ۋاڭيى تورى خەۋىرى:
AppleInsider تور بېكىتىنىڭ خەۋىرىگە قارىغاندا، ئالما شىركىتى يېڭىدىن ئېلان قىلغان كۆچمە مەشغۇلات سىستېمىسى iOS 9 رەسمىي ھالدا تارقىتىلغاندىن كىيىنكى 24 سائەت ئىچىدە، قاچىلىنىش نىسبىتى ئاللىقاچان %12.5 گە يەتكەن، بۇ بۇلتۇرقى iOS 8 نىڭ ئىپادىسىدىن ياخشى بولغان. بۇندىن ئىلگىرىكى خەۋەرلەرگە ئاساسلانغاندا، iOS 9 سىستېمىسى تارقىتىلىشتىن بۇرۇن، iOS 8 نىڭ قاچىلىنىش نىسبىتى %87 گە يەتكەن.
سانلىق مەلۇماتلارنى ئىز قوغلاپ ئانالىز قىلىش ئورگىنى Mixpanel ئېلان قىلغان ئەڭ يېڭى دوكلاتقا ئاساسلانغاندا، iOS 9 نىڭ قاچىلىنىش نىسبىتىنىڭ تېز سۈرئەتتە ئېشىشىغا ئاساسلىقى iOS 8 ئابونتلىرىنىڭ سىستېما يېڭىلىشى تۈرتكە بولغان.
تۈنۈگۈن چۈشتىن كىيىن سائەت 4:00 كە قەدەر، iOS 9 نىڭ قاچىلىنىش نىسبىتى ئاللىقاچان %15 گە يەتكەن، iOS 8 نىڭ قاچىلىنىش نىسبىتى بولسا %78 گە چۈشۈپ قالغان، قالغان %7 ىنى كونا نەشىردىكى سىستېمىسى ئىگەللەيدىكەن. خەۋەردە دېيىلىشىچە، iOS 9 نىڭ قاچىلىنىش نىسبىتى iOS 8 نىڭ بۇلتۇرقى ئىپادىسىدىن ياخشى بولغان، iOS 7 دىن سەل تۆۋەنرەك بولغان. ئەلۋەتتە، بۇنىڭ ئەجەبلەنگۈدەك يېرىمۇ يوق، چۈنكى، iOS 7 سىستېمىسى 2013-يىلى ئېلان قىلىنغاندا، ئۇنىڭدىكى UI ئۇسلۇبىدا زور دەرىجىدە ئۆزگىرىش بولغان، شۇنىڭ ئۈچۈن، مۇتلەق كۆپ ساندىكى ئابونتلارنى ئۆزىگە جەلىپ قىلىۋالغان.
ئالما شىركىتى شۇ جاي ۋاقىت بويىچە چارشەنبە كۈنى iOS 9 سىستېمىسىنى رەسمىي ئېچىۋەتكەن، ئىلگىرى تونۇشتۇرۇلغاندەك، iOS 9 نىڭ نۇرغۇن تەرەپلەردىكى ئىقتىدارىدا زور ئىلگىرىلەش بولغان، مەسىلەن، Siri تېخىمۇ ئەقىللىق بولغان، 3-تەرەپ Spotlight ئىزدەش ئىقتىدارى قوشۇلغان، Apple Pay ۋە TouchID قاتارلىقلارنىڭ يۇمشاق دېتال نەشىرى يۇقىرى كۆتۈرۈلگەن، بۇندىن سىرىت، يانفوننىڭ توك سەرپىيات ۋاقتى تېخىمۇ ئۇزارتىلغان.
iOS 9 سىستېمىسىدا يەنە مەخسۇس iPad گە قارىتىلغان بىر يارقىن نۇقتا بار، ئۇ بولسىمۇ QuickType كۇنۇپكا تاختىسى ۋە ئېكران ئايرىش ئىقتىدارى. بۇنىڭ ئىچىدە، QuickType كۇنۇپكا تاختىسىغا نۇسخىلاش، كېسىش ۋە چاپلاش قوراللىرى قوشۇلغان؛ ئېكران ئايرىش ئىقتىدارىمۇ ئابونتلارغا زور قولايلىق ئېلىپ كىلەلەيدىكەن.
بۇندىن ئىلگىرىكى نەچچە ئەۋلاد سىستېمىسىغا قارىغاندا، iOS 9 نى ئالما ئۈسكۈنىلىرىنىڭ قاتتىق دېتال جەھەتتىكى ئەۋزەللىكىنى ئەڭ زور دەرىجىدە جارى قىلدۇرۇشىغا ئىمكانىيەت يارىتىپ بەرگەن دەپ ئېيتىشقا بولىدىكەن.
