يېقىندا ئاخبارات ۋاسىتىلىرىدا خېنەن ئۆلكىسى كەيفىڭ شەھىرى تۇڭشۈ ناھىيەسى سۈنيىڭ يېزىسى جۇشىگاڭ كەنتىدە، يەرلىك كەنت ئاھالىلىرى مەبلەغ توپلاپ، ماۋ زېدۇڭنىڭ 36 مېتىر ئېگىزلىكتىكى ئالتۇن رەڭلىك غايەت زور ھەيكىلىنى ياسىغانلىقى خەۋەر قىلىنغان بولۇپ، جەمئىيەتنىڭ دىققىتىنى قوزغىغان ئىدى. بۇنىڭغا نىسبەتەن يەرلىك ھۆكۈمەت ئورۇنلىرى: «بۇ ھەيكەل رويخەتكە ئېلىنمىغان ھەم تەكشۈرۈپ تەستىقلانمىغان» دېگەن، ھازىر بۇ ھەيكەل ئاللىبۇرۇن چېقىۋېتىلگەن.    خەۋەر قىلىنىشىچە، ماۋ زېدۇڭنىڭ بۇ غايەت زور ھەيكىلى توڭشۈ ناھىيەسى سۈنيىڭ يېزىسى جۇشىگاڭ كەنتىنىڭ غەربىي شىمال بۈرجىكىگە جايلاشقان. ھەيكەل شىمالدىن جەنۇبقا يۆنىلىشتە ئولتۇرغۇزۇلغان بولۇپ، پولات چىۋىق ۋە بېتوندىن ياسالغان. سىرتقى يۈزى ئالتۇن رەڭلىك سىرلانغان ئىكەن. ھەيكەلنىڭ لايىھەدىكى ئېگىزلىكى 36.6 مېتىر بولۇپ، بىر نەچچە نەپەر كارخانىچى مەبلەغ سېلىپ ياساتقانكەن. بۇنىڭ ئىچىدە بىرقىسىم مەبلەغنى كەنتتىكى ئاھالىلەر ئىئانە قىلغان بولۇپ، ئىئانە قىلغان پۇل نەچچە ئون مىڭ يۈەنگە يېتىدىكەن، ھەيكەلنىڭ ئومۇمىي پۈتۈش قىممىتى ئۈچ مىليون يۈەنگە يېقىن بولغان.

      1-ئاينىڭ 7–كۈنى، مۇخبىر ھەيكەلنى ياساش ئىشى توغرىسىدا توڭشۈ ناھىيەسى سۈنيىڭ يېزىلىق ھۆكۈمەتكە تېلېفون قىلغان. يېزىلىق  ھۆكۈمەت ئىشخانىسىدىكى لى فامىلىلىك خىزمەتچىنىڭ دېيىشىچە: «بۇ ھەيكەل ياسالغان ئورۇن مەزكۇر كەنتنىڭ نىسبەتەن چېتىدىكى ئۈنۈمسىز يەر، تېرىلغۇ يەر ئەمەس. بۇ ھەيكەلنى جۇشىگاڭ كەنتىدىكى بىر قىسىم كارخانىچىلار ۋە كەنت ئاھالىلىرى مەبلەغ سېلىپ ياسىغان بولۇپ، ھېچقانداق تەكشۈرۈپ تەستىقلاش باسقۇچىدىن ئۆتمىگەن».  

       يېزىدا ھەيكەل ياسىسا شەھەردىكىگە ئوخشاش، مەدەنىيەت باشقۇرۇش تارماقلىرىنىڭ تەكشۈرۈشىدىن ئۆتۈشى كېرەكمۇ؟ بۇنىڭغا قارىتا توڭشۈ ناھىيەلىك مەدەنىيەت ئىدارىسىدىكى خىزمەتچى خادىم: «جۇشىگاڭ كەنتىدىكى ھەيكەل ياسالغان ئورۇن ساياھەت ياكى مەدەنىيەت رايونى ئەمەس، ھەيكەلنىڭ ياسىلىشى ئۈچۈن مەدەنىيەت ئورۇنلىرىغا دوكلات قىلىپ، تەستىقلاتمىسىمۇ بولىدۇ» دېگەن. شۇ يەرلىك باغ-ئورمان تارماقلىرىمۇ: «بىز پەقەت شەھەر-بازارلاردىكى ھەيكەللەرنى باشقۇرۇشقا مەسئۇل، يېزىدىكىنى باشقۇرمايمىز» دېگەن.    

      1-ئاينىڭ 8 –كۈنى، توڭشۈ ناھىيەلىك دۆلەت زېمىن بايلىقى ئىدارىسىدىكى خىزمەتچى خادىم خەلق تورى مۇخبىرىغا: «بۇ ھەيكەل ناھىيەلىك مەمۇرىي تەپتىش چوڭ ئەترىتى تەرىپىدىن چېقىۋېتىلدى، لېكىن نېمە سەۋەبتىن چېقىۋېتىلدى، ئۇلارمۇ ئېنىق بىلمەيدۇ» دېگەن.