mtime تورى خەۋىرى، نۇر تورى تەرجىمىسى:
بۇ يىل 2-ئايدا، «ئەجدىھار چەكمىلىك قىز» نىڭ باش رولچىسى رۇنىي مارا زىيارەت قوبۇل قىلغاندا، ئۆزىنىڭ بۇ فىلىمنىڭ سېرىئالى ئىشلەنمەيدۇ دەپ قارايدىغانلىقىنى بىلدۈرۈپ، نۇرغۇنلىغان كىنو مەستانىلىرىنى ئىنتايىن ئۈمىدسىزلەندۈرگەن ئىدى. ئەمما يېقىندا چەتئەل تاراتقۇلىرىنىڭ خەۋەر قىلىشىچە، سونىي بۇرۇنقىدەكلا بۇ فىلىمنىڭ سېرىئالىنى داۋاملىق ئىشلەشنى ئىلگىرى سۈرگەن، پەقەت فىلىمنىڭ باش رولچىسى ئالىشىيا ۋىكاندېرغا ئالمىشىشى مۇمكىن، ئەكىسچە ئالدىنقى بۆلۈمىنىڭ رېژىسسورى دەيۋىد فىشېرمۇ قايتا رېژىسسورلۇق قىلمايدۇ.
سونىينىڭ ئىلگىرىكى پىلانى بولسا شىۋىتسىيەلىك يازغۇچى ستېيىگ لارسون «مىڭ يىل» تىرىلوگىيەسىنىڭ تەرتىپى بويىچە، «The Girl Who Played with Fire» «ئوت ئوينايدىغان قىز» نى داۋاملىق ئىشلەش، ئەمما ھازىرقى پىلاندا ئۆزگىرىش بولدى، «ئەجدىھار چەكمىلىك قىز» نىڭ كېيىنكى سېرىئالى دەيۋىد لاگېركرانىس (David Lagercrantz) نىڭ «مىڭ يىل» تىرىلوگىيەسىنىڭ داۋامى «ئۆمۈچۈك تورىدىكى قىز» غا ئاساسەن ئۆزگەرتىپ ئىشلىنىدىغان فىلىم، «ئوت ئوينايدىغان قىز» ئۈچىنچى بۆلۈمگە تەڭشەلدى.
نۆۋەتتىكى ئەھۋال بولسا، رۇنىي مارا داۋاملىق فىلىمنىڭ سېرىئالىدا رول ئالمايدۇ، رېژىسسور دەيۋىد فىشېر ۋە باشقا بىر باش رولچى دەنىل كرەيىگنىڭمۇ قايتىپ كېلىشىدىن ئۈمىد يوق. سونىي تەرەپ ئالىشىيا ۋىكاندېرنى بۇ فىلىمدا رول ئېلىشقا تاللىدى، سىنارىت ستېۋېن نايىت («Locke» نىڭ سىنارىيەسىنى يازغان) ھازىر «ئۆمۈچۈك تورىدىكى قىز» نىڭ سىنارىيەسىنى يېزىۋاتىدۇ. تارقالغان خەۋەردە، فىلىمنىڭ فىلىم ئىشلىگۈچىسى سكوت رۇدىن ۋە ئەممى پاسكار ئىككىلىسى ئالىشىيا ۋىكاندىرنىڭ مەستانىسى، شۇڭا ئالىشىيا ۋىكاندىرنىڭ ئەڭ ئاخىرىدا بۇ فىلىمدا رولغا چىقىش ئېھتىماللىقى ئىنتايىن چوڭ دېيىلگەن.
ئىگەللىنىشىچە، «ئۆمۈچۈك تورىدىكى قىز» نىڭ خامچوتى «ئەجدىھار چەكمىلىك قىز» دىن تۆۋەن بولىدىكەن، كېيىنكىسىنىڭ خامچوتى 90 مىلىيون دوللار ئەتىراپىدا بولغان، ئەمما سونىي «ئەجدىھار چەكمىلىك قىز» نىڭ 230 مىلىيون دوللارلىق بېلەت كىرىمىدىن ئىنتايىن رازى ئەمەس. دەيۋىد فىشېرمۇ بۇندىن ئىلگىرى «گەرچە سونىي تۇنجى بۆلۈمىنىڭ بېلەت كىرىمىدىن رازى بولمىسىمۇ، ئەمما نەچچە مىلىيون دوللار خەجلەپ كىتابنىڭ نەشىر ھوقۇقىنى سېتىۋېلىپ، ئۆزگەرتىپ سىنارىيەلەشتۈردى، سېرىئالى يەنىلا داۋاملىشىدۇ.» دېگەن.
