مېنىڭ سۆيگۈم بىر غېرىپ قەلئە
مۇتىللا ئەبەد قىرانى 1
غېرىپلىقتا قالغان تاش قەلئە ،
چۈشتە ئايان مىسكىن بىر قۇشتەك .
ئىز باسمىغان تەنھا يۈرەكلەر ،
ئۆمۇچۇكنىڭ شاھ ئوردىسىدەك .
قورۇقچىسىز يېرىلغان تاش تام ،
ئازغۇن قۇشقا بولماقتا ئۇۋا .
تور باغلىغان كېچىك رۇجەكتىن ،
چېچىلماقتا ئاي نۇرى غۇۋا .
قومۇش بىلەن چۇمكەلگەن پەقەت ،
يوق ئۇيەردە پىشايۋان، لەمپە .
قۇرۇپ كەتكەن گۈللەرمۇ پۇتۇن ،
بەرمىگەچكە باھار ھېچ شەپە .
تاش ئوچاقتا كۆيگەن كۆك يانتاق ،
چېللىغاندەك تاڭنىڭ تۇنىنى .
ئۈچۇرماقتا قۇش پەيلىرىدە ،
چۆچەك بولۇپ كەتكەن كۈلىنى .
2
مەن بارمىغان سېنىڭ كەنتىڭگە ،
يوللىرىدا بارمۇ ياۋا گۈل ؟
سەن ئەۋەتكەن قۇشلار يول باشلاپ ،
بارغىنىدا بېرەلەمسەن قول .
پۇرىغاندا جېگدە چېچىكى ،
خوشلاشماقنى قىلسام مەن خىيال .
ئاق يول تېلەپ كەلمەككە يەنە ،
سۆيەلەمسەن لەۋلەرگە خوشال .
ئوۋغا كەتسەم يېراق قىرلارغا ،
كۇتەلەمسەن ئوتنى ئۆچۇرمەي .
سالام يوللاپ قۇش پەرلىرىدە ،
سېغىنچاڭنى تولۇق تۆكەلمەي .
مەن كېلىمەن، كېتىمەن ھەمدە ،
خىيال قىلما تۇتۇپ قىلىشنى .
ئەسلىمەڭدە قوشۇلغان بىر چۈش ،
ئۆگەتمەكتە غېرىپسىنىشنى .
3
ئۇنۇتمىغىن چېكىلگەن كەپتەر ،
كۈي بەرمەيدۇ يۈرەككە ئوخشاش .
مۇھەببەتتە تۇغۇلغان روھتەك ،
بېرەلەيمەن ئازابقا بەرداش .
يازدىم تالاي يوشۇرۇن خەتلەر ،
ھەممىسىلا قالدى ئۇچۇرسىز .
خوشاللىققا تويۇنغان بىلەن ،
ئېچ- ئېچىمدە دەردىم مىسلىسىز .
قۇچاقلاشنى قىلمايمەن ئارمان ،
بەرگىنىڭدە بىر رەت تەبەسسۇم .
سەن ئەسلىدە كۇلكىدىن پۇتكەن ،
قالغان كېمدىن ئازابلىق ئۇدۇم .
كەپتەر بولۇپ ئۇچۇمەن چوقۇم ،
چاچلىرىڭنى قىلىپ پەر- قانات .
كۆزلىرىڭدە تۇنەپ بىر مەھەل ،
غېرىپلىقنى قىلىمەن بەربات .
4
ئايرىلىشتىن يېراق بۇ ماكان ،
قۇش تىلىدا ئېيتىلغان قىسسە .
ياۋا گۈللەر ئاچامدۇ چېچەك ،
بال ھەرىسى سىرنى تۆكمىسە .
مەن كەتكەندە خوش دېمەي بۇندىن ،
نۇر بەرمىگەن يۇلتۇزلار تولۇق .
ھەممە يەردە ھىجران تۆكۇلۇپ ،
سۆيۇش ئۈچۈن يوق ھېچ يورۇقلۇق .
تۇغۇلمىغان بۇ يەردە مېھىر ،
كۆرمىگەن ھەم سۆيگۈنى ئادەم .
يۈرەكلەردە بولسىمۇ تىترەش ،
تۇيغۇسىزلا ئېلىنار قەدەم .
دىل كۆيدۇرۇپ سايرىغان بىلەن ،
جۇپلىشىدۇ سۆيۇشمەيلا قۇش .
مۇھەببەتتىن سۆز ئاچماق قىيىن ،
ئەركىن نىكاھ خاتا كۆرگەن چۈش .
5
چېكىلىدۇ بارماقلاردا تار ،
كۆزلەر ئۇزاق باققاندا ئوتلۇق .
مەست بولغاندەك كۈيگە بۆلىنىپ ،
ئۈن قاتىدۇ قۇشلارمۇ مۇڭلۇق ،
كىسىشمەيدۇ پاراللىل بولۇپ ،
تەشنالىقتا جۇپلەنگەن لەۋلەر .
ئۇنتۇلمايدۇ بەلكى ئەبەدى ،
شېرىنلىكنى يوشۇرغان دەملەر .
ئاي يۇيۇنغان ئاخىرقى ئاخشام ،
دەرېزەڭدە تۇنىدى قۇشۇم .
ۋېسال كۆرگەن يۈرەك قىتىدا ،
كۆمۇلمەكتە چۈشتەك ئۆتمۇشۇم .
سەن سۆيگۈدىن تۆرەلگەن لالە ،
مەن سەن يازغان ئۇزۇن مۇزىكا .
ئوقۇلمىغان، تېخى پۇتمىگەن ،
دىل كۈيىدەك ياشايمەن گويا .
6
كۈي يېققىچى بولۇش ئىستىكى ،
ئۆگەتكەندە قۇشلار تىلىنى .
خوشلاشقىنىڭ ئېسىمدە جىمجىت ،
تاشلاپ قويۇپ ھەسرەت كۇيىنى .
مەن كاككۇكتەك ئۈنلىگەن دەمدە ،
سەن ئۇنتۇغان كەپەمنى تامام .
يامغۇر بولۇپ تۆكۇلگەن كۆز ياش ،
گۈللىرىڭگە بەرمەكتە ئارام .
ئۇزىغاندا يەلپۇنگەن چاچلار ،
يۈرۈكۈممۇ كەتكەن ئەگىشىپ .
يېتىم قويماي چاقىۋال دەرھال ،
چۈشلىرىڭگە قالسا ئېلىنىپ .
ئاڭلاپ باققىن دىل كۈيى ئوخشاش ،
سېنىڭ ئۈچۈن كۈي تەردىم تالاي .
خىيال قىلساڭ يەنە كېتىشنى،
قۇش پىيىگە يېزىپ ئۇزىتاي .
7
تېلفونىڭنى كۇتتۇم تالاي رەت ،
كېچىلەرنى ئۇلاپ ئۇيقۇسىز .
چۈشىمدىمۇ كەلمىدىڭ يوقلاپ ،
لىپاپىمۇ قۇرۇق يېزىقسىز .
پوچتالىيون بولماقتا خىجىل ،
قول ئۇزاتسام تەلمۇرۇش ئارا .
گۈللىكىمگە كۆنگەن قۇشلارمۇ ،
بۇقۇلدايدۇ، قىلمايدۇ ناۋا .
قايىتماقتا ئېچىلماي خەتلەر ،
يەنە كۆچۇپ يۇرەمسەن شەھەر .
ئۇچۇرۇڭنى ئېلىپ كېملەردىن ،
كۇتۇشۇمدىن بېرىمەن خەۋەر .
ھەسرەت ئاسان، كۇتۇش بەك قىيىن ،
غېرىپلىقتا كۆيمەكتە بۇ دىل .
كۆزلىرىڭگە يوقمۇ تەسۋېرىم ،
سالامىمنى بىر رەت قوبۇل قىل .
8
چاچلىرىڭنى تارىغىن تال- تال ،
ئەۋەتكىنىم جىگدە يىلىمى .
شەھەردە يوق بەلكى بۇ گۆھەر ،
تۇتىيادەك چاچقىن ھەممىنى .
مەن يۇلغۇنلۇق دالىنى كېزىپ ،
كەلگىنىمدە كۆرمەككە پىنھان .
چېچىڭدىكى قىرىق بىر ئۆرۇم ،
سېغىنچاڭنى قىلار نامايان .
قۇملۇقلارغا كۆمدۇم سەن ئۈچۈن ،
ئەقىدەمدە جىگدە ئۇرۇقى .
چىرماشقاندا بارماقلار مەھكەم ،
سۆيگۈمىزنىڭ بولسۇن ئوچىقى .
9
يۈرۈكۈمدەك بۇ كېچىك ئارال ،
تەنھالىقنى يوشۇرغان ماكان .
يولۇچىنى كۆرمىگەن يوللار ،
ئۇنتۇلماقتا رېۋايەتسىمان .
مەن بۇ يەرگە كەلگەندە كۆچۇپ ،
گۈللەر ئۇنەر ئىكەن چېچەكسىز .
ئەينەكلەرمۇ مۇز نەقىش كۆرمەي ،
تاڭ كۇتەركەن يۇلتۇزلار نۇرسىز .
چاچقىنىمدا سۆيگۈدىن ئۇرۇق ،
ھىلال ئاينى چاقىردى تۈنلەر .
پەسىللەرمۇ كېلىپ ئەسلىگە .
بىر ھاياتتىن تۆكۇلدى كۈيلەر .
داۋاملاشقان شۇ ئۇزاق كۇتۇش ،
چاڭقاش بىلەن تويۇندى تولۇق .
ياراتقىنىم يېڭى بىر پەسىل ،
خوشاللىقتىن سەنسىز ئەسەر يوق .
مەن ئەمەسمەن غېرىپسىنغان قۇش ،
ئازاپ ئۈچۈن يالغۇز تۆرەلگەن .
شاد ۋېسالنىڭ ئېچىدە ئۆزۇم ،
قەبرەڭدىكى گۈل بولۇپ ئۈنگەن .
10
مېنىڭ سۆيگۈم بىر غېرىپ قەلئە ،
تۇغۇلمىغان ۋېسال ئېھتىمال .
تەبەسسۇمدىن ھالقىپ كۆز يېشى ،
مىسكىنلىكنى چىللار بىمالال .
سۆيۇنۇشلەر چېچىلغان يوللار ،
تۇتاشمىغان بۇ يەرگە نېچۈن ؟
ئۇزىماقتا مەيۇس قەدەملەر ،
پاك مۇھەببەت ئۆلگىنى ئۈچۈن .
يۈرۈكۈمگە ئوخشاش بۇ قەلئە ،
ئۇنتۇلۇشتىن يېراق شېرىن چۈش .
پەسىلسىزمۇ بېرىدۇ چوقۇم ،
روھ يوقاتقان دىللارغا سۆيۇش .
|
|
|||||||
