مائارىپ مىنىستىرلىقى تور پونكىتىدا 28–ئاۋغۇست ئېلان قىلىنغان ئۇقتۇرۇشقا ئاساسلانغاندا، يەسلىدىن ئالىي مەكتەپكىچە بولغان ھەر دەرىجىلىك مەكتەپلەر يېڭى ئوقۇش مەۋسۈمىدىن باشلاپ مەكتەپ باشقۇرۇش مىزانىنى ئۆلچەملەشتۈرۈپ باشقۇرۇشنى كۈچەيتىدىكەن.

ئۇقتۇرۇشتا يەسلىلەرنىڭ ھەق ئېلىشىنى قېلىپلاشتۇرۇپ، تەجرىبە سىنىپى، ئالاھىدە سىنىپ، ھەۋەسكارلار سىنىپى، دەرستىن سىرتقى تەربىيەلەش سىنىپى قاتارلىق ناملار بىلەن ھەق ئېلىش، ئىقتىسادىي ياردەم، ئوقۇش ياردەم پۇلى، يەسلى باشقۇرۇش ھەققى، مائارىپ تەننەرخى تۆلەم پۇلى قاتارلىق ناملار بىلەن پۇل يىغىش ۋە ئاتا–ئانىلارنى دەرسلىك، ئوقۇشلۇق ۋە قوشۇمچە ماتېرىياللارنى بىر تۇتاش سېتىۋېلىشقا مەجبۇرلاش قىلمىشلىرىنى توسۇش تەلەپ قىلىنغان.

ئۇقتۇرۇشتا مەجبۇرىيەت مائارىپى باسقۇچىدىكى ئوتتۇرا–باشلانغۇچ مەكتەپلەر توغرىسىدا مۇنداق دېيىلگەن: ئوقۇغۇچىلارنى ھەر خىل شەكىلدىكى ئىمتىھان، تەكشۈرۈش، سىناق بىلەن تاللاشقا بولمايدۇ، مەكتەپ بىلەن چېتىشلىقى بار ھەر قانداق تەربىيەلەش سىنىپى ئېچىش، ئولىمپىك ماتېماتىكا مۇسابىقىسى قاتارلىق پەنلەر مۇسابىقىسى ئۆتكۈزۈش، ئوقۇغۇچىلارنىڭ ئالاھىدىلىكىنى مەكتەپكە قوبۇل قىلىش بىلەن بىرلەشتۈرۈش، نۇقتىلىق سىنىپ تەسىس قىلىش قەتئىي چەكلىنىدۇ. يەرلىك ھۆكۈمەت، ئالاقىدار ئورۇنلار ۋە مەكتەپلەرنىڭ ئوقۇغۇچى قوبۇل قىلىشقا چېتىلىدىغان ھەر قانداق ئىقتىسادىي ياردەمنى ھەر قانداق نامدا قوبۇل قىلىشى قەتئىي مەنئى قىلىنىدۇ.

ئۇقتۇرۇشتا قوشۇمچە ئوقۇتۇش ماتېرىياللىرىنى تارقىتىش ۋە بەلگىلىمىگە خىلاپ دەرس تولۇقلاش قىلمىشلىرىنى تۈزەش، بەزى ئوقۇتقۇچىلارنىڭ دەرس مەزمۇنىنى قەستەن تولۇق سۆزلىمەي، دەرستىن كېيىن ھەقلىق تولۇقلاش قىلمىشلىرىنى قەتئىي تۈزەش ۋە تەرتىپكە سېلىش ئالاھىدە تەكىتلەنگەن.