بۇ ئۈچ تەدبىر تۆۋەندىكىچە: بىرىنچى، ھەر يىلى 90 مىليون يۈەندىن ئارتۇق مەخسۇس مەبلەغ ئورۇنلاشتۇرۇلۇپ، شىنجاڭ بويىچە مەجبۇرىيەت مائارىپى باسقۇچىدىكى مەكتەپلەرنىڭ سىنىپ مەسئۇللىرىغا بىر قىسىم قوشۇمچە تولۇقلىما بېرىلىدىغان بولۇپ، بۇ بۆسۈش خاراكتېرلىك تەدبىر ھېسابلىنىدۇ؛ ئىككىنچى، جەنۇبىي شىنجاڭدىكى يېزا، كەنت ئوقۇتقۇچىلىرىغا بېرىلىدىغان تۇرمۇش تولۇقلىمىسىنىڭ سالمىقى ئاشۇرۇلىدۇ. ئىگىلىنىشىچە، ئاپتونوم رايون 2011 – يىلىدىن باشلاپ شىنجاڭ بويىچە 150 مىڭدىن ئارتۇق يېزا، كەنت ئوقۇتقۇچىسىغا ئوتتۇرىچە ئايدا 200 يۈەن قوشۇپ بەرگەن بولۇپ، 2014 – يىلى جەنۇبىي شىنجاڭدىكى ئىككى ۋىلايەت، بىر ئوبلاستتىكى 70 مىڭدىن ئارتۇق يېزا، كەنت ئوقۇتقۇچىسىغا ئايدا يەنە 200 يۈەن قوشۇپ بەردى. بۇ يىلدىن باشلاپ، ھازىرقى ياردەم پۇلنى بېرىش دائىرىسى ئىككى ۋىلايەت، بىر ئوبلاستتىن، ئۈچ ۋىلايەت، بىر ئوبلاستقا كېڭەيتىلگەن بولۇپ، ئاقسۇ ۋىلايىتى يېڭىدىن كۆپەيتىلدى؛ ئۈچىنچى، يېزا، كەنت ئوقۇتقۇچىلىرىنىڭ ياتاق قۇرۇلۇشى كېڭەيتىلىدىغان بولۇپ، ھازىر پۈتۈپ بولغان 23 مىڭ يۈرۈش ياتاق ئاساسىدا، ئۈچ يىلدىن بەش يىلغىچە يەنە كۆلىمى 950 مىڭ كىۋادرات مېتىر كېلىدىغان 27 مىڭ يۈرۈش ياتاق سېلىنىپ، يېزا، كەنت ئوقۇتقۇچىلىرىنىڭ ياتاق مەسىلىسى ئۈزۈل – كېسىل ھەل قىلىنىدۇ.

   ئاپتونوم رايونلۇق مائارىپ نازارىتى ئوقۇتقۇچىلار خىزمىتى باشقارمىسىنىڭ مۇئاۋىن باشلىقى لېي ۋېي مۇنداق دېدى: تىلغا ئېلىشقا ئەرزىيدىغىنى شۇكى، ئىشتاتقا كىرگۈزۈلمىگەن ئالاھىدە ئوقۇتقۇچىلارمۇ شۇنىڭغا ماس ھالدا يۇقىرىقى سىياسەتتىن بەھرىمەن بولىدۇ.