شىنخۇا ئاگېنتلىقى 15-مارت خەۋىرى (ئوكيان تورىدىن تۇرسۇنجان تەرجىمسى)

يەمەندە ئىچىملىك سۇ مەسىلىسى يەنىلا كىشىلەرنىڭ بېشىنى قاتۇرىۋاتقان مەسىلىلەرنىڭ بىرسى ھېسابلىنىدۇ. ئۇرۇش ئوتى قاپلىغان بۇ يەردە كىشىلەرنىڭ بىر كۈنلۈك تۇرمۇشى ئۈچۈن كېتىدىغان ئىچىملىك سۈيىنى تېپىشىمۇ بىر مەسىلە بولۇپ، كېلىماتنىڭ ئۆزگىرىشىمۇ بۇ يەرنىڭ ھۆل-يېغىن مىقدارىنى ئازايتىۋەتكەن. بىراق يېقىندا ب د ت يېڭىچە بىر تۈرگە ياردەم بەردى، بۇ دەل مەملىكەتنىڭ ھەرقايسى جايلىرىنى قاپلىغان تۇماندىن پايدىلىنىپ تۇماننى كوندېنساتسىيىلەش ئۇسۇلى ئارقىلىق سۇ يىغىۋېلىشتۇر. بۇ ئۇسۇل بارلىققا كەلگەندىن كېيىن كىشىلەر شادلىققا تولدى.

يەمەندە دائىم دېگۈدەك تۇمانلىق ھاۋارايى كۆرۈلىدۇ، كۈندە چۈشتىن كېيىندىن باشلاپلا ھەممە يەرنى تۇمان قاپلايدىغان بولۇپ، بۇ ھالەت تاكى ئەتىسى سەھەرگىچە داۋاملىشىدۇ. شۇ يەرلىك قەھۋە تېرىغۇچى دېھقانلار دائىم تاشلارنىڭ ياردىمىدە تۇماننى ئۈنۈملۈك ھالدا سۇ تامچىسىغا ئايلاندۇرۇپ تېرىلغۇنى سۇغۇرىدۇ. بۈگۈنكى كۈنگە كەلگەندە، شۇ يەرلىك خەلق 6 كۋادرات مېتىر كېلىدىغان ئالاھىدە ياسالغان تور ئارقىلىق تۇماننى سۇ تامچىسىغا ئايلاندۇرۇش ئۇسۇلىنى قوللانماقتا. ئىگىلىنىلىشىچە، بىر تال مۇشۇنىڭغا ئوخشاش توردىن يىغىۋېلىنغان سۇ 7 ئادەمنىڭ بىر كۈنلۈك سۇ ئىشلىتىش ئېھتىياجىنى قاندۇرالايدىكەن.

بۇ خىل ئۇسۇلنى پۈتۈنلەي يېڭىلىق دېيىشكىمۇ بولمايدۇ، چۈنكى چىلىي،ماراكەش،گۋاتېمالا، ھايتى قاتارلىق جايلاردا بۇخىل ئۇسۇل خېلى بۇرۇنلا سىناق قىلىنغان بولۇپ، 2003-يىلىدىن باشلاپلا يەمەن بۇ تۈرنى سىناق قىلىشقا باشلىغان. بىراق شۇنچە يىل ئۆتۈپ تا بۈگۈنگە كەلگەندە بۇ خىل ئۇسۇل رەسمىي تۈردە مەبلەغ سېلىنىلىدىغان ۋە تەرەقىي قىلدۇرىلىدىغان تۈر قاتارىغا كىرگەن.

نۆۋەتتە بىرلەشكەن دۆلەتلەر تەشكىلاتىنىڭ تۈر لاھىيەگە مەسئۇل ئورگىنى ۋە يەمەن دۆلەتلىك فوندى جەمئىيىتى بۇ تۈرنى كېڭەيتمەكچى بولىۋېتىپتۇ.