شىنجاڭ ۋەكىللەر ئۆمىكى 16 كۈندە مول نەتىجىلەرنى قولغا كەلتۈرۈپ، بۇقىچىلاپ تارتىشىشنىڭ تۆت تۈرىدە 1 - لىككە ئېرىشتى

جىڭ بو خەۋەر قىلىدۇ: مەملىكەتلىك 10 - نۆۋەتلىك ئاز سانلىق مىللەتلەر ئەنئەنىۋى تەنھەرىكەت مۇسابىقىسىنىڭ بۇقىچىلاپ تارتىشىش تۈرىدە، شىنجاڭ ۋەكىللەر ئۆمىكى مول نەتىجىلەرنى قولغا كەلتۈرۈپ، تۆت تۈردە 1 - دەرىجىلىك، ئىككى تۈردە 2 - دەرىجىلىك مۇكاپاتقا ئېرىشتى.

　　بۇ قېتىم شىنجاڭ ۋەكىللەر ئۆمىكى بۇقىچىلاپ تارتىشىش مۇسابىقە تۈرىگە ئالتە ماھىرنى قاتناشتۇرغان بولۇپ، ھەممىسى بىردەك ھەل قىلغۇچ مۇسابىقىگە كىردى ھەم 55، 61، 68، 95 كىلوگىراملىقتىن ئىبارەت تۆت دەرىجە بويىچە 1 - دەرىجىلىك مۇكاپاتقا، 76، 85 كىلوگىراملىقتىن ئىبارەت ئىككى دەرىجە بويىچە 2 - دەرىجىلىك مۇكاپاتقا ئېرىشتى. بۇنىڭ ئىچىدە 55، 95 كىلوگىراملىقتىن ئىبارەت ئىككى دەرىجە بويىچە ئۇدا چېمپىيونلۇققا ئېرىشتى.
　　شىنجاڭ كوماندىسىنىڭ 3 - تۈر بويىچە 1 - لىكنى قولغا كەلتۈرۈشى ئاسانغا چۈشمىدى. پولات بۆكىي مۇسابىقىدە غەلىبە قىلغاندىن كېيىن، يۈرەك ۋە قان ئايلىنىشى سەل ئاجىزلاپ، مەيداندا يېتىپ قالدى ۋە نەپىسى سىقىلىپ ھاسىراپ تۇرۇپ: بۇ مۇسابىقە ھاياتىمدا ئەڭ چارچىغان بىر قېتىملىق مۇسابىقە بولدى، دەپ توۋلىدى.
　　كىچىك گۇرۇپپا مۇسابىقىسىدە، پولات ئىلگىرى خۇبېي ماھىرى بىلەن مۇسابىقىلىشىپ، 0 گە قارشى 2 نەتىجە بىلەن خۇبېي ماھىرىنى ئاسانلا يېڭىۋالغانىدى. ھەل قىلغۇچ مۇسابىقىدە، بۇ ماھىرنىڭ كۈچى پەرھات بىلەن تەڭلىشىپ، بىر - بىرىنى يېڭىشى تەسكە چۈشتى. مۇسابىقىدە، ئىككى قېتىملىق نەتىجە تەڭلىشىپ قالغاندا، پەرھات ۋاز كېچىشنى ئويلىدى، بىراق يەنە: مەن چېمپىيونلۇقنى كۆزلەپ مۇسابىقىگە قاتناشتىم، ئۆزۈمنى قويۇۋەتسەم بولمايدۇ، دېگەننى ئويلاپ، ئەڭ ئاخىرىدا 0 گە قارشى 2 نەتىجە بىلەن قارشى تەرەپنى يېڭىپ، چېمپىيۇنلۇققا ئېرىشتى.
بۇقىچىلاپ تارتىشىش مۇسابىقىسى بىر خىل ئۆمىلەپ تۇرۇپ ئارقان تارتىشىدىغان تەنتەربىيە تۈرى. مۇسابىقىلەشكەن ئىككى ماھىر مۇسابىقە مەيدانىنىڭ ئىككى تەرىپىدە تۇرىدۇ، ئىككىسىنىڭ بوينىغا بىر يىپەك لاتا باغلىنىدۇ، ئاندىن ئىككىسى بىر - بىرىگە قارشى يۆنىلىشتە ئۆمىلەپ تارتىشىپ، قارشى تەرەپنى بەلگىلەنگەن رايوندىن تارتىپ ئۆتكەن ماھىر يېڭىدۇ. بۇقىچىلاپ تارتىشىش زاڭزۇلار رايونىدا ئەڭ كەڭ تارقالغان، شۇڭا بۇ مۇسابىقە زاڭزۇچە ئارقان تارتىشىش دەپمۇ ئاتىلىدۇ. شىنجاڭ بۇقىچىلاپ تارتىشىش كوماندىسىنىڭ تىرېنېرى لۈ شىنگۈي مۇنداق دېدى: بۇ تۈر مۇسابىقىسى 2002 - يىلىدىن باشلاپ شىنجاڭدا ئۆتكۈزۈلدى، 2003 - يىلى ۋە 2007 - يىلى شىنجاڭ مەملىكەتلىك ئاز سانلىق مىللەتلەر تەنھەرىكەت مۇسابىقىسىگە قاتناشقاندا مۇكاپاتقا ئېرىشەلمىگەن. 2011 - يىلى شىنجاڭ كوماندىسىدا يېڭى كۈچلەر بارلىققا كېلىپ، تۆت تۈردە 1 - دەرىجىلىك ۋە بىر تۈردە 2 - دەرىجىلىك مۇكاپاتقا ئېرىشىپ، بۇقىچىلاپ تارتىشىش تۈرىدىكى كۈچلۈك كوماندا بولدى. لۈ شىنگۈي مۇنداق دېدى: بۇقىچىلاپ تارتىشىش تۈرىنىڭ مەيدان چەكلىمىسىگە ئۇچراش دەرىجىسى كىچىك بولۇپ، بۇ مۇسابىقىنى ئۆتكۈزۈش ئاسان، بىراق بۇ تۈر قارىماققا ئاددىي، ئۆگىنىش ئاسان بولسىمۇ، نەتىجە قازىنىش قىيىن. بۇقىچىلاپ تارتىشىشنىڭ جىسمانىي كۈچ، چىدامچانلىق، ئېتىلىش كۈچى ۋە تېخنىكىغا بولغان تەلىپى ناھايىتى يۇقىرى بولۇپ، بۇلارنىڭ بىرى كەم بولسا بولمايدۇ.