دۆلەت رەئىسى شى جىنپىڭ 8-ئىيۇل رۇسىيەنىڭ ئۇفادا ھىندىستان زۇڭلىسى مودى بىلەن كۆرۈشتى
شىنخۇا تورى، رۇسىيە ئۇفا، 8-ئىيۇل تېلېگراممىسى: دۆلەت رەئىسى شى جىنپىڭ 8-ئىيۇل رۇسىيەنىڭ ئۇفادا ھىندىستان زۇڭلىسى مودى بىلەن كۆرۈشتى.
شى جىنپىڭ مۇنداق تەكىتلىدى: بۇ يىل 5-ئايدا، بىز جۇڭگونىڭ شىئەندە جۇڭگو-ھىندىستاننىڭ ئىستراتېگىيەلىك شېرىكلىك مۇناسىۋىتىنىڭ مەزمۇنىنى بېيىتىپ، ئىككى دۆلەتنىڭ تېخىمۇ يېقىن تەرەققىيات شېرىكلىك مۇناسىۋىتى بەرپا قىلىش توغرىسىدا مۇھىم ئورتاق تونۇش ھاسىل قىلىپ، ئىككى دۆلەت خەلقى ۋە خەلقئارا جەمئىيەتكە جۇڭگو-ھىندىستاندىن ئىبارەت ئىككى تەرەققىي قىلىۋاتقان دۆلەتنىڭ قول تۇتۇشۇپ ھەمكارلىشىپ، ئورتاق تەرەققىي قىلىدىغان ئاكتىپ سىگنالنى تارقاتقانىدۇق. ئىككى تەرەپنىڭ ئورتاق تىرىشچانلىقىدا، بىز ھاسىل قىلغان تۈرلۈك ئورتاق تونۇشلار ئەمەلىيلىشىپ، ئىككى دۆلەتنىڭ قانۇن تۇرغۇزۇش ئورگانلىرى، تۆمۈر يول، سانائەت باغچا رايونى، ئەقىل شەھىرى قاتارلىق ساھەلەردىكى ھەمكارلىقى پۇختا ئىلگىرى سۈرۈلۈۋاتىدۇ.
شى جىنپىڭ مۇنداق كۆرسەتتى: جۇڭگو-ھىندىستان ئالتۇن كېسەك دۆلەتلىرىنىڭ قەتئىي قوللىغۇچىلىرى ۋە ئاكتىپ قۇرۇلۇشچىلىرىدىن بولۇش سۈپىتى بىلەن، ئالتۇن كېسەك دۆلەتلىرىنىڭ تېخىمۇ يېقىن، تېخىمۇ ئومۇميۈزلۈك، تېخىمۇ پۇختا شېرىكلىك مۇناسىۋىتىنى ئورتاق بەرپا قىلىپ، ئالتۇن كېسەك دۆلەتلىرىنىڭ ئىجابىي رولىنى جارى قىلدۇرۇشىغا تىرىشىپ تۈرتكە بولۇپ، دۇنيانىڭ تىنچلىقى، تەرەققىياتى ئۈچۈن تېخىمۇ زور تۆھپىلەرنى قوشۇشى كېرەك.