20-مارت سائەت 14:34 مىنۇت ئۆتكەندە، يۈننەن ئۆلكىسىنىڭ يۈشىدىكى شىنپىڭ چوڭ ئەترىتى، شىنپىڭ ناھىيەلىك دوختۇرخانا ئامبۇلاتورىيەسىنىڭ 3-قەۋەتتىكى ئاياللار ھاجەتخانىسى ئىچىدە كىچىك بوۋاقنىڭ يىغا ئاۋازى ئاڭلانغانلىقى، ھەمدە سۇ چۈشۈرۈش تۇرۇبا يولىغا بىر بوۋاقنىڭ قاپسىلىپ قالغانلىقى توغرىسىدىكى تېلېفوننى تاپشۇرۇپ ئالغان. ئەھۋالدىن خەۋەر تاپقاندىن كېيىن، شىنپىڭ ئوت ئۆچۈرۈش ئەترىتى دەرھال بىر ماشىنا، يەتتە ئادەمنى نەق مەيدانغا ئەۋەتكەن. نەق مەيداننى تەكشۈرۈش ئارقىلىق، تازىلىق ئۆيى يەر يۈزىنىڭ ھەممە يېرىدە قان ئىزى بارلىقىنى بايقىغان، بۇ يېڭى تۇغۇلغان بوۋاق تار ئەۋرەز يولىدا قىسىلىپ قالغان بولۇپ، بوۋاقنىڭ يىغا ئاۋازى ئۈزلۈكسز داۋاملاشقان. ئەھۋالنى ئىگىلىگەندىن كېيىن، كوماندىر دەرھال بۇيرۇقى چۈشۈرۈپ، ئالدى بىلەن ھاجەتخانا يەر ئاستى تۇرۇبا يولى ئىچىدىكى ھاۋا ئېقىشىغا پايدىلىق بولۇشى ئۈچۈن، بولقا، پالتا قاتارلىقلار بىلەن ئوڭ-سول ئىككى تەرەپتىكى تەرەت كۆلچىكىنى چاققان. يورۇتۇش گۇرۇپپىسى يورۇتۇش ئەسۋابىنى ئېچىپ، قۇتقۇزۇش نەق مەيداننى يورۇتۇشقا كاپالەتلىك قىلغان؛ تارقاقلاشتۇرۇشقا يول باشلاش گۇرۇپپىسى، قاتناش ساقچىلىرىغا ماسلىشىپ نەق مەيدان تەرتىپىنى ئوبدان قوغدىغان؛ باشقىلارنىڭ ھاجەتخانىنى ئىشلىتىپ، سۇ چۈشۈرۈشىنىڭ ئالدىنى ئېلىش ئۈچۈن، ھاجەتخانىنىڭ سۇ كلاپانىنى تاقىۋەتكەن. ئارقىدىنلا، ئوت ئۆچۈرۈش خادىملىرى قەغەز قىسقۇچ تېپىپ كېلىپ، كۈچىنىڭ بارىچە تەرەت كۆلچىكى ئېغىزى ئەتراپىغا يېقىنلاشقان. داۋالاش خادىملىرىنىڭ يېتەكچىلىكىدە، كېرەكسىز قەغەزلەرنى ئاستا-ئاستا قىسىپ ئېلىپ، بوۋاقنىڭ نەپەسلىنىشى ئۈچۈن تېخىمۇ كۆپ بوشلۇق يارىتىپ بەرگەن، ھەمدە ئوكسىگېن تۇڭى تەييارلاپ، بوۋاقنى ھەر ۋاقىت ساپ ئوكسىگېن بىلەن تەمىنلەشكە تەييار بولۇپ تۇرغان. بوۋاق تۇرۇبا ئىچىدە قاپسىلىپ قالغان بولۇپ، بىۋاسىتە تۇرۇبىنى يېرىپ ئالغاندا، 2-قېتىم زەخمىلىنىش كېلىپ چىقىشى مۇمكىن ئىكەن. بۇ ۋاقىتتا، بوۋاقنىڭ يىغا ئاۋازى بارغانسېرى تېزلەشكەن بولۇپ، ھەر بىر قېتىملىق يىغا ئاۋازى قۇتقۇزۇش خادىملىرىنىڭ يۈرىكىنى جىغىلداتقان.

تىببىي خادىملارنىڭ زىچ ماسلىشىشى ئارقىسىدا، ئەۋرەز يولىدا قاپسىلىپ قالغان بوۋاق ئاستا-ئاستا تارتىپ چىقىرىلغان. ئۈچ سائەتتىن ئارتۇق جىددىي قۇتقۇزۇش ئارقىلىق، بوۋاق ئاخىرى مۇۋەپپەقىيەتلىك قۇتقۇزۇۋېلىنغان، ئارقىدىنلا دوختۇرلار دەرھال قۇتقۇزۇش ئېلىپ بارغان. شۇندىلا، نەق مەيداندىكى قۇتقۇزۇش خادىملىرى چوڭقۇر بىر نەپەس ئالغان. شۇنىڭ بىلەن، پۈتكۈل قۇتقۇزۇش خىزمىتى تولۇق ئاياغلاشقان.