جۇڭگو ئاخبارات تورىنىڭ 24-مارت خەۋىرى: باغداش تورىدىن لوقمان تەرجىمىسى

ئامېرىكا بىرلەشمە ئاگنتلىقىنىڭ 24-مارتتىكى خەۋىرىگە، شۇنداقلا ياۋروپا، ئوتتۇرا شەرقتىكى ھەر قايسى دۆلەتلەردىن كەلگەن ئاخبارات خادىملىرى ۋە ئەمەلدارلارنىڭ خەۋىرىگە ئاساسلانغاندا، رادىكال تەشكىلات «ئىسلام دۆلىتى» 400دىن 600غىچە جەڭچىنى مەشىقلەندۈرگەن بولۇپ، ياۋروپادا توختىماستىن تېررورلۇق ھۇجۇمى قوزغاشقا ئۇرۇنغان.

خەۋەردە دېيىلىشىچە، «ئىسلام دۆلىتى» نۆۋەتتە سۇرىيە ۋە ئىراقتا ئارقا-ئارقىدىن مەغلۇب بولغان بولسىمۇ، ئەمما ئۇلارنىڭ مەشىقلەندۈرۈلگەن ئەسكەرلىرى ياۋروپاغا تارقىلىپ بولغان.

ياۋروپادىكى ئامانلىق ساقلاش خادىمىنىڭ بىلدۈرۈشىچە، فرانسىيە، بېلگىيە، شىمالىي ئافرىقا بىلەن باغلىنىشلىق بولۇپ، فرانسۇز تىلىدا سۆزلىشەلەيدىغانلار مەزكۇر رادىكال تەشكىلاتنىڭ ئەزا تورىغا مەسئۇل بولغان ھەمدە ياۋروپادا ھۇجۇم قوزغاش ئىستراتىگىيەسىنى تەتقىق قىلغان. تور ئەزالىرى ئىراق، سۇرىيە، بېلگىيە ۋە شىمالىي ئافرىقا رايونلىرىدا مەشىقلەنگەن، بۇلارنىڭ مەشىقى ئۇرۇش مەيدانى ئىستراتىگىيەسى، بومبا، نازارەت قىلىش ۋە نازارەت قىلىشقا قارشى تۇرۇش قاتارلىق مەزمۇنلارنى ئۆز ئىچىگە ئالدىكەن.

رېيتېر ئاگېنتلىقى خادىمىنىڭ بىلدۈرۈشىچە، 2014-يىلى «ئىسلام دۆلىتى»نىڭ بىر قىسىم ئەسكەرلىرى پەقەت بىر قانچە ھەپتىلا مەشىق قىلغان. ئەمما ھازىر رادىكال تەشكىلاتنىڭ تاكتىكىسى ئۆزگىرىپ، ئالاھىدە قىسىم تەسىس قىلغان ۋە مەشىق ۋاقتىنى ئۇزارتقان. ئۇلارنىڭ مەقسىدى ئىمكانىيەتنىڭ بارىچە تېخىمۇ كۆپ ئادەمنى ئۆلتۈرۈش ۋە يارىلاندۇرۇش بولماستىن، بەلكى ئىمكانىيەتنىڭ بارىچە تېررورلۇق ھۇجۇمى قوزغاش، «دۈشمەن»نى تېخىمۇ كۆپ ئادەم كۈچى ۋە ماددىي كۈچ چىقىرىشقا مەجبۇرلاش ئىكەن.

ئىراقتىكى نوپۇزلۇق ئاخبارات خادىمىنىڭ بىلدۈرۈشىچە، پارىژدىكى تېررورلۇق ھۇجۇمى قوزغىغان رادىكال تەشكىلات گورۇپپىسى ئەنگلىيە، گېرمانىيە، ئىتالىيە، دانىيە، شۋېتسىيە قاتارلىق نۇرغۇن دۆلەتلەرگە تارقالغان. نۆۋەتتە ئاخبارات خادىمى ۋە بىخەتەرلىك ئەمەلدارى زادى قانچىلىك ئادەمنىڭ مەشىق قىلىۋاتقانلىقى ۋە ھۇجۇم قوزغاشقا تەييارلىنىۋاتقانلىقىغا كۆڭۈل بۆلۈۋاتىدۇ.