ئاپتونوم رايونلۇق مائارىپ نازارىتى نىشانلىق ھەقسىز تەربىيىلىنىدىغان پىداگوگىكا ئوقۇغۇچىلىرى خىزمىتى توغرىسىدا ئاخبارات ئېلان قىلىش يىغىنى ئاچتى

24-ماي ئاپتونوم رايونلۇق مائارىپ نازارىتى نىشانلىق ھەقسىز تەربىيىلىنىدىغان پىداگوگىكا ئوقۇغۇچىلىرى خىزمىتى توغرىسىدا ئاخبارات ئېلان قىلىش يىغىنى ئىچىپ، جەمئىيەتكە 2013- يىللىق نىشانلىق ھەقسىز تەربىيىلىنىدىغان پىداگوگىكا ئوقۇغۇچىلىرى پىلانىنىڭ ئومۇمىي ئورۇنلاشتۇرۇلۇشىنى ئېلان قىلدى.
بۇ يىل ئاپتونوم رايون 3580 نەپەر نىشانلىق ھەقسىز تەربىيىلىنىدىغان پىداگوگىكا ئوقۇغۇچىلىرى پىلانى چۈشۈرگەن بولۇپ، بۇنىڭ ئىچىدە ئوقۇشقا كىرىشتىن بۇرۇنقى يەسلى مائارىپى ۋە ئوتتۇرا، باشلانغۇچ مەكتەپ ئوقۇتقۇچىلىقى ئۈچۈن 3 مىڭ ئوقۇغۇچى، ئالاھىدە مائارىپ ئوقۇتقۇچىلىقى ئۈچۈن 80 ئوقۇغۇچى، ئوتتۇرا، كەسپىي تېخنىكا مائارىپ ئوقۇتقۇچىلىقى ئۈچۈن 500 ئوقۇغۇچى قۇبۇل قىلىنىدۇ. ئوقۇشقا كىرىشتىن بۇرۇنقى يەسلى مائارىپى ۋە ئوتتۇرا، باشلانغۇچ مەكتەپ ئوقۇتقۇچىقىغا تەربىيىلىنىدىغان ئوقۇغۇچىلارنى قۇبۇل قىلىش پىلانى تولۇق كۇرس ۋە مەخسۇس كۇرس دەپ ئىككى قاتلامغا بۆلىنىدۇ، بۇنىڭ ئىچىدە تولۇق كۇرس كەسىپلىرىدىن تىل ئەدەبىيات، ئەنگىلىز تىلى، ماتىماتىكا ۋە قوللىنىلىشچان ماتىماتىكا قاتارلىق 16 كەسپ بولۇپ، تەربىيىلەش پىلانىنى ئايرىم- ئايرىم ھالدا شىنجاڭ پىداگوگىكا ئۇنۋېرسىتېتى، قەشقەر پىداگوگىكا ئىنىستېتۇتى، سانجى ئىنىستېتۇتى،  ئىلى پىداگوگىكا ئىنىستېتۇتى قاتارلىق 4 ئالىي مەكتەپ ئۈستىگە ئالىدۇ؛ مەخسۇس كۇرس كەسىپلىرىدىن تىل ئەدەبىيات مائارىپى، يەسلى مائارىپى، ئەنگىلىز تىلى مائارىپى قاتارلىق 13 كەسىپ بولۇپ، تەربىيىلەش پىلانىنى ئايرىم- ئايرىم ھالدا قەشقەر پىداگوگىكا ئىنىستېتۇتى، ئىلى پىداگوگىكا ئىنىستېتۇتى، سانجى ئىنىستېتۇتى، شىنجاڭ پىداگوگىكا ئالىي تېخنىكوم مەكتىپى، خوتەن ئالىي تېخنىكومى، شىنجاڭ كەسپىي ئۇنۋېرسىتېتى قاتارلىق 6 ئالىي مەكتەپ ۋە ئاپتونوم رايونىمىز سىرتىدىكى شەندوڭ تەبىئىي پەنلەر ئۇنۋېرسىتېتى ئۈستىگە ئالىدۇ.
نىشانلىق ھەقسىز تەربىيىلىنىدىغان پىداگوگىكا ئوقۇغۇچىلىرىغا قارىتا «ھەقسىز تەربىيىلەش ۋە نىشانلىق ئىشقا ئورۇنلاشتۇرۇش» تىن ئىبارەت تەربىيىلەش ئەندىزىسى قوللىنىلىپ، ئوقۇغۇچىلار ئوقۇشقا كىرىشتىن بۇرۇن «نىشانلىق ھەقسىز تەربىيىلىنىدىغان پىداگوگىكا ئوقۇغۇچىلىرى مائارىپ كېلىشىمناسى» ئىمزالايدۇ، ئوقۇش پۈتتۈرگەندىن كېيىن كېلىشىمدىكى بەلگىلىمە بويىچە ھەرقايسى جايلاردىكى يېزا-بازارلىق ئوتتۇرا، باشلانغۇچ مەكتەپلەرگە ياكى يەسلىلەرگە بېرىپ خىزمەت قىلىدۇ.