ئەنگلىيە ‹‹كۈندىلىك پوچتا گېزىتى›› نىڭ خەۋەر قىلىشىچە، كۆچمە تور مۇلازىمەت ئانالىز شىركىتى ‹‹ئوچۇق سىگنال›› (OpenSignal) يېقىندا پۈتۈن يەر شارى كۆچمە تور دوكلاتىنى ئېلان قىلغان. دوكلاتتا كۆرسىتىلىشىچە، جۇڭگونىڭ LTE تورىنىڭ قاپلىنىش نىسبىتى %77 كە، سۈرئىتى 14Mbps قا يەتكەن. يالغۇز سۈرئەت جەھەتتىن ئالغاندا، جۇڭگونىڭ تور سۈرئىتى ئامېرىكىدىن تېز بولغان. 

     LTE تورىنىڭ سۈرئىتى جەھەتتە، جۇڭگو 14Mbps لىق سۈرئەت بىلەن پۈتۈن يەر شارىدا 31-ئورۇندا تۇرۇپ، ياپونىيە (12Mbps)،      رۇسىيە (14Mbps)، ئامېرىكا (10Mbps) قاتارلىق دۆلەتلەرنىڭ ئالدىدا تۇرغان. 

    دۇنيا بويىچە LTE تور سۈرئىتى ئەڭ تېز بولغان ئۈچ دۆلەت ئايرىم-ئايرىم ھالدا سىنگاپور (37Mbps)، يېڭى زېلاندىيە (29Mbps) ۋە ۋېنگىرىيە (28Mbps) بولغان. تور سۈرئىتى ئەڭ ئاستا بولغان ئۈچ دۆلەت بولسا كوستارىكا، سەئۇدى ئەرەبىستان ۋە ئىران بولۇپ، تور سۈرئىتى پەقەت 3Mbps بولغان. 

    ‹‹ئوچۇق سىگنال›› ئېلان قىلغان دوكلاتتا كۆرسىتىلىشىچە، LTE تورىنىڭ تۇنجى قېتىم پەيدا بولۇشى بۇندىن ئالتە يىل بۇرۇنقى ئىش بولسىمۇ، بىراق بۇ خىل تېخنىكىنىڭ تەرەققىياتى ئىنتايىن تېز بولۇپ، كىشىلەرگە ئىزچىل كۈتمىگەن خۇشاللىقلارنى ئېلىپ كەلگەن. پۈتۈن دۇنيادىكى مۇلازىمەت سودىگەرلىرى LTE تورىنىڭ سۈرئىتىنى يۇقىرى كۆتۈرۈش ھەمدە قاپلاش دائىرىسىنى كېڭەيتىش ئۈستىدە ئىزدەنمەكتە ئىكەن. 

تور سۈرئىتى بىلەن تور قاپلاش نىسبىتى ئىككىسى ئىككى ئىش بولۇپ، جۇڭگونىڭ LTE تور قاپلاش نىسبىتى %77 كە يېتىپ، پۈتۈن دۇنيادا 16-ئورۇندا تۇرغان. ھازىرغا قەدەر، پۈتۈن دۇنيادا پەقەت سەككىز دۆلەتنىڭ LTE تور قاپلاش نىسبىتى %80 تىن ئاشقان. بۇنىڭ ئىچىدە، كورېيەنىڭ %97، ياپونىيەنىڭ %90 بولۇپ، ئالدىنقى بىرىنچى ۋە ئىككىنچى ئورۇندا تۇرغان. ئامېرىكىنىڭ تور قاپلاش نىسبىتى %81 بولۇپ، 7-ئورۇندا تۇرغان. 

‹‹ئوچۇق سىگنال›› شىركىتى پۈتۈن دۇنيادىكى يانفون تور مۇلازىمەت سودىگەرلىرىنىڭ تور قاپلاش نىسبىتى ۋە تور سۈرئىتىنى ئانالىز قىلىدىغان شىركەت بولۇپ، يانفون ئەپ دېتالى ئارقىلىق پۈتۈن دۇنيادىكى 360 مىڭ ئابۇنىتنىڭ سانلىق مەلۇماتىنى يىغىش ئارقىلىق بۇ قېتىمقى دوكلاتنى يېزىپ چىققان. 

دوكلاتتا ئېيتىلىشىچە، بىر قىسىم دۆلەتلەر، مەسىلەن: كورېيە ۋە سىنگاپور، تېخنىكا ۋە مۇقىملىق جەھەتتىن ناھايىتى ئىلغار بولغان تور قۇرۇپ چىققان، باشقا دۆلەتلەر بولسا پەقەت يولنىڭ يېرىمىنى ماڭغان. چوڭ دۆلەتلەر ئىچىدە، پەقەت ئامېرىكا ۋە ياپونىيەلا چوڭ كۆلەملىك 4G ئاساسى ئەسلىھە قۇرۇلۇشىنى غەلىبىلىك ئېلىپ بارغان، باشقا دۆلەتلەر بولسا ئۇنداق قىلالمىغان. بىراق سۈرئەت جەھەتتە، دۇنيادىكى باشقا 4G مۇلازىمىتى بىلەن سېلىشتۇرغاندا، ئامېرىكا ۋە ياپونىيەنىڭ LTE تورىنىڭ سۈرئىتى نىسبەتەن ئارقىدا قالغان.