پۇل تېپىش، پۇل خەجلەش ۋە پۇل ئامانەت قويۇش

 خۇاڭ جېي

   پۇل تېپىش، ئېشىنچا پۇلنى بانكىغا ئامانەت قويۇش ھازىرقى زامان كىشىلىرىنىڭ ئادەتتىكى ئىقتىساد باشقۇرۇش قارىشىدۇر. لېكىن تاپقان پۇلنى قالايمىقان خەجلەپ، قانچىلىك ئاشسا شۇنى ئامانەت قويىدىغان، ئاخىرىدا ئامانەت قويغۇدەك پۇلىمۇ قالمايدىغان، بەزىدە ھەتتا ‹‹قىزىل رەقەم كۆرۈلىدىغان›› ئەھۋاللارمۇ بار. مەن ‹‹ ئاۋۋال خەجلەيدىغان پۇلنى ئايرىۋېلىش، ئاندىن ئېشىنچا پۇلنى ئامانەت قويۇش››نىڭ ئەكسىچە، ‹‹ ئاۋۋال ئامانەت قويىدىغان پۇلنى ئايرىۋېلىش، ئاندىن ئاشقان پۇلنى خەجلەش››نى تەۋسىيە قىلىمەن. ئاۋۋال پىلانلىق پۇل ئامانەت قويۇش، ئاندىن خەجلەيدىغان پۇلنى ئايرىۋېلىش كېرەك، شۇنداق قىلغاندىلا پۇلنى ياخشى باشقۇرۇپ، تۇرمۇش بېسىمىنى يەڭگىللەتكىلى بولىدۇ.

   قاراشنى ئۆزگەرتىشكە مەلۇم جەريان كېتىدۇ. كىشىلەرنىڭ ياشاش شارائىتى ئوخشىمىغاچقا، پۇل تېپىش، پۇل خەجلەش ۋە پۇل ئامانەت قويۇش قارىشىمۇ ئوخشىمايدۇ. بەزىلەر پۇل تېپىش خەجلەش ئۈچۈندۈر، تاپقان پۇلنى ئامانەت قويۇۋەتسەك، پۇل تېپىپ نېمە قىلىمىز؟ دېيىشىدۇ. ھەقىقەتەن، پۇل تېپىشتىكى مەقسەت خەجلەش ئۈچۈندۇر، لېكىن پۇل خەجلىگەندە پۇلسىز قالىدىغان چاغلارنىمۇ ئويلىشىپ قويۇش كېرەك. دېمەك، بانكىغا پۇل ئامانەت قويۇش ئارقىلىق، پۇلسىز قېلىشتىن ساقلانغىلى بولىدۇ. لېكىن قانچىلىك پۇلنى ئامانەت قويۇش كېرەك؟ قەيەرگە ئامانەت قويۇش كېرەك؟ پۇل ئامانەت قويۇشتىكى پىلان قانداق بولۇشى كېرەك؟ بۇنى شەخس ئەھۋالىغا قاراپ بېكىتىش كېرەك. پۇلنى قانداق ئامانەت قويۇش كېرەك؟ قانداق قىلغاندا پۇلدىن تېخىمۇ ئۈنۈملۈك پايدىلانغىلى بولىدۇ؟ بۇ ئىلمىي ئىقتىساد باشقۇرۇش قارىشى ھېسابلىنىدۇ. بۇنىڭ ئۈچۈن ئىقتىساد باشقۇرۇش ۋاستىلىرىدىن پايدىلىنىشقا توغرا كېلىدۇ.

   كۆپ ساندىكى كىشىلەرنىڭ پۇل ئامانەت قويۇشى بىرىنچىدىن، تىرىكچىلىك، ئىككىنچىدىن، بىخەتەرلىك ئۈچۈندۇر. شۇڭا ئىقتىسادىي ئەھۋالىمىزنى ئەستايىدىل ئويلىشىپ، مەبلەغ سېلىش نىشانىمىزنى ئايدىڭلاشتۇرۇۋېلىشىمىز كېرەك، يەنە ئۆزىمىزنىڭ قايسى خىلدىكى مەبلەغ سالغۇچى، خەۋپكە بەرداشلىق بېرىش ئىقتىدارىمىز قانچىلىك؟ دېگەنلەرنى بىلىۋېلىشىمىز كېرەك.

   ئومۇمەن، پۇل تېپىش، پۇل خەجلەش ۋە پۇل ئامانەت قويۇش توغرىسىدا ھەممە كىشى كۆڭلىدە ئۆز ئالدىغا چوت سوقىدۇ. ئىقتىسادىي ئەھۋالغا قاراپ ئىش كۆرۈپ، قاراشنى ئۆزگەرتىپ، ئەڭ ياخشى ئىقتىساد باشقۇرۇش ئۇسۇلى ئۈستىدە ئىزدەنگەندىلا، باياشات تۇرمۇشقا يېقىنلاشقىلى بولىدۇ.

ئەسلى مەنبە:  http://uy.ts.cn/news/content/2015-09/10/content_451206.htm