سىنا تەنتەربىيەسى خەۋىرى، نۇر تورى تەرجىمىسى: پورتۇگالىيەلىك داڭلىق ھۇجۇمچى كىرىستىئانو رونالدو توپ مەستانلىرىنىڭ ئۆزىگە قارىتىپ «مېسسى...مېسسى...مېسسى» دەپ توۋلاشلىرىغا ئادەتلىنىپ كەتتى. ھازىر كىرىستىئانو رونالدو ئۇلارغا قانداق مۇئامىلە قىلىش جەھەتتىكى ئامالنى تېپىپ چىقتى. مۇشۇ ھەپتىنىڭ بىرىنچى كۈنى پورتۇگالىيە پۇتبول كوماندىسى بىلەن ئالبانىيە پۇتبول كوماندىسى ئوتتۇرسىدىكى مۇسابىقىدە ئوينىلىشتىن بۇرۇن، توپچىلار مەيداندا بەدەن قىززىتىۋاتقاندا، نەق مەيداندىكى ئالبانىيە توپ مەستانىلىرى كىرىستىئانو رونالدوغا قاراپ «مېسسى...مېسسى» دەپ ۋارقىراشنى باشلىغان. ھەيران قالارلىق يېرى، بۇ قېتىم كىرىستىئانو رونالدو ئىلگىرىكىدەك تېرىكىپمۇ كەتمىگەن، بەلكى ئوڭ قولىنى قۇلىقىغا يېقىن ئەكىلىپ «تېخىمۇ بەكرەك توۋلاڭلار» دېگەن ئىشارىنى قىلغان. (تۆۋەندىكى فىلىمىنى كۆرۈڭ) خىيالىغا كەلمىگەن ھالەتتە يەنە ئۆزىنىڭ مەشقىنى داۋاملاشتۇرغان.
كىرىستىئانو رونالدوغا قارىتىپ «مېسسى» دەپ توۋلايدىغان ئىشلار ئادەتتە پۇتبول مەيدانىدا كۆپ كۆرۈلىدۇ، سېپروس پۇتبول كوماندىسى بىلەن ئوينىغان مۇسابىقىدە توپ مەستانىلىرى ئۇنىڭغا قارىتىپ «مېسسى» دەپ ۋارقىراپ قەستەن تېرىكتۈرۈشكە ئۇرۇنغان، شۇ چاغدا كىرىستىئانو رونالدو مۇنداق دېگەن: «كۆپلىگەن كىشىلەر ماڭا نەپرەتلىنىدۇ، يەنە كۆپلىگەن كىشىلەر مېنى قوللايدۇ، ئۇلارنىڭ ماڭا ئۆچمەنلىك بىلەن قارىشىدىن تېرىكىپ كەتمەيمەن، بەلكى خوشال بولىمەن، ئۇلار شۇنداق قىلغانسېرى مەن تېخىمۇ كۈچكە تولىمەن، بۇ مېنى تېخىمۇ قوزغىتىدۇ، ئەمەلىي ھەرىكىتىم ئارقىلىق ئۇلارغا جاۋاب قايتۇرىمەن، ئەمىلىيەتتە، مەن ئېنگىلاند دەرىجىدىن تاشقىرى بىرلەشمىسدە توپ تېپىۋاتقان چاغدىلا توپ مەستانىلىرىنىڭ ھەر خىل مۇئامىلىسىگە ئادەتلىنىپ كەتكەن، 2006-يىلىدىكى دۇنيا لوڭقىسى پۇتبول مۇسابىقىسدە، پورتۇگالىيە پۇتبول كوماندىسى ئېنگىلاند كوماندىسىنى شاللىۋەتكەندىن كېيىن مەن توپ مەستانىلىرىنىڭ رەقىبىگە ئايلىنىپ قالغان ئىدىم» دۇنيا پۇتبول تارىخىدىكى باھاسى ئەڭ يۇقۇرى توپچى بولۇش سۈپىتى بىلەن، كىرىستىئانو رونالدونىڭ بېسىمى ھەققەتەن ئاز ئەمەس، بولۇپمۇ مېسسىدەك بۇنداق دەرىجىدىن تاشقىرى توپچى بار ئەھۋال ئاستىدا تېخىمۇ شۇنداق بولىدۇ.
