كورىيە تېلېۋىزىيە تىياتىرى «قۇياش ئەۋلادلىرى» توردا ئىككى ھەپتىدە 300 مىليون قېتىم قويۇلدى
«يۇلتۇزدىن كەلگەن سۆيگۈنۈم» دىن كېيىن ئىسمى يۇلتۇز، پلانېتالار بىلەن مۇناسىۋەتلىك بارلىق كورىيە تېلېۋىزىيە تىياتىرلىرى شەرقىي ئاسيادا قىزىق تىمىغا ئايلىنىپ، مودا ئېقىم پەيدا قىلىدىغان بولدى. بۇ يۈزلىنىش يېقىندا قويۇلغان «قۇياش ئەۋلادلىرى» دا يۇقىرى پەللىگە يەتتى.
ئىلگىرى جۇڭگولۇق كۆرۈرمەنلەر «يۇلتۇزدىن كەلگەن سۆيگۈنۈم» ۋە باشقا كورىيە تېلېۋىزىيە تىياتىرلىرى كورىيەدە قويۇلۇپ بولغاندىن ئاندىن كۆرەلەيتى، ھازىر بولسا «قۇياش ئەۋلادلىرى» نۆل ۋاقىت پەرقى بويىچە جۇڭگو ۋىدىئو تورىدا قويۇلۇپ، تۇنجى قېتىم ھەقىقىي تۈردە كۆرۈرمەنلەرنى كورىيەلىكلەر بىلەن تەڭ ۋاقىتتا تېلېۋىزىيە تىياتىرىدىن ھوزۇرلىنىش پۇرسىتىگە ئىگە قىلدى.
ئىككى ھەپتە قويۇلغاندىن كېيىن «قۇياش ئەۋلادلىرى» كورىيە ۋە جۇڭگودا مۆجىزە خاراكتىرلىك سانلىق مەلۇماتلارغا ئېرىشتى. كورىيەدە بىرىنچى قىسىم قويۇلغاندا كۆرۈلۈش نىسبىتى %14.3ئىدى، ئۈچىنچى قىسىمدا %23.4 گە يەتتى، تۆتىنچى قىسىمغا كەلگەندە بولسا %24.1 بولدى، بۇ نەتىجە «يۇلتۇزدىن كەلگەن سۆيگۈنۈم» دىن پەرقلەنمەيدۇ، ھەتتا ئۇنىڭدىن ھالقىپ يۈزلىنىشىدە تۇرماقتا. بۇ تېلېۋىزىيە تىياتىرى تەڭ ۋاقىتتا قويۇلۇۋاتقان ئەيچىيى تورى سۇپىسىدا بولسا، بىرىنچى قىسىمنىڭ قويۇلۇش قېتىم سانى 24 سائەت ئىچىدە 30 مىليوندىن ئاشقان، ئۈچىنچى قىسىم قويۇلغاندىن كېيىن، ئومۇمىي قويۇلۇش نىسبىتى 100 مىليونغا يەتتى، 8-مارت تۆتىنچى قىسىم قويۇلغاندىن كېيىن، قويۇلۇش نىسبىتى 300 مىليوندىن ئاشتى.
كۆرۈلۈش نىسبىتىدىن باشقا، «قۇياش ئەۋلادلىرى» ناھايىتى ياخشى باھاغا ئېرىشتى. ھەرقايسى ئىزدەش ماتورلىرىدا ۋە سۆز تېمىسى رەت تەرتىپىلىرىدە دائىم بۇ تېلېۋىزىيە تىياتىرىغا ئالاقىدار مەزمۇنلارنى ئۇچراتقىلى بولىدۇ. پەقەت تۆت قىسىم قويۇلۇپلا، سىنا مىكرو بلوگىدا «قۇياش ئەۋلادلىرى» پاراڭ تېمىسىنىڭ كۆرۈلۈش نىسبىتى 2 مىليارد 490 مىليونغا يەتتى، بىر ھەپتە ئىچىدە 1 مىليارد كۆپەيدى.
بۇنىڭدىن باشقا بۇ تېلېۋىزىيە تىياتىرىنىڭ ئايال باش رولچىسى، گۈزەللىكىنى 20 يىل ئۆز پىتى ساقلىغان سوڭ خۈيچياۋ نۇرغۇن ئەر كۆرۈرمەنلەرنى جەلىپ قىلىۋالدى. يېقىندا ھەربىيىلىكتىن قايتىپ كەلگەن ئەر باش رولچى سوڭ جوڭجى ئەرلىك جەزبىدارلىقىنى نامايان قىلىپ نۇرغۇن مەستانىلەرگە ئېرىشتى.
