ئاپتونوم رايونىمىز تەۋەسىدىكى ئوتتۇرا ، باشلانغۇچ مەكتەپلەر ۋە يەسلىلەر بۇنىڭدىن كېيىن بىردەك ‹‹تاماكا چەكلەش بۇيرۇقى››نى ئىجرا قىلىدىغان بولۇپ ، مەكتەپ ياكى يەسلىلەرگە كىرگەن ھەر قانداق ئادەمنىڭ ھەر قانداق ئورۇن ياكى ھەر قانداق ۋاقىتتا تاماكا چېكىشىگە رۇخسەت قىلىنمايدىكەن ، بۇيرۇققا خىلاپلىق قىلغان مەكتەپلەر تەكشۈرۈپ بىر تەرەپ قىلىنىدىكەن ۋە ئېلان قىلىنىدىكەن .

شىنجاڭ ئۇيغۇر ئاپتونوم رايونلۇق مائارىپ نازارىتى چۈشۈرگەن ئۇقتۇرۇشنىڭ تەلىپىدە مۇنۇلار كۆرسىتىلدى : مەكتەپ مۇدىرى مەكتەپلەردە تاماكا چەكلەش بۇيرۇقىنى ئىجرا قىلىشتىكى بىرىنچى مەسئۇل كىشى ، شۇڭا ، ئۇ بۇيرۇقنى باشلامچىلىق بىلەن ئىجرا قىلىپلا قالماي ، يەنە بۇيرۇقنى ئىجرا قىلىشتىكى مۇناسىۋەتلىك خىزمەتلەرنى ئەستايىدىل ، كونكېرت ئورۇنلاشتۇرۇشى ، مەكتەپ ئىچىدە تاماكا چېكىشنى تىزگىنلەپ ، تاماكا چەكلەش بۇيرۇقىنى مۇكەممەل ئىجرا قىلىشى لازىم . مەكتەپلەر مەكتەپ دەرۋازىسى ئالدىدىكى كۆزگە چېلىقىدىغان جايغا ‹‹ئىس-تۈتەكسىز مەكتەپ ›› دېگەن خەت يېزىلغان ياكى تاماكا چەكلەش بەلگىسى چۈشۈرۈلگەن تاختىنى تۇرغۇزۇشى لازىم .

بۇنىڭ بىلەن بىر ۋاقىتتا ، مەكتەپلەر تاماكا چېكىش ئۆيى تەسىس قىلماسلىقى ، تاماكىغا مۇناسىۋەتلىك ئەسۋابلارنى قويماسلىقى ، تاماكىغا مۇناسىۋەتلىك ئېلانلارنى چىقارماسلىقى كېرەك . مەكتەپ ئىچىدىكى دۇكانلارمۇ تاماكا ساتماسلىقى لازىم .

ئالىي مەكتەپلەردە تاماكا چېكىش ئەھۋالىغا قارىتا ، شىنجاڭ ئۇيغۇر ئاپتونوم رايونلۇم مائارىپ نازارىتى مەكتەپلەرنىڭ قاتتىق چەكلىمە قويۇشىنى ، ئالىي مەكتەپلەردىكى بارلىق ئىمارەت ئىچىدە بىردەك تاماكا چېكىشنى چەكلەپ ، تاماكا چېكىش ئۆيىمۇ تەسىس قىلماسلىقنى ، ئەمەلىي ئەھۋاللارغا قارىتا ، ئۆي سىرتىدا (مەكتەپتىكى ئۈستى ئوچۇق جايلاردا) ناھايىتى ئاز ساندىكى تاماكا چېكىش ئۆيىنى تەسىس قىلسا بولىدىغانلىقىنى بىلدۈردى .