بۇلتۇر يىل ئاخىرى، Mozilla شىركىتى Firefox OS سىستېمىسى قاچىلانغان يانفونلىرىنى سېتىشنى توختىتىدىغانلىقىنى جاكارلىغان. ئەينى ۋاقىتتا، كەسپى ساھەدىكىلەر Firefox OS مەشغۇلات سىستېمىسىنىڭ ئۆمرى ئاخىرلىشىش گردابىغا بېرىپ قالغانلىقىنى قىياس قىلغان.

بىراق كەينىدىنلا، ئىسپانىيەدىكى Hipertextual ناملىق بىر تېخنىكا بىلوگىدا Mozilla نىڭ Firefox OS سىستېمىسى ئىشلىتىلگەن تاختا كومپيۇتېر مەھسۇلاتىنى ئوتتۇرىغا چىقىرىشنى پىلانلىغانلىقىنى ئاشكارىلىغان، ئۇچۇردا تاختا كومپيۇتېردىن باشقا، Firefox OS سىستېمىسىنى يەنە تېلېۋىزور قۇتىسى، روتېر ۋە Firefox Pi نامىدىكى كۇنۇپكا تاختىلىق كومپيۇتېر (a keyboard computer) قاتارلىق باشقا تۈردىكى ئۈسكۈنىلەرگىمۇ ئىشلەتمەكچى بولغانلىقى تىلغا ئېلىنغان.

       Mozilla تەرەپمۇ بۇ ئۇچۇرنىڭ راستلىقىنى دەلىللىگەن. Mozilla نىڭ قانۇن ۋە سودا ئىشلىرى مەسلىھەتچىسى Denelle Dixon-Thayer توردا ئاشكارىلانغان ماتىرىيال شىركەتتىكى بىر نەپەر پروگراممېرنىڭ دەسلەپكى مەزگىللەردىكى ئۇقۇم خاراكتېرلىك ئەسىرى ئىكەنلىكىنى بىلدۈرۈپ مۇنداق دېگەن:

«بىزنىڭ Mozilla دىكى خىزمىتىمىز سىر تۇتۇلمايدۇ، بىز ھىلىھەم يېڭى مەھسۇلات ئۈستىدە ئىزدىنىش ۋە پىلانلاش باسقۇچىدا تۇرۇۋاتىمىز، بىز ئىنتېرنېتقا ئۇلىنىدىغان ئۈسكۈنىلەر دۇنياسىدىن Firefox OS گە ماس كېلىدىغان يېڭى يۆنىلىش ئىزدەۋاتىمىز، ۋاقتى كەلگەندە ئۇنى ئوچۇق كودلۇق تۈر ئارقىلىق كۆپچىلىككە سۇنىمىز.»

      بۇ ئۇچۇرلاردىن قارىغاندا، Mozilla نىڭ Firefox OS دىن ۋاز كېچىش خىيالى يوقتەك قىلىدۇ. ئەمما ئويلىمىغان يەردىن چىققىنى، يىقىندا بۇ شىركەت ئەپ ئاچقۇچىلارغا يوللىغان بىر تۈرلۈك ئېلخەتتە كۆرسىتىلىشىچە، 2.6 نەشىرىدىن كىيىن، Firefox OS نىڭ يانفون نۇسخىسىنى داۋاملىق ئېچىشنى توختىتىدىكەن. ئېلخەتتە يەنە Mozilla نىڭ يېڭى مەھسۇلاتنى سىناق قىلىشنى باشلىغانلىقىمۇ تىلغا ئېلىنغان. ئەمما بۇنىڭ يېڭى تۈردىكى مەھسۇلاتنى Firefox OS نىڭ يانفون نۇسخىسىنىڭ ئورنىغا دەسسەتمەكچى ئىكەنلىكىدىن دېرەك بېرىدىغان-بەرمەيدىغانلىقى ئېنىق ئەمەس.

      Mozilla نىڭ بىلدۈرۈشىچە، ئۇلار يانفون نۇسخىسىدىكى Firefox OS سىستېمىسىنى قوللاش مۇلازىمىتىنى بۇ يىل 5-ئايغىچە داۋاملاشتۇرىدىكەن، ئارقىدىن بۇنىڭغا مەسئۇل تەتقىقات گۇرۇپپىسىنى باشقا تۈرگە قوشۇۋېتىدىكەن.

Mozilla نىڭ بۇ قارارى نۇرغۇنلىغان Firefox OS مەستانىلىرى ۋە ئەپ ئاچقۇچىلىرىنى قاتتىق ئۈمىدسىزلەندۈرۈپ قويغان. ئۇنداقتا، Mozilla نېمە ئۈچۈن Firefox OS دىن ۋاز كەچمەكچى بولۇپ قالدى؟ Mozilla بۇنىڭ سەۋەبىنى چۈشەندۈرگەندە مۇنداق دېگەن: «بۇنىڭ ھەممىسى شىركەتنىڭ ئادەم ۋە مالىيە كۈچىنى باشقا تۈردىكى ئىنتېرنېت ۋە تورغا ئۇلىنالايدىغان مەھسۇلات ئۈستىگە مەركەزلەشتۈرۈش ئۈچۈن.»