ئاپتونوم رايونىمىزنىڭ 2013- يىللىق ئوقۇتقۇچىلارنىڭ سالاھىيىتىنى بېكىتىش خىزمىتى 4- ئايدا باشلىنىدىكەن
ئاپتونوم رايونلۇق مائارىپ نازارىتىدىن ئىگىلىنىشىچە، ئاپتونوم رايونىمىزنىڭ 2013- يىللىق ئوقۇتقۇچىلارنىڭ سالاھىيىتىنى بېكىتىش خىزمىتى 4- ئايدا باشلىنىدىكەن.
ئاپتونوم رايونىمىز ھەر يىلى ئوقۇتقۇچىلارنىڭ سالاھىيىتىنى بېكىتىش خىزمىتىنى قانات يايدۇرۇش ۋاقتى بىرلىككە كەلتۈرۈلگەن بولۇپ، ئەتىياز پەسلىدە 4- ئاينىڭ 1- كۈنىدىن 7- ئاينىڭ 10- كۈنىگىچە، كۈز پەسلىدە 9- ئاينىڭ 10- كۈنىدىن 11- ئاينىڭ 31- كۈنىگىچە بولىدىكەن. بېكىتىش دائىرىسى دۆلەتنىڭ قانۇندا بەلگىلەنگەن پېنسىيىگە چىقىش يېشىغا توشمىغان، «ئوقۇتقۇچىلار قانۇنى» دىكى بەلگىلەنگەن ئوقۇش تارىخى شەرتىگە ئۇيغۇن كېلىدىغان خادىملارنى ئۆز ئىچىگە ئالىدىكەن. بۇ يەنە ھەر دەرىجىلىك، تۈرلۈك مەكتەپلەرنىڭ ئوقۇتۇش ئىش ئورنىدا خىزمەت قىلغان شتاتلىق مەخسۇس ۋەزىپىدىكى ئوقۇتقۇچىلار، بۇ يىل ئادەتتىكى ئالىي مەكتەپلەرنىڭ پىداگوگىكا، غەيرىي پىداگوگىكا، مائارىپ تۈرىدىكى كەسىپلەرنى پۈتتۈرگەن ئوقۇغۇچىلار ۋە شەرتكە ئۇيغۇن كېلىدىغان جەمئىيەتتىكى كىشىلەرنىمۇ ئۆز ئىچىگە ئالىدىكەن.
