خەلقئارا لىنىيە تورى مەخسۇس خەۋىرى، نۇر تورى تەرجىمىسى: كورىيە بىرلەشمە ئاگېنتلىقىنىڭ 24-مارت خەۋەر قىلىشىچە، كورىيە زۇڭتۇڭى پاك گۆنھې، چاۋشيەن خەلق ئارمىيەسىنىڭ ئالىي قوماندانلىق شىتابى تۈنۈگۈن ئېلان قىلغان چىڭۋاتەيگە زەربە بېرىش توغرىسىدىكى باياناتىغا ئىنكاس قايتۇرۇپ، كورىيەنىڭ مەملىكەت بويىچە ئېھتىيات ھالىتىنى كۈچەيتىپ، ھەربىي تەييارلىقنى ياخشى ئىشلەپ، خەلقنىڭ بىخەتەرلىكىگە كاپالەتلىك قىلىشتا قىلچە بىپەرۋالىق قىلماسلىقنى تەلەپ قىلدى. كورىيە چىڭۋاتەي باياناتچىسى جىن چىڭيۇ، 3-ئاينىڭ 24-كۈنى ئاخبارات ئېلان قىلىش يىغىنى ئېچىپ، چىڭۋاتەينىڭ ئىزچىل تۈردە چاۋشيەننىڭ تەھدىتىگە ئۇچراش ئەھۋالىنى يەتكۈزدى. جىن چىڭيۇ مۇنداق دېدى: زۇڭتۇڭ پاك گۆنھې كورېيە ھەربىي تەرەپكە ھەربىي تەييارلىقنى ياخشى ئىشلەپ، چاۋشيەننىڭ قارىغۇلارچە «ئىغۋاگەرچىلىكى»گە ئاكتىپ تاقابىل تۇرۇش ھەققىدە يوليورۇق بەردى. شۇنىڭ بىلەن بىر ۋاقىتتا، پاك گۆنھې يەنە جىددىي ئەھۋال يۈز بېرىش مۇمكىنچىلىكىگە ئالاھىدە دىققەت قىلىشى لازىملىقىنى تەكىتلىدى. چاۋشيەن خەلق ئارمىيەسى ئالىي قوماندانلىق شىتابى 3-ئاينىڭ 6-كۈنىدىكى ئامېرىكا-كورىيە ھەربىي مانېۋىرىدىكى «كاللا كېسىش ئۇرۇشى»غا ئىنكاس قايتۇرۇپ، «چاۋشيەن تەرەپ چىڭۋاتەي ۋە باشقا سۇيقەستچى، ئەكسىيەتچى ھۆكۈمران ئورگانلارغا ئالدى بىلەن زەربە بېرىدۇ» دېگەن ئىدى.بۇنىڭغا قارىتا جىن چىڭيۇ مۇنداق دېدى: «چاۋشيەن ئالدىن تەييارلاپ قويغان مۇنتىزىم قىسىملىرى ۋە ئالاھىدە قىسىملار بىلەن ھەر ۋاقىت چىڭۋاتەي قاتارلىق مۇھىم نىشانلارغا ھۇجۇم قىلىش توغرىسىدا بېشارەت بەردى. بۇ كورىيە ۋە زۇڭتۇڭ پاك گۆنھېگە قارىتىلغان ئىغۋاگەرچىلىك، شۇنداقلا پۈتۈن دۇنياغا قارىتىلغان خىرىس».