جۇڭگو خەۋەر تورىنىڭ 3-ئاينىڭ 24-كۈنىدىكى خەۋىرى، نۇر تورى تەرجىمىسى: ئامېرىكا «ۋاشىنگىتون كۈندىلىك پوچتا گېزىتى» نىڭ 24-چېسلا خەۋەر قىلىشىچە، سۈرىيەنىڭ تۇنجى تۈركۈمدىكى مېۋە-چېۋىلىرى ۋە سەي-كۆكتاتلىرى رۇسىيە بازىرىغا كىرىشكە باشلىدى، بۇ ماللار رۇسىيە تەرىپىدىن چەكلەنگەن تۈركىيە ماللىرىنىڭ ئورنىنى ئالدى. ئادىيگېيا يۇرەك شىركىتى ("Adygeya - Yurak" company) نىڭ باش دېرىكتورى ئاسلان پانېشېن (Aslan Pa Nieshen) مۇنداق دېدى، ئىككىنچى تۈركۈمدىكى ئاپلىسىن، لىمون، ئۈزۈم، پەمىدۇر ۋە يېسىۋىلەك قاتارلىق ماللار ئالدىنقى ھەپتە نوۋوروسسىيسىك پورتى (Novorossiysk Port) غا يەتكۈزۈلدى، بۇ ماللارنىڭ ئومۇمىي ئېغىرلىقى جەمئىي 3000 توننا.

ئاسلان پانېشېن يەنە مۇنداق دېدى، تۇنجى تۈركۈمدىكى ماللارنىڭ يەتكۈزىلىش ۋاقتىدا مەسىلە كۆرۈلگەن، يەنى تاموژنا ماتېرىيالى توغرا بولمىغاچقا، تەخمىنەن 1200 توننىغا يېقىن مال پورتتا تۇرۇپ قالدى، شۇنىڭ بىلەن سۈپىتى ئۆزگىرىپ ئىستىمال قىلىشقا بولمايدىغان ھالغا كېلىپ قالدى. ئىككىنچى تۈركۈمدىكى ماللار چۈشۈرۈلۈش ۋاقتى بىر تەرەپ قىلىنىپ بولدى، پورتقا كىرگەن مېۋە-چېۋىلەرگە مۇناسىۋەتلىك تەرتىپلەر ئىككى كېچىدىلا بېجىرىلىپ بولدى. ئىگىلىنىشىچە، سۈرىيەنىڭ مىۋە-چىۋىلىرى موسكىۋا يېمەك-ئىچمەك بازىرىدا توپ ۋە پارچە تارقىتىلىشقا باشلىغان بولۇپ، بازارنىڭ خېلى كۆپ قىسمىنى ئىگىلىدى. روسىيە 2016-يىلى 1-ئاينىڭ 1-كۈنىدىن باشلاپ تۈركىيەدىن ئاپلىسىن، ئالما، پەمىدۇر، باش پىياز قاتارلىقلارنى ئىمپورت قىلىشنى توختاتقان. ئۇندىن باشقا يەنە ئۆيدە بېقىلغان توخۇ ۋە مۇناسىۋەتلىك ماللار، تۇز قاتارلىقلارمۇ چەكلەنگەن ئىدى.