ئەينى ۋاقىتتا ئاي شارىدا زادى قانداق ئاۋاز ئاڭلانغان؟
2-ئاينىڭ 22-كۈنى، ئەنگىلىيە رادىيو شىركىتى (BBC) قاتارلىق خەلقئارالىق چوڭ تاراتقۇ شىركەتلىرى NASA ئاي شارىدا ئاڭلانغان بىرئاۋازنى ئاشكارىلىغانلىقى ھەققىدە خەۋەر بەردى.
ئامېرىكىلىقلار 1969-يىلى «11-نومۇرلۇق ئاپوللو» دەپ ئاتالغان ئالەم ئۇچقۇرى بىلەن ئايغا قونىدۇ. ئۇنىڭدىن ئىككى ئاي بۇرۇن 3 نەپەر NASA خادىمى «10-نومۇرلۇق ئاپوللو» بىلەن ئاي شارىغا بېرىپ، ئۇنى ئوربىتلاپ ئايلىنىدۇ. ئۇلار ئاينىڭ يەر شارىغا قارىمۇ-قارشى تەرىپىگە ئۆتكەندە ئۇلارنىڭ يەر يۈزى بىلەن بولغان رادىيو ئالاقىسى پۈتۈنلەي ئۈزۈلىدۇ. يەنى، ئۇلارنىڭ يەر بىلەن بولغان ئالاقىسىنى ئاي شارى توسۇۋالىدۇ. دەل شۇ چاغدا NASAنىڭ ھېلىقى 3 خادىمى قۇلىقىغا تىقىۋالغان تىڭشىغۇچىلاردا بۇرۇن ئاڭلاپ باقمىغان، تاشقىي دۇنيادىن كەلگەن مۇزىكىدەك بىر خىل ئاۋازنى ئاڭلايدۇ. بۇ ئاۋاز بىر سائەتتەك ۋاقىت داۋام قىلىپ، NASA خادىملىرى ئاي شارىنىڭ يەر شارى يۈزىگە قارايدىغان تەرىپىگە ئۆتكەندە ئاندىن يوقاپ كېتىدۇ.
شۇ جەرياندا NASA نىڭ ھېلىقى 3 خادىمى بۇ ئىشنى NASA غا دوكلات قىلىش-قىلماسلىق ھەققىدە ئۆز-ئارا پىكىرلەشكەن بولۇپ، ئۇلارنىڭ سۆزلىرىمۇ ئاۋاز ساقلايدىغان ئەسۋابقا ئېلىنىپ قالىدۇ.
NASA بۇ ئىشلارنى مەخپىي تۇتۇپ، 2008-يىلى ئۇلارنى سىرتقا تارقاتسا بولىدىغان مەلۇماتلار قاتارىغا كىرگۈزىدۇ. ئەمما ھېلىقى ئاۋازلار قاچىلانغان لىنتا ئۇ چاغدا تېپىلماي، ئەمدى تېپىلىدۇ. بۇ ئىشلار ئامېرىكىنىڭ «NASA نىڭ چۈشەندۈرۈلمىگەن ھۆججەتلىرى» دېگەن تېلېۋىزور پروگراممىسىدا 2-ئاينىڭ 23-كۈنى كەچتە بېرىلگەن.
قىسقىسى، بۇ ئىش ئاشۇنداق بىر ھېكايىدەك ئىش بولۇپ، NASA بۇ ئىشقا قارىتا ھازىرغىچە ھېچ قانداق پوزىتسىيە بىلدۈرمىگەن.
