شىنخۇا تورى، 18-ئاپرېل خەۋىرى: ئەنگلىيە كۈندىلىك پوچتا گېزىتىنىڭ 14-ئاپرېلدىكى خەۋىرىگە قارىغاندا، يېقىندا ئىجتىمائىي ئالاقە تورى Instagram دا نەچچە ئون مىليون چوقۇنغۇچىسى بولغان گۈزەل مىكرو بىلوگ ئىگىسى ھۇدا 30 سېكۇنتلۇق ۋىدىئونى ئېلان قىلىپ, چوقۇنغۇچىلىرىغا ئۆزىنىڭ ئۇستۇرا بىلەن يۈزىدىكى تۈكلىرىنى پاكىزە ئېلىپ, سۈزۈك تېرە ھالىتىنى ساقلاپ كەلگەنلىكىنى ئاشكارىلىغان. ۋىدىئودا ئۇ ئۇستۇرا بىلەن يۈز ۋە ماڭلاي ئەتراپىدىكى تۈكلەرنى تازىلىغان ، ئۇ بۇنداق قىلىش ئارقىلىق يۈز قىسىمىدىكى تۈكلەرنى پاكىز تازىلاش مەقسىتىگە يەتكىلى بولىدىغانلىقىنى ھەمدە ئۆلگەن تېرىلەرنى تازىلاپ، قېرىشنى كېچىكتۈرۈشكە پايدىسى بارلىقىنى بىلدۈرگەن. ئۇ يەنە، مارىلىن مونرومۇ مۇشۇ ئۇسۇل ئارقىلىق تېرىسىدىكى ئۆلگەن تېرىلەرنى تازىلاش مەقسىتىگە يەتكەنلىكىنى ئاشكارىلىغان. ھۇدانىڭ بۇ ۋىدىئوسى توردا غۇلغۇلا قوزغىغان، نۇرغۇن كىشىلەر بۇنىڭغا گۇمان نەزىرىدە قارىغان. ئەمما يەنە بىر قىسىم كىشىلەر بۇنىڭغا قوشۇلۇپ ، تېرىنى ئۇستۇرا بىلەن تازىلاپ تۇرۇشنىڭ تېرىنى تېخىمۇ ياخشىلاپ ، تېرىنىڭ پاكىز ھالەتتە تۇرۇشىغا پايدىلىق دەپ قاراشقان.
