جەسەت غول ھۈجەيرىنىڭ مۇھىم كېلىش مەنبەسىگە ئايلىنىشى مۇمكىن

　جەسەت ئەزا كۆچۈرۈش بىلەن تەمىنلەيدىغان تەنگە ئايلىنىشى مۇمكىن ، ئۇ ھەتتا يەنە غول ھۈجەيرىنىڭ كېلىش مەنبەسىگە ئايلىنىشىمۇ مۇمكىن . جەسەتنىڭ ئۆلگەن ۋاقتى بەش كۈنگە يەتكەندىمۇ ، ئالىملار يەنىلا يىلىك ئىچىدىن كۆپ مىقداردا غول ھۈجەيرە ئالالايدۇ ، بۇ غول ھۈجەيرىلەر كېسەلنى داۋالاپ ئادەمنى قۇتقۇزۇشتىكى كۆپ خىل داۋالاش ئۇسۇللىرىدا ئىشلىتىلىشى مۇمكىن . ئادەم تېنىدىكى يىلىك تەركىبىدە مېزېنخىما غول ھۈجەيرىسى ( MSC ) بار . بۇ خىل غول ھۈجەيرە قاتتىق سۆڭەك ، كۆمۈرچەك ، ماي ۋە باشقا تىپتىكى ھۈجەيرىلەرگە ئايلىنىدۇ . مېزېنخىما غول ھۈجەيرىسى كۆچۈرۈشنى قوبۇل قىلالىسىمۇ ، بىراق ئۇلارنىڭ ئۆسۈپ قايسى خىل تىپتىكى ھۈجەيرىگە ئايلىنىشى ، ئۇلارنىڭ كىرگۈزۈلگەن ئورنىغا باغلىق بولىدۇ . مەسىلەن ، يۈرەككە كىرگۈزۈلگەن مېزېنخىما غول ھۈجەيرىسى ساغلام بولغان يېڭى توقۇلمىغا ئايلىنىشى مۇمكىن . بۇ سوزۇلما خاراكتېرلىك يۈرەك كېسەللىكىنى داۋالايدىغان بىر خىل ئۈنۈملۈك ئۇسۇل .

بىراق ، بۇ خىل داۋالاش ئۇسۇلى كۆپ مىقداردىكى غول ھۈجەيرىگە مۇھتاج بولغاچقا ، داۋالاش خادىملىرى بىر تىرىك تەنچە ھەدىيە قىلغۇچىدىن يېتەرلىك بولغان غول ھۈجەيرىگە ئېرىشەلىشى ناتايىن . ئۇنداق بولسا ، جەسەت بۇ مەسىلىنىڭ جاۋابىغا ئايلىنالامدۇ ؟ ئادەم ئۆلگەندىن كېيىن ، بەدىنى ئىچىدىكى مۇتلەق كۆپ ساندىكى ھۈجەيرىلەرمۇ ئىككى-ئۈچ كۈن ئىچىدە ئۆلۈپ كېتىدۇ . ئەمما مېزېنخىما غول ھۈجەيرىسىنىڭ ھاياتلىق مۇھىتىدا ئەسلىدىلا ئوكسىگېن مىقدارى بولغاچقا ، ئامېرىكا مېيئامى ئۇنىۋېرستېتىدىكى جيانلۇكا.دېيبولىتو ۋە ئۇنىڭ خىزمەتداشلىرى بۇ خىل ھۈجەيرىنىڭ ئوخشاش خىلىدىكىلەرگە سېلىشتۇرغاندا تېخىمۇ ئۇزۇنراق ياشىيالايدىغانلىقىنى گۇمان قىلىشتى .

بۇ ئىشنى تەكشۈرۈش ئۈچۈن ئۇلار ئىككى جەسەتنىڭ بارماق سۆڭەكلىرىنى 5 كۈن ساقلىغان ، شۇنىڭدىن كېيىن ھەربىر بارماق سۆڭىكىنىڭ يىلىكى ئىچىدىن مېزېنخىما غول ھۈجەيرىسىنى ئايرىۋالغان ، ھەمدە ئۇنى قاچا ئىچىدە يېتىشتۈرگەن . 5 ھەپتىدىن كېيىن ، دېيبولىتو غول ھۈجەيرىدىن مۇۋەپپەقىيەتلىك ھالدا كۆمۈرچەك ھۈجەيرىسى بىلەن ماي ھۈجەيرىسىنى يېتىشتۈرۈپ چىققان . مۇشۇ ئاينىڭ باشلىرىدا ئۇ ئامېرىكىدىكى فىلورىدا ئىشتاتىدا ئېچىلغان دۇنيا غول ھۈجەيرە يىغىنىدا تەتقىقات نەتىجىسىنى ئېلان قىلدى .

دېيبولىتو مۇنۇلارنى بىلدۇردى : بىر تىرىك تەنچە ھەدىيە قىلغۇچى تەمىنلىگەن يىلىك مىقدارى چەكلىك بولىدۇ . ئەمما بىر جەسەت ئادەم ھۈجەيرىسىنىڭ يېتەرلىك مەنبەسىگە ئايلىنىشى مۇمكىن .

شىۋىتسىيە كارولىن تېببىي ئىنىستىتۇتىنىڭ قايتا ھاسىل قىلىش مېدىتسىنا مۇتەخەسسىسى پاۋلو . ماككىيارىنىنىڭ قارىشىچە يۇقىرىدا ئېيتىلغان تەتقىقات بىر تۈرلۈك چوڭ تەرەققىيات بولسىمۇ ، ئەمما ئۇ جەسەت ھۈجەيرىسى بەلكى قارىماققا ئۇنداق ساغلام بولماسلىقى مۇمكىنلىكىنى بىلدۈردى . بۇ ھۈجەيرىلەرنىڭ DNA سى ئەتراپتىكى توقۇلمىلارنىڭ ئۆلۈشى ۋە تۆۋەن تېمپېراتۇرىدا ئوچۇق تۇرۇشى سەۋەبىدىن تەسىرگە ئۇچىرىشى مۇمكىن . ئۇ : « بىز بۇ ھۈجەيرىلەرنىڭ بىخەتەرلىكىنى چوقۇم بېكىتىشىمىز كېرەك » دېدى .