يۇرىكىمدە بىر ئوت بار (غەزەللەر) ئابدۇلئەھەد قادىرى (1) سېنى كۆرسەم بولۇر دىلبەر، ۋۇجۇد مۇلكۇمگە جان پەيدا ، نىگاھىڭ شولىسى چۈشكەن ھامان مەڭزىمگە قان پەيدا . چىمەنسىز زەر قەپەس ئىچرە زەبۇندۇر ھالى بۇلبۇلنىڭ ، قاچان گۈل ۋەسلىگە يەتسە بولۇر ئاندىن زۇۋان پەيدا . نېتەي ، دەشتى قىيامەتتە تېنەپ يۈرگەنلىرىم ئازمۇ ، رەقىبلەر دەستىدىن ھەرئان يولۇمدا جۇت- بوران پەيدا . ئەجەپ قىسمەت ئىكەن ھىجران ئايانى بار ، پايانى يوق ، غېرىچتا بىر بالا زاھىر ، قەدەمدە بىر داۋان پەيدا . كىشىكىم بولمىسۇن مەندەك تەلەيسىز بىناۋا ئاشىق ، ۋىسالنىڭ مەنزىلى مەۋھۇم ، جۇدالىق ھەرزامان پەيدا . نە بولغاي سەن سېغىنغاندا يېنىڭغا مەن ئۇچۇپ بارسام ، قاچان قىلسام خىيال بولساڭ قېشىمدا سەن شۇئان پەيدا ... ئەھەدى ، سەبرى قىل خەستە جېنىڭ تەندە ئامان بولسا ، جانانىڭ بولغۇسى بىركۇن قۇچاغىڭدا ھامان پەيدا ... ! (2) ئەي نىگارا ، ۋەسلى ئىمكان بەرمىدىڭ بىردەم ماڭا ، بولمىساڭ دەردىمگە دەرمان ، كىم قىلۇر ياردەم ماڭا ؟ سۈبھىدىن تا شامغىچە بولسام يولۇڭغا ئىنتىزار، تۈن بويى بەرمەس ئارام‹پىژ-پىژ›قىلىپ مەيدەم ماڭا . دوق قىلارسەن‹ مۇز چىراي›دەپ،ئېيتقىنا قانداق كۈلەي ، رۇدۇپايدەك سوڭدىشىپلا يۈرسە تەشۋىش ، غەم ماڭا . ‹جان تەسەددۇق سەن ئۈچۈن›دەپ ئېيتقىنىڭ يالغانمىدى ، قېنى كۈن چۈشكەندە باشقا بولغىنىڭ ھەمدەم ماڭا ؟ يوق تامايىم خەيرى- ئېھسان ،ئىلتىپاتتىن بىر ئۆمۇر، چۈنكى ، مىننەتلىك لىباستىن ياخشىدۇر جەندەم ماڭا . ‹يا ۋىسال بەر، يا جېنىمنى ئال خۇدا› دەپ ئاھ ئۇرۇپ ، نالە قىلماق بولدى ئادەت كۈندە مىڭ مەرتەم ماڭا . ئەي نىگار ، سەۋدايى نىمجان كۆڭلىگە كۆكلەم ئەكەل ، گەر ئۈزەر بولساڭ ئەقىدەم تارىنى ، ماتەم ماڭا ! (3) (4)
ئەي پەرى ، ئىشقىڭدا ئۆچمەس چوغ بولۇپ ياندى يۈرەك ، زار بولۇپ ۋىسالغا ، ھىجران ۋەسلىگە قاندى يۈرەك . جۈپ ئانار مەي باغلىغان ئالتۇن لىگەندۇر كۆكسىڭىز ، بۇندا باغرىم بىر قەپەس، تۇتقۇنغا ئايلاندى يۈرەك . بىر دەقىق جىم تۇرسا كاشكى ، يۇلقۇنۇپ بەرمەس ئارام ، قانچە كىشنەپ چاپچىغانچە شۇنچە داغلاندى يۈرەك . تاش كۆمۇرگە ئوتنى ياقسا كۈل بىلەن داشقال قالۇر ، بىقەدىر جىسمىمدا ئوت كۆيگەنچە چوغلاندى يۈرەك . مەن تۆرەلدىم قايسى كۈن ئىشقى -پىراق سەيناسىدا، سۆڭرى ھىجرانغا بەنت - زەنجىردە باغلاندى يۈرەك . نە ئەجەپتۇر ئەيلىسەڭ كۆكسۈمنى خۇمدانغا قىياس ، شۇ ئەزىم خۇمدان ئارا يالقۇنغا ئايلاندى يۈرەك . بەس!كۆتۇر باشىڭنى نىمجان ياتما غەپلەت ئۇيقىدا ، چاچ-ساقالىڭغا قىرو قونغاندا ئويغاندى يۈرەك ! (5)
ئاھ، مېنىڭ باشىمغا مىڭ سەۋدانى جەم قىلدى پەلەك ، گاھ ئىشىق شاھزادىسى ، دىۋانە ھەم قىلدى پەلەك . مۇپتىلا ئەيلەپ گۈزەل ماھى تاباننىڭ ئىشقىغا ، بەردى ئارماننى تولا، دەرماننى كەم قىلدى پەلەك . نە بولۇر لەۋ جامىدىن بىر قەترە زەمزەم ئوتلىسام ، جانۇ - جىسمىمنى تۈگەل ھىجرانغا يەم قىلدى پەلەك . ناگىھان يەتسە ۋىسالنىڭ شېخىغا سۇنغان قولۇم ، شۇھامان مىكرى بىلەن جەبرى - سىتەم قىلدى پەلەك . يار ۋىسالىن تۇتىيا ئەيلەپ مېنى خەس بورىيا ، ئاز كېلىپ يىغلاتقىنى قوشلاپ ئەلەم قىلدى پەلەك . ئۆتكىچە ئەللىك يەنە ئالتە داۋاندىن يامىشىپ ، باشتا ساچىمدىن تولا بىسيارى غەم قىلدى پەلەك . شۈكرى قىل ، نىمجان يىتىم ئاشىقلىغىڭدىن ئۇرما ئاھ ، بەلكى قىسمەتتە سېنى‹غېرىپ-سەنەم›قىلدى پەلەك .
|
|
|||||||
