تەيۋەن تاراتقۇلىرىنىڭ خەۋىرىگە قارىغاندا، تەيۋەندىكى يانفون زاپچاسلىرىنى تەمىنلىگۈچى كارخانىلارنىڭ ئاشكارىلىشىچە، ياۋروپا ۋە باشقا يېڭىدىن گۈللىنىۋاتقان رايونلاردىكى تەرەققىياتى تېز بولغانلىقتىن شۇنداقلا ماركا ئوبرازى كۈنسېرى ياخشىلىنىۋاتقانلىقتىن، خۇاۋېي ماركىسىدىكى ئەقلىي ئىقتىدارلىق يانفونلارنىڭ 2016-يىلىدىكى مال چىقىرىش مىقدارى تەخمىنەن 120 مىليونغا يېتىشى مۇمكىن ئىكەن.

    2015-يىلى، خۇاۋېي يانفونلىرىنىڭ يەرشارى مىقياسىدىكى ئومومىي مال چىقىرىش مىقدارى 108 مىليونغا يېتىپ، ئۇنىڭ ئالدىنقى يىلىدىكى 75 مىليوندىن %44 ئاشقان. شۇنىڭ بىلەن، خۇاۋېي سامسۇڭ ۋە ئالما قاتارلىقلاردىن قالسا دۇنيا بويىچە 3-ئورۇندا تۇرىدىغان چوڭ ئەقلىي ئىقتىدارلىق يانفون كارخانىسىغا ئايلانغان. 2016-يىلى، خۇاۋېي شىركىتى ئۆز بايرىقى ئاستىدىكى Mate ۋە P تۈرىدىكى يۇقىرى سەپلىمىلىك مەھسۇلاتلىرىنى نۇقتىلىق ھالدا تەرەققىي قىلدۇرىدىكەن. ئۇچۇردا دېيىلىشىچە، خۇاۋېينىڭ بۇ ئىككى تۈردىكى يانفونلىرىنىڭ سېتىلىش مىقدارى ئىزچىل ياخشى بولۇپ كەلگەن. بۇندىن باشقا، خۇاۋېي شىركىتى يەنە گۇگېل بىلەن ھەمكارلىشىپ ياساپ چىققان Nexus 6P يانفونى خۇاۋېي ماركىسىنىڭ ئوبرازىنى ياخشىلاشتا ئاكتىپ رول ئوينىغان، بولۇپمۇ ئىتالىيە، ئىسپانىيە، گوللاندىيە، گېرمانىيە ۋە پورتۇگالىيە قاتارلىقلار دۆلەتلەردە بۇنىڭ ئۈنۈمى تېخىمۇ كۆرۈنەرلىك بولغان.

  خۇاۋېي شىركىتى ئىلگىرى 2015-يىللىق ئەقلىي ئىقتىدارلىق يانفونلىرىنىڭ مال چىقىرىش مىقدارى 100 مىليوندىن ئېشىپ، شىركەتنىڭ يىللىق سېتىش نىشانىنى ئىشقا ئاشۇرغانلىقىنى، بۇنىڭ بىلەن، خۇاۋېينىڭ ئەقلىي ئىقتىدارلىق يانفونلىرىنىڭ سېتىلىش مىقدارى 100 مىليونلۇق چوڭ ئۆتكەلنى بۆسۈپ ئۆتكەن دۆلەت ئىچىدىكى تۇنجى كارخانىغا ئايلانغانلىقىنى تىلغا ئالغان. ئۆتكەن بەش يىل ئىچىدە، خۇاۋېي ماركىسىدىكى ئەقلىي ئىقتىدارلىق يانفونلارنىڭ مال چىقىرىش مىقدارى 2010-يىلىدىكى ئۈچ مىليوندىن 2015-يىلىدىكى 100 نەچچە مىليونغا يېتىپ، بەش يىلدا 30 ھەسسە ئېشىشتەك زور مۇۋەپپەقىيەتنى قولغا كەلتۈرگەن.

    ئىگەللىنىشىچە، خۇاۋېي نۆۋەتتە دۆلەت ئىچىدىكى ئەقلىي ئىقتىدارلىق يانفون بازىرىنىڭ %15 نى ئىگەللىگەن. مۆلچەرلىنىشىچە، خۇاۋېي كەلگۈسىدە HTC ۋە سونىي قاتارلىقلارنىڭ بازار ئۈلۈشىنى تارتىۋېلىپ، دۆلەت ئىچىدىكى ئەقلىي ئىقتىدارلىق يانفون بازىرىنىڭ تېخىمۇ كۆپ قىسمىنى ئىگەللەيدىكەن. ئۇندىن باشقا، خۇاۋېي نۆۋەتتە يەرشارى ئەقلىي ئىقتىدارلىق يانفون بازىرىنىڭ %9 لىك ئۈلۈشىگە ئىگە بولۇپ، دۇنيا بويىچە 3-ئورۇندا تۇرىدىغان ئەقلىيفون كارخانىسىغا ئايلانغان.

   تاراتقۇلارنىڭ خەۋىرىدە دېيىلىشىچە، خۇاۋېي شىركىتى كەلگۈسىدە چەتئەل بازىرىنى يەنىمۇ كەڭ دائىرىدە ئېچىشنى پىلانلىغان بولۇپ، خۇاۋېي Mate 8 ۋە Honor 5X قاتارلىق يانفونلار ئۇزۇنغا قالماي ئامېرىكا بازىرىغا كىرىدىكەن.