«جۇڭگو خەۋىرى» تورى خەۋىرى، نۇر تورى تەرجىمىسى:
خەۋەرلەرگە ئاساسلانغاندا، سىچۈەن ئۆلكىسى ياشى يۇقىرى سۈرئەتلىك تاشيول قاتناش ساقچى 3-چوڭ ئەترىتىدىكى ساقچى تۈنۈگۈن يۇقىرى سۈرئەتلىك تاشيول جىددىي ئەھۋال يولىدا دالا تامىقى يېگەنلەرنىڭ بىر پارچە رەسىمىنى ئاشكارىلىۋەتتى.
رەسىمدە كۆرسىتىلىشىچە، بىر كىچىك ئاپتوموبىل ياشى يۇقىرى سۈرەتلىك تاشيولىنىڭ بويىدىكى مۇلازىمەت رايوننىڭ ئالدىدىكى جىددىي ئەھۋال يولىدا، يول بويىدىلا ئۈستەل، ئورۇندۇقلارنى تىزىپ، ئۈستىگە نۇرغۇن يېمەكلىكلەرنى قويغان ھەمدە ناھايىتى ئازادە ھالدا بىر قېتىملىق دالا تامىقى يېگەن، ئۇنىڭدىن باشقا نۇرغۇنلىغان ئەخلەتلەرنى يول بويىغا تۆكۈۋەتكەن. ئۇلارنىڭ بۇ قىلمىشى جېنى بىلەن ئويناشقانلىق ئىدى.
بۇ بىر پارچە رەسىم نۇرغۇنلىغان تورداشلارنىڭ بەس مۇنازىرىسىنى قوزغىدى. نۇرغۇنلىغان تورداشلار بۇ كىشىلەرنىڭ قىلمىشىنى ئەيىبلىدى، ھەمدە ئۇلارنى «ساپاسىز، جېنى بىلەن ئويناشقانلىق» دېيىشتى.
مۇخبىرنىڭ بۈگۈن سىچۇەن ئۆلكىسى ياشى يۇقىرى سۈرئەتلىك تاشيول قاتناش ساقچى 3-چوڭ ئەترىتى 1-ئوتتۇرا ئەترەت باشلىقى ۋاڭ رۇي بىلەن ئالاقىلاشقان. ئۇنىڭ ئېيتىشىچە بۇ ۋەقە 9-فېۋرال چۈشتىن كېيىن 14:35 ئەتراپىدا يۈزبەرگەن بولۇپ، ئەينى ۋاقىتتا ۋاڭ رۈي قول ئاستىدىكى ساقچىلار بىلەن بىللە يۇقىرى سۈرئەتلىك تاشيول «شېمىيەن» مۇلازىمەت رايونى ئەتراپىدا چارلاش ئېلىپ بېرىۋاتقان ئىكەن. دەل شۇ ۋاقىتتا مۇلازىمەت رايونى ئالدىدىكى جىددىي ئەھۋال يولىدا بىر ئائىلە كىشىلىرى يول بويىغىلا ئۈستەل-ئورۇندۇقلارنى تىزىپ ناھايىتى ئازادە ھالدا بىر قېتىملىق دالا تامىقى يېگەن. بۇ كىشىلەر ئارىسىدا كىچىك بالىلارمۇ، ياشانغان كىشىلەرمۇ بار ئىكەن، ئۇلارنىڭ بەزىلىرى يۇقىرى سۈرئەتلىك تاشيولدا قالايمىقان مېڭىپ يۈرگەن ھەمدە يېگەن نەرسىلىرىنى يول ئەتراپىغا قالايمىقان تاشلىغان.
قاتناش ساقچىسىنىڭ ئېيتىشىچە، ئۇلارنىڭ بۇ قىلمىشى ناھايىتى خەتەرلىك بولۇپ، مەزكۇر يۇقىرى سۈرئەت تاشيولدا يۈك ماشىنىلىرى كۆپ ماڭىدىكەن، ئۇنىڭ ئۈستىگە بۇ يولدا ئەگرى ئايلانما يوللار ناھايىتى كۆپ ئىكەن، ئۇلارنىڭ بۇ قىلمىشى ئۆزىنىڭ جېنى بىلەن ئويناشقانلىق ئىكەن.
نۆۋەتتە ئالاقىدار قانۇنلارغا ئاساسەن، قاتناش ساقچىلىرى يۇقىرى سۈرەتلىك تاشيول جىددىي ئەھۋال يولىنى ئىگەللىۋالغان شوپۇرغا 200 يۈەن جەرىمانە قويۇش، پىراۋىسىدىن ئالتە نومۇر تارتىش جازاسى بەرگەن.
ساقچىلارنىڭ ئېيتىشىچە، يۇقىرى سۈرئەتلىك تاشيول جىددىي ئەھۋال يولىدا ماتورلۇق قاتناش ۋاسىتىلىرى قاتناش ھادىسىسى يۈز بەرگەندە ياكى ماشىنىدىن كاشىلا چىققاندىلا توختاشقا بولىدىكەن. ئۇنىڭدىن باشقا، ساقچى ماشىنلىرى، ئوت ئۆچۈرۈش ماشىنىسى، قۇتقۇزۇش ماشىنىسى، قۇرۇلۇش ماشىنلىرى قاتارلىق ماشىنىلار ۋەزىپە ئىجرا قىلغاندىلا بۇ يولدا مېڭىشقا بولىدىكەن. ماتورلۇق قاتناش ۋاسىتىسى يۇقىرى سۈرئەتلىك تاشيولدا يول يۈرگەندە جىددىي ئەھۋال يولىنى ئىگىلەپ مېڭىش ياكى توختىۋىلىشقا بولمايدىكەن.
