جۇڭگو خەۋەر تورىنىڭ 3-ئاينىڭ 24-كۈنىدىكى خەۋىرى، نۇر تورى تەرجىمىسى:ئامېرىكا «ۋاشىنگىتون كۈندىلىك پوچتا گېزىتى» نىڭ 24-چېسلا خەۋەر قىلىشىچە، ئامېرىكا زۇڭتۇڭى ئوباما شۇ جاي ۋاقتى 23-چېسلا ئارگىنتىنانى زىيارەت قىلىش مەزگىلىدە مۇنۇلارنى بىلدۈردى، «ئىسلام دۆلىتى» گە زەربە بېرىش، تېررورلۇقنى تۈپتىن يوقۇتۇش ھازىرقى ئەڭ ئاۋۋالقى بىرىنچى ۋەزىپە، بىراق جۇمھۇرىيەتچىلەر پارتىيىسى ئەزالىرى پۈتۈن ئامېرىكىدىكى مۇسۇلمانلار مەھەللىسىنى نازارەت قىلىشنى ئوتتۇرىغا قويدى، مېنىڭچە بۇ ئۇسۇل دەل ئەكسىچە ئۈنۈم بېرىپ قويۇشى مۇمكىن.ئوباما شۇ كۈنى بوينىس-ئايرىس شەھىرىدە ئارگېنتىنا زۇڭتۇڭى مائۇرىسىيو ماكرى (Mauricio Macr) بىلەن كۆرۈشتى ۋە بىرلىكتە مۇخبىرلارنى كۈتىۋېلىش يىغىنى چاقىرىپ، ئامېرىكىلىق مۇخبىرنىڭ بىريۇسسىل تېررولۇق ۋەقەسى ۋە ھازىرقى تېررورلۇققا قارشى تۇرۇش ئىستىراتىگىيىسى توغرىلىق سورىغان سوئالىغا يۇقىرقىدەك جاۋاب بەردى. ئوباما يەنە مۇنداق دېدى، پۈتۈن دۇنيا ئەھلى چوقۇم ئىتتىپاقلىشىشى، بىرلىشىپ تېررورلۇققا قارشى تۇرۇشى كېرەك ئىدى. ئامېرىكا «ئىسلام دۆلىتى» گە داۋاملىق زەربە بېرىدۇ، بۇ جەھەتتە يەنە باشقا دۆلەتلەر بىلەن ھەمكارلىشىدۇ، بىز تېررورلۇق ۋەقەسىنىڭ ياۋروپا ۋە ئامېرىكا رايونىدا قايتا يۈز بېرىشىنىڭ ئالدىنى ئېلىشقا تىرىشىمىز، بىراق بۇ جايدىكى قىيىن مەسىلە ئۆلۈۋېلىش خاراكتىرلىك تېررورلۇق بومبا ھۇجۇمى قوزغىغۇچىلارنى ئالدىن تېپىپ چىقىش بولىۋاتىدۇ.

بىريۇسسىل تېررورلۇق ۋەقەسى يۈز بەرگەندىن كېيىن، ئامېرىكا جۇمھۇرىيەتچىلەر پارتىيىسىنىڭ بىر قىسىم ئەزالىرى ئاشكارا ھالدا ئوبامانىڭ «ئىسلام دۆلىتى» گە زەربە بېرىش سىياسىتىدىن گۇمانلىنىدىغانلىقىنى بىلدۈرۈشكە باشلىدى. جۇمھۇرىيەتچىلەر پارتىيىسىنىڭ 2016-يىللىق زۇڭتۇڭ نامزاتى، تېكساس شىتاتلىق فېدىراتىپ پارلامېنت ئەزاسى كىرۇز (Cruz) مۇنداق دېدى، بېلگىيەدىكى بىر قىسىم مۇسۇلمان مەھەللىلىرى تېررورلۇق شەكىللىنىدىغان ئۇۋا بولۇپ قالدى، بۇنداق ئەھۋال ئامېرىكىدىمۇ مەۋجۇت، شۇڭلاشقا بىز پۈتۈن ئامېرىكىدىكى مۇسۇلمان مەھەللىسىنى نازارەت قىلىش ئارقىلىق تېررورلۇققا قارشى تۇرۇش نىشانىنى ئەمەلگە ئاشۇرىشىمىز كېرەك.

مۇخبىر ئوبامادىن بۇ مەسىلە توغرىسىدا سوئال سورىغاندا، ئوباما يەنە مۇنداق دېدى، بۇنداق قىلىش خاتا ھەم ھېچ قانداق ئەھمىيىتى يوق، ئۇنداق قىلغاندا مەقسەتتىن ئەكسىچە ئۈنۈم بېرىپ قويىدۇ. ئامېرىكىدا كۆپ تېررورلۇق ۋەقەسى يۈز بەرمەسلىكىنىڭ سەۋەبى شۇكى، بىر قىسىم مۇسۇلمانلار ۋەتەننى سۆيىدۇ ھەم ۋەتەنداشلار بىلەن ئىتتىپاقلىشىدۇ، شۇڭلاشقا ئۇلارنى چەتتە قالدۇرۇپ قويۇشقا بولمايدۇ.

كىرۇز يەنە ئىراق ۋە سۈرىيەگە كەڭ كۆلەملىك بومباردىمان قىلىش ئارقىلىق «ئىسلام دۆلىتى» گە زەربە بېرىش تەدبىرىنى ئوتتۇرىغا چىقاردى، ئوباما بۇنىمۇ رەت قىلىپ مۇنداق دېدى، بۇنداق قىلىش ئىنسانپەۋرەرلىككە ياتتۇر، ئۇ يەنە ئامېرىكا قىممەت قارىشىغا زىت كېلىدۇ، ئاقىلانىلىك ئەمەس. ئەگەر شۇنداق قىلىپ قالساق، «ئىسلام دۆلىتى» بۇنى باھانە قىلىپ تېخىمۇ كۆپ ئۆلۈۋېلىش خاراكتىرلىك ھۇجۇم قوزغايدۇ، تېخىمۇ كۆپ ئايرودروملار ۋە مىترولار تېررورچىلارنىڭ نىشانىغا ئايلىنىپ قالىدۇ. ئوباما مۇنداق دېدى، ھازىر ئامېرىكا يۈرگۈزىۋاتقان «ئىسلام دۆلىتى» گە زەربە بېرىش تەدبىرى ئەڭ ئۈنۈملۈك، بىز چوقۇم غەلبىنى قولغا كەلتۈرىمىز.

22-چېسلا بىريۇسسىل شەھىرى زاۋېنتېم ئايرودرومى (Zaventem Airport) ۋە شەھەر ئىچىدىكى ياۋروپا ئىتتىپاقى باش ئورگىنى ئەتراپىدىكى مىترودا زەنجىرسىمان تېررورلۇق ھۇجۇمى يۈز بېرىپ 30 نەچچە ئادەم قازا قىلدى، كېيىن «ئىسلام دۆلىتى» بۇ ۋەقەنى ئۆزلىرىنىڭ كەلتۈرۈپ چىقارغانلىقىنى جاكارلىدى.