ئەڭ يېڭى ئۇچۇردا دېيىلىشىچە، گەرچە نۇرغۇنلىغان ئابونتلار مىكروسوفىتنىڭ يېڭى بىر ئەۋلاد مەشغۇلات سىستېمىسى Windows 10 گە ھەقسىز يېڭىلاش ئېلىپ بارالىسىمۇ، ئەمما بۇ خىل يېڭىلاش ۋاقتى ھەرگىز مەڭگۈلۈك ئەمەسكەن.

Windows 10 سىستېمىسى پىلان بويىچە مۇشۇ ئاينىڭ 29-كۈنى رەسمىي ئېلان قىلىنىدۇ. مىكروسوفىت ئىلگىرى ئۇقتۇرۇش چىقىرىپ، كىلەر يىلى 7-ئاينىڭ ئاخىرىدىن بۇرۇن، بارلىق Windows 7 ۋە Windows 8 نىڭ ھەقىقىي نەشىرىنى ئىشلىتىۋاتقان ئابونتلارنىڭ Windows 10 گە ھەقسىز يېڭىلىشىغا رۇخسەت قىلىدىغانلىقىنى بىلدۈرگەن.

بىراق، Windows 10 سىستېمىسىغا يېڭىلىغاندىن كىيىن، ئۇنى يەنە قانچىلىك ۋاقىت ھەقسىز يېڭىلاپ ماڭغىلى بولىدۇ؟ مىكروسوفىت بۇ ھەقتە توختالغاندا ناھايىتى مۈجمەل بىر جاۋاب بەرگەن: «كومپىيۇتېر قوللايدىغان ئىشلىتىش ۋاقتى ئىچىدە  ھەقسىز يېڭىلاشقا بولىدۇ»، بىراق، بۇنىڭ كونكىرىت ۋاقتى ئوتتۇرىغا قويۇلمىغان.

يىقىندا، مىكروسوفىت شىركىتى مەبلەغ سالغۇچىلار تور بېكىتىدە بىر PPT ھۆججىتىنى ئېلان قىلغان بولۇپ، ئۇنىڭدا كۆرسىتىلىشىچە، «كومپىيۇتېر قوللايدىغان ئىشلىتىش ۋاقتى» نىڭ مۇددىتى ئىككى يىلدىن تۆت يىلغىچە بولىدىكەن. كونكىرىت ۋاقتىنىڭ نەچچە يىل بولىدىغانلىقى يەنىلا «ئابونت تۈرى» گە باغلىق ئىكەن.

Windows 10 نىڭ ھەقسىز يېڭىلىنىش مەسىلىسىگە نىسبەتەن، مىكروسوفىت شىركىتى بىزگە نۇرغۇن جاۋابسىز سوئاللارنى قالدۇرۇپ قويغان، ھەتتا، بۇنىڭ بەزىلىرى بىر-بىرىگە زىت كىلىدۇ. كەسپى ساھەدىكى ئانالىزچىلارنىڭ قارىشىچە، يۇقارقىلارنىڭ ھەممىسى مىكروسوفىتنىڭ بۇ يېڭى سىستېمىنى ھەقسىز يېڭىلاشقا رۇخسەت قىلىشتا ئىككىلىنىپ تۇرۇۋاتقانلىقىنى چۈشەندۈرۈپ بېرەلەيدىكەن.