشتىن سىرت ئۇيغۇر مۇزىكىلىرى توغرىلىق ھۆججەتلىك فىلىم ئىشلەش، ئۇيغۇر بالىلار ناخشىلىرىنى رەتلەش قاتارلىقلارنى قىلىۋاتىدۇ.

Jeck بلوگىنىڭ تەكلىپلىك ئاپتورى مۇقەددەس مىجىت ياۋرۇپادىن خەۋەر قىلىدۇ: 2010-يىلى 8-ئاينىڭ 21- كۇنى، گېرمانىيەنىڭ Osnabrück  شەھىرى Lagerhalle مەدەنىيەت مەركىزىنىڭ كونسېرت  زالىنىڭ ئالدى ئۇيغۇر دىيارىدىن كەلگەن روك (rock) ئۇسلۇبىدىكى مۇزىكا ئەترىتى قېتىق (Qetiq) كە قىززىقۇچىلار بىلەن  تولغانىدى. ئۆمرىگە كىلىپ ئۇيغۇرلار توغرىلىق ئاڭلاپ باقمىغان، بۇ ئىنسانلارنىڭ قايەردە تۇرۇپ قەيەردە ياشايدىغانلىغىنىمۇ  ئاڭلاپ باقمىغان شەھەر ئاھالىلىرى، بىرنەچچە كۇن ئىلگىرى مورگەنلاند مۇزىكا بايرىمى (Morgenland muzika festival) نىڭ ئېچىلىش مۇراسىمىدە ئايشىگۇل مۇھەممەتنىڭ سېھىرلىك ئاۋازىدىن مەس بولۇشقانلىقلىرىنى، كامىل ئابدۇشۇكۈرنىڭ رەڭدار رەسىم كورگەزمىسىنى، مۇقەددەس مىجىتنىڭ قېتىق نامىدىكى روك ئەترىتى توغۇرلۇق ئىشلىگەن ھۇججەتلىك فىلىمىنى ئەسلىشىپ، بۇ مۇزىكا كىچىلىكىنى قىززىقىش ئىچىدە كۈتىۋاتاتتى. پەرھات خالىق باشچىلىقىدىكى ياش مۇزىكانتلار گىتتارلىرىنى كوتۇرۇپ سەھنىگە كىرىپ كەلگەندە، زالدىكى تاماشىبىنلار ئۇزۇندىن كۇتىۋاتقان خەلقارالىق داڭلىق سەنەتكارلارنى كۆرگەندەك چوقان سىلىشتى.

قېتىق ئەترىتىنىڭ بىرىنجى ناخشىسى لىرىكىلىق ھەم غەمكىن باشلىنىپ، ۋىزا ئېلىش مۇمكىن بولماي بۇ بايرامغا كىلەلمىگەن پەزىلەت تۇرسۇن ھەم مەھمۇت مەمەتكە بىغىشلاندى. تاماشىبىنلار بۇ كونسېرىتنىڭ قانچىلىك بەدەل، ھەم جاپادا ۋۇجۇتقا چىققانلىقىدىن تەسىرلىنىپ مۇڭغا چۇشتى. 19 ياشلىق قازاق مۇزىكانت ئىرشات دىلشاتنىڭ قوش تونلۇق (humai) ناخشىسى كىشىلەرنى پايانسىز يايلاقلارغا باشلاپ كىردى.  بۇنىڭغا ئۇلاپلا، پەرھاتنىڭ ئىشچى  ناخشىسى، سۈرىيەلىك داڭلىق Kilaniretchi Kinan Azmeh نىڭ قايناق solo لىرى بىلەن يۇقىرى پەللىگە كوتۇرۇلۇپ، تاماشىبىنلارنى ئەسەبىلەرچە ئۇسۇلغا چۇشۇرۇپ، چوقان سۇرەنلەر پۇتۇن زالنى كوتۇرۇپ تاشلىدى. تارىم ناخشىسى (پەرھات ۋە پەزىلەتنىڭ قايتا سەھنىگە ئىلىپ چىقىشى بىلەن ئۇيغۇر ياشلىرى ئارىسىدا يېڭىدىن ھاياتلىققا ئىرىشكەن)، ئاق بايان، قىزلار، نازىركوم قاتارلىق ناخشىلار ئارقا ئارقىدىن، بۇ گىرمانىيەنىڭ تىنىچ كىچىك شەھىرىنى لەرزىگە سالدى.

كونسېرتنىڭ يۇقىرى پەللىسى، پەرھات روكلاشتۇرغان دولان مۇقام بىلەن كىشىلەرنى ھايران قالدۇردى. تاماشىبىنلار بۇ ياش مۇزىكانتلارنىڭ ئاجايىپ ھاياتى كۇچكە تولغان، ماگىنىتسىمان ئاۋازلىرىغا قايىللىق بىلدۈرۈشۈپ توختىماي ئالقىشلار ياڭراتتى.

Osnabrück ئەسلى Blues مۇزىكانتلىرىنىڭ ماكانى بولۇپ، پەرھات ئېرشاتلارمۇ Blues مۇزىكىسىنىڭ ھىرىسمەنلىرىدىن ئىدى. ئۇلارنىڭ ئەركىن ئوينىغان، ئەمما ئۇيغۇر پۇراق بىلەن يۇغۇرۇلغان  Blues نى نەق مەيداندا تەبىئى ئورۇنلىشىنى (ئالدىن مەشىق قىلىۋالماي، يەنى improvisation )   كىشىلەر بۇ دۇنياۋى مۇزىكا تۇرىدىكى يىڭىلىق دەپ ماختاپ كەتتى.  ئەسلى  1 سائەت پىلانلانغان كىچىلىك  تاماشىبىنلارنىڭ قىزغىنلىقى، مۇزىكانتلارنىڭ ئۇرغۇپ تۇرغان ھىسىياتى بىلەن 2 سائەت ئەتراپىدا داۋاملىشىپ، كونسېرت ئاياقلاشقانلىقى جاكارلانغان بولسىمۇ، تاماشىبىنلارنىڭ ئۈزۈلمەي ياغدۇرغان چاۋاك سادالىرى ئاستىدا، مۇزىكانىتلار  سەھنىگە ئارقىمۇ – ئارقىدىن ئۈچ قېتىم چىقىپ مۇزىكا ئورۇنلىدى.

بۇ سېھىرلىك كىچىدىن مەس بولۇشقان تاماشىبىنلار كونسېرت ئاياقلىشىپ تاڭ ئاتقىچىمۇ Lagerhalle نىڭ ئەتراپىدىن كىتىشمىدى. ھەممەيلەن ھاياجانلىق ئىچىدە، بۇ نەچچە مىڭ كىلومىتىر يىراقلىقتىن كەلگەن سەنەتكارلارغا ئاپىرىن ئوقۇشتى. بىر نەچچە ياشانغان مۇزىكا ھەۋەسكارلىرى، بۇ كونسېرتنى ئۆمرىدە كۆرگەن ئەڭ ئىسىل روك مۇزىكا كونسېرتى دەپ كوزلىرىگە ياشلار ئالدى.

يەرلىك گىزىتلەر بىر نەچچە كۈنگىچە توختىماي بۇ كونسېرتتىكى  قەھرىمانلارغا مەدىھىيەلەر ئوقۇدى.  ئۇيغۇرلار بىر نەچچە كۇن بۇ شەھەرنىڭ قىززىق تېمىسىغا ئايلاندى.

قېتىق نىڭ مۇزىكىلىرىنى  myspace بېتىدىن ئاڭلاڭ.

تۈۋەندىكىسى مۇشۇ قېتىمقى پائالىيەتتىن كۆرۈنۇشلەر:

تۈۋەندىكىلىرى يەرلىق مېدىيالاردا بىرىلگەن خەۋەرلەر

”قېتىقچىلار“

(مورگەنلاند مۇزىكا بايرىمى ۋە بۇ بايرامدىكى قېتىق مۇزىكا ئەترىتىنىڭ ئەھۋالى توغرىلىق مۇقەددەس مىجىت كىيىنراق تەپسىلى مەلۇمات بىرىدۇ)