15 ياشلىق قىزچاق رەسىم رامكىسى تالاشقانلىقى ئۈچۈن ئېتىپ تاشلاندى
جۇڭگو خەۋەر تورى 26-فېۋرال خەۋىرى: 10 نەچچە فوتوگراف بۇ Fabeinne Cherisma ئىسىملىك كىچىك قىزچاقنىڭ جەسىتى يېنىدا، توختىماستىن ئاپپاراتلىرىنى شاراقشىتىپ رەسىمگە تارتىۋاتقان بولۇپ، ئۇلار ئاپپاراتلىرىنى ھەرخىل شەكىلدە تەڭشەپ، بۇ كىچىك قىزچاق جەسىتىنىڭ ئەڭ ياخشى سۈرەتكە تارتىش بۇلۇڭىنى توغرىلاۋاتقان ئىدى. نەرسە تالىشىۋاتقانلار ئۇنىڭ جەسىتى ئۈستىدىن ئاتلاپ ئۆتۈپ، ئۇنىڭ دادىسى كېلىشتىن بۇرۇن، ئالغىلى بولغۇدەك نەرسىلەرنىڭ ھەممىسىنى ئېلىپ قېچىۋاتاتتى.
2010-يىلى 1-ئايدا يۈز بەرگەن ھايتىدىكى چوڭ يەر تەۋرەش نەچچە ئونمىڭلىغان كىشىلەرنىڭ جېنىنى ئالغان. لېكىن بۇ كىچىك قىزچاقنىڭ ئۆلۈپ كەتكەنلىك رەسىمى دۇنيا خەلقىنىڭ غۇلغۇلىسىنى قوزغىغان بولۇپ، ئۇنىڭ بۇ ئېچىنىشلىق رەسىمى كىشىلەرگە «ھايتى بىر ئۈمىدسىزلىككە تولغان جاي» ئىكەنلىكىنى ھېس قىلدۇرغان. بۇ رەسىمنى تارتقان ئىككى فوتوگراف مۇشۇ رەسىمى بىلەنلا مۇكاپاتقا ئېرىشكەن.
بۇ ۋەقە يۈز بېرىپ ئىككى ئايدىن كېيىن، فوتوگراف Nathan Weber ئەسلىدىكى ئەھۋالنى ئەكس ئەتتۈرىدىغان يەنە بىر پارچە رەسىمنى ئېلان قىلغان بولۇپ، ئۇنىڭ ئۈستىدە بۇ قىزچاقنىڭ جەسىتىنى رەسىمگە تارتىۋاتقان Nathan Weber نىڭ خىزمەتداشلىرى كۆرسىتىلگەن. رەسىم ئېلان قىلىنغاندىن كېيىن، ھايتى زور ئاپىتى توغرىسىدىكى ھەرخىل رەسىملەر شىددەت بىلەن يامراشقا باشلىغان، بۇ نۇرغۇن كىشىلەرنى ئەندىشىگە سالغان.
ئەنگلىيە ئاپەتكە قارشى تۇرۇش كومىتېتىنىڭ ئەمەلدارى ئوچۇق ئاشكارا خەت يېزىپ بۇ مەسئۇلىيەتسىزلىك بىلەن تارتىلغان رەسىمنى تەنقىد قىلغان. خەۋەردە دېيىلىشىچە، ھايتى پۇقرالىرى يەنە تېخى بۇ رەسىمنى تارتقان فوتوگرافلارغا تاش ئېتىپ نارازىلىقىنى بىلدۈرگەن. چۈنكى ئۇلار بۇنى «باشقىلارنىڭ مەخپىيىتىنى سىرتقا ئاشكارىلىغانلىق» دەپ قارايدىكەن. لېكىن فوتوگرافلارنىڭ قارىشىچە، بۇنداق قىلىش باشقىلارغا ھاقارەت قىلىش بولۇپ ھېسابلانماستىن ئەكسىچە بۇنداق بولغاندا كىشىلەر ھەقىقىي ئەھۋالدىن خەۋەردار بولالايدىكەن.
ئۇنداقتا ئاپەت جەريانىدا بولسۇن ياكى كۈندىلىك تۇرمۇشتا بولسۇن، ھەقىقىي ئەھۋالنى خەۋەر قىلىش بىلەن ھاياتلىققا ھۆرمەت قىلىش، بۇ ئىككىسىدىن زادى قايسىسى ھەممىدىن مۇھىم؟ بۇ مەسىلە ھەقىقەتەن كىشىلەرنى ئويغا سالىدۇ.
