1-ئاينىڭ 9-كۈنى چۈشتىن بۇرۇن سائەت 10 يېرىملار ئەتراپىدا، سىچۇەن لۇجۇۋ شەھىرىدىكى داشەنپىڭدىن جىياڭچېڭغا قاراپ كېتىۋاتقان 269-يول ئاپتوبۇسى بەيجاۋپەي ئەتراپىغا كەلگەندە، ئاپتوبۇستىن توساتتىنلا قويۇق ئىس-تۈتەك كۆتۈرۈلۈشكە باشلىغان بولۇپ، بۇنى كۆرۈپ قاتتىق ھودۇقۇپ كەتكەن يولۇچىلار ئاپتوبۇسنىڭ دېرىزىسىدىن سەكرەپ قېچىپ چۈشۈپ كەتكەن.
بەختكە يارىشا، ئاپتوبۇس شوپۇرى دەرھال ئاپتوبۇستىكى ئوتنى ئۆچۈرۈۋالغان بولۇپ، ئەينى چاغدا ئاپتوبۇستا يولۇچىلار ئانچە كۆپ ئەمەس ئىدى. ۋەقەدىن كېيىن، مۇخبىرنىڭ لۇجۇۋ شەھەرلىك ئاممىۋى قاتناش شىركىتىدىن ئەھۋال ئىگەللىشىچە، بۇ ۋەقەدە بىر يولۇچى يارىلانغان.
شۇنىڭ بىلەن بىر ۋاقىتتا، مۇخبىرنىڭ ئىگەللىشىگە قارىغاندا، ئالاقىدار تارماقلارنىڭ دەسلەپكى قەدەمدە تەكشۈرۈپ ئېنىقلىشىچە، مەزكۇر ۋەقەدىكى گۇماندار-جاڭ فامىلىلىك (ئايال، 51 ياش، ناشى رايونىدىن) ئائىلە ماجراسى تۈپەيلىدىن ئاپتوبۇسقا ئوت قويۇۋەتكەن ئىكەن.
نۆۋەتتە بۇ دېلو يەنىمۇ ئىچكىرىلەپ تەكشۈرۈلۈۋاتقان بولۇپ، ۋەقە يۈز بەرگەن نەق مەيداندا قاتناش ئەسلىگە كەلگەن.
