شىنجاڭ مەركىزى شەھەر گېزىتى 21- مارت خەۋىرى: باغداش تورىدىن: ئابلىمىت تەرجىمىسى

مۇخبىرنىڭ 3- ئاينىڭ 18- كۈنى ئۈرۈمچى شەھىرى سايباغ رايونلۇق تارماق ساقچى ئىدارىسىدىن ئىگىلىشىچە، ئۇلار يېقىندا بىر قېتىملىق زور زەھەر يۆتكەش دېلوسىنى پاش قىلىپ، جىنايەت گۇماندارلىرىنى نەق مەيداندا قولغا ئالغان ۋە ئۇلارنىڭ ئاپتوموبىلىدىن 20 كىلوگرامدىن ئارتۇق مۇزسىمان زەھەرنى تاپقان. نۆۋەتتە جىنايەت گۇماندارى جاڭX قاتارلىقلار جىنايى ئىشلار بۇيىچە تۇتۇپ تۇرۇلىۋېتىپتۇ.

بۇ يىل 2- ئايدا ئۈرۈمچى شەھىرى سايباغ رايونلۇق تارماق ساقچىخانىسى زەھەر چەكلەش باش ئەترىتى گۇاڭجۇلۇق جاڭX نىڭ دائىم گۇاڭجۇ بىلەن ئۈرۈمچى ئارىلىقىدا قاتراپ يۈرۈپ، ھاۋالىلىك يۈك توشۇش شەكلى ئارقىلىق شىنجاڭغا زەھەر يۆتكەيدىغانلىقى توغرىسىدىكى مۇھىم يىپ ئۇچىغا ئېرىشكەن. زەھەر چەكلەش ئەترىتى دەرھال تارماق ئەترەت رەھبەرلىرىگە ئەھۋالنى دوكلات قىلغان ھەمدە ئۈرۈمچى شەھەرلىك جامائەت خەۋپسىزلىك ئىدارىسىدىكى مۇناسىۋەتلىك تارماقلار بىلەن بىرلىكتە جاڭXنىڭ ئىزىغا چۈشكەن.

2- ئاينىڭ ئاخىرىدا جاڭX ھالۋالىلىك يۈك توشۇش شىركىتى ئارقىلىق يەنە بىر قېتىم گۇڭجۇدىن ئۈرۈمچىگە مال ئەكەلتۈرگەن، 3- ئاينىڭ 3- كۈنى ئۇنىڭ مېلى ئۈرۈمچى شەھىرى تەڭرىتاغ رايونىدىكى بىر ھاۋالىلىك يۈك توشۇش ئورنىغا كەلگەن، سايباغ رايونلۇق جامائەت خەۋپسىزلىك ئىدارىسى يىلاننى چۆچۈتىۋەتمەستىن دەرھال مەخسۇس دېلو گۇرۇپپىسى تەشكىللەپ، سەرخىل ساقچى كۈچىنى ئاجرىتىپ، ئۈرۈمچى شەھەرلىك جامائەت خەۋپسىزلىك ئىدارىسىدىكى مۇناسىۋەتلىك تارماقلارنىڭ ماسلىشىشى ئاستىدا تورنى كەڭ يايغان ھەمدە جاڭX ھاۋالىلىك يۈك توشۇش ئورنىغا كېلىپ مالنى ئېلىپ ماشىنىسىغا سالغان ھامان ئۇنى قانۇن تورىغا چۈشۈرگەن، ھەمدە ئۇنىڭ ماشىنسىدىن ئۈچ خالتىغا قاچىلانغان 20.0765 كىلوگرام مۇزسىمان زەھەرنى تاپقان.