شىنجاڭ ‹‹ۋوجياڭ›› ئاياللار ۋاسكېتبول كوماندىسى ھەل قىلغۇچ مۇسابىقىدە تۇنجى مەيدان غەلىبىنى قولغا كەلتۈردى.

　　1 – مارت 2015 –2016 – يىللىق جۇڭگو ئاياللار ۋاسكېتبول بىرلەشمە مۇسابىقىسى (WCBA) ھەل قىلغۇچ مۇسابىقىسىنىڭ تۇنجى مەيدان مۇسابىقىسى بېيجىڭ ‹‹شۇگاڭ›› تەنتەربىيە سارىيىدا ئۆتكۈزۈلدى، شىنجاڭ ‹‹ۋوجياڭ›› ئاياللار ۋاسكېتبول كوماندىسى بېيجىڭ ‹‹شۇگاڭ›› ئاياللار ۋاسكېتبول كوماندىسى بىلەن مۇسابىقىلەشتى. ئىككى تەرەپ كەسكىن تىركىشىپ، ئاخىرىدا شىنجاڭ كوماندىسى 61 گە قارشى 70 نەتىجە بىلەن غەلىبە قىلدى. بۈگۈنكى مۇسابىقىدە كىشىلەرنىڭ دىققەت نۇقتىسى شىنجاڭ كوماندىسىدىكى چولپان پېڭ شىچىڭغا مەركەزلەشتى، ئۇ پۈتۈن مەيداندا ئەڭ يۇقىرى نومۇر، يەنى 25 نومۇر ئالدى، ئۈچ نومۇرلۇق توپتىن بەشنى كىرگۈزدى.

　　ھەل قىلغۇچ مۇسابىقىنىڭ كەيپىياتى، ھەل قىلغۇچ مۇسابىقىنىڭ بېسىمى ئاستىدا، شىنجاڭ كوماندىسى مۇسابىقە باشلانغاندىن كېيىنكى دەسلەپكى ھۇجۇم، مۇداپىئە ئەھۋالى تازا ئوڭۇشلۇق بولمىدى، نومۇردا ئارقىدا قېلىپ، بېيجىڭ كوماندىسى خېلىلا ئالدىغا ئۆتۈپ كەتتى. قىسقىغىنە تەڭشەشتىن كېيىن، شىنجاڭ كوماندىسى دىققىتىنى مەركەزلەشتۈرۈپ، 2 – چارەكتە تېخنىكىسىنى ئۆزگەرتىپ، ئۈچ نومۇرلۇق توپنى ئارقا – ئارقىدىن كىرگۈزۈپ، بېيجىڭ كوماندىسىغا يېتىشىۋالايلا دەپ قالدى. 3 – چارەكتە ئىككىلا تەرەپ مۇداپىئەنى پۇختا قىلىپ، پۈتۈن كۈچى بىلەن توپ تالاشتى، مۇسابىقە بەكلا قىزىدى، ئاخىرىدا 47 دە 47 نەتىجە بىلەن تەڭلىشىپ قالدى.

　　ھەل قىلغۇچ مۇسابىقىنىڭ 4 – چارەك مۇسابىقىسىدە، شىنجاڭ كوماندىسىدىكى قىزلار ئاتقانلىكى توپنى نىشانغا دەل تەگكۈزۈپ، شىنجاڭلىقلارنىڭ جاسارىتىنى، ئىشەنچىسىنى ئاشۇردى. ئاخىرىدا شىنجاڭ كوماندىسى 61 گە قارشى 70 نومۇر بىلەن ئۇتۇپ، تۇنجى غەلىبىنى قولغا كەلتۈردى.

　　مۇسابىقە ئاياغلاشقاندىن كېيىن، شىنجاڭ ئاياللار كوماندىسىنىڭ باش تىرېنېرى جەن شۇپىڭ نەق مەيداندا ئاياللار ۋاسكېتبول كوماندىسىغا مەدەت بەرگەن نەچچە يۈز توپ مەستانىسىگە چوڭقۇر تەزىم قىلدى. ئۇ: قەيەرگىلا بارمايلى، شىنجاڭلىق توپ مەستانىلىرى كوماندىمىزغا زور مەدەت بەردى، دېدى. ئەمما ئۇ شىنجاڭ كوماندىسىنىڭ مۇسابىقىدە غەلىبە قىلغانلىقىدىن ئۇنچىۋالا خۇش بولۇپ كەتمىگەنىدى. ئۇ مۇنداق دېدى: شىنجاڭ كوماندىسى بىر يېڭى قوشۇن، بىز باشتىن – ئاخىر بېيجىڭ كوماندىسىدىن ئۆگىنىش پوزىتسىيەسىدە بولۇپ كەلدۇق. بۈگۈنكى غەلىبە ھېچنېمىگە ۋەكىللىك قىلالمايدۇ، لېكىن شىنجاڭ ئاياللار ۋاسكېتبول كوماندىسىدىكى قىزلار ھەر بىر مەيدان مۇسابىقىنى ئەستايىدىل ئويناپ، ئاخىرغىچە تىرىشىپ، ھەر قايسى مۇسابىقە مەيدانلىرىدا شىنجاڭ روھىنى نامايان قىلدى.

　　3 – مارت ئىككى تەرەپ يەنە بىر مەيدان كۈچ سىنىشىدۇ، شىنجاڭ ئاياللار ۋاسكېتبول كوماندىسى ئۆز مەيدانىدا بېيجىڭ ئاياللار ۋاسكېتبول كوماندىسى بىلەن مۇسابىقىلىشىدۇ.