جۇڭگو بىرلەشمە خەۋەرلىشىش شىركىتى بۈگۈن 2015-يىللىق تىجارەت ئەھۋالىدىن دوكلات بەرگەن. سانلىق مەلۇماتتا كۆرسىتىلىشىچە، بىرلەشمە خەۋەرلىشىش شىركىتىنىڭ 2015-يىللىق سېتىشتىن كىرگەن ئومۇمىي كىرىمى 277.05 مىليارد يۈەن بولۇپ، ئالدىنقى بىر يىلدىكىدىن %2.7 تۆۋەنلىگەن؛ ساپ پايدا 10.56 مىليارد يۈەن بولۇپ، ئالدىنقى بىر يىلدىكىدىن %12.4 تۆۋەنلىگەن.

سانلىق مەلۇماتتا يەنە كۆرسىتىلىشىچە، بىرلەشمە خەۋەرلىشىش شىركىتىنىڭ 2015-يىللىق مۇلازىمەت كىرىمى 235.28 مىليارد يۈەن بولغان، بۇنىڭ ئىچىدە سۆزلىشىشنى ئۆز ئىچىگە ئالمايدىغان كەسپلەرنىڭ ئىگەللەش نىسبىتى ئالدىنقى يىلدىكىدىن %7.2 ئۆرلەپ، %69.1 گە يەتكەن، EBITDA كىرىمى 87.5 مىليارد يۈەن بولغان؛ 2015-يىللىق كاپىتال چىقىمى 133.88 مىليارد يۈەن بولغان.

كۆچمە ئالاقە كەسپى جەھەتتە، 2015-يىلى بىرلەشمە خەۋەرلىشىش شىركىتىنىڭ كۆچمە مۇلازىمەت كەسپىدىن ياراتقان كىرىمى 142.62 مىليارد يۈەن بولغان، شىركەتكە ئەمەلىي كىرىم يارىتىپ بېرىدىغان ئابونت سانى 252.32 مىليون بولغان. 2015-يىلىنىڭ ئاخىرىغىچە، بىرلەشمە خەۋەرلىشىش 4G تورىنى ئىشلەتكۈچى ئابونتلارنىڭ ئومۇمىي سانى 44.16 مىليون بولۇپ، ئىگەللىگەن نىسبىتى %17.5 گە يەتكەن.

مۇقىم كەڭ بەلباغلىق تور كەسپى جەھەتتە، 2015-يىلى، بىرلەشمە خەۋەرلىشىش شىركىتىنىڭ مۇقىم تور كەسپىنىڭ كىرىمى ئالدىنقى بىر يىلدىكىدىن %7.5 ئېشىپ، 53.96 مىليارد يۈەنگە يەتكەن؛ مۇقىم تور ئابونتلىرىنىڭ سانى %5.1 ئېشىپ، ئومۇمىي سانى 72.33 مىليونغا يەتكەن، بۇنىڭ ئىچىدە نۇر كابىلى يېتىپ بارغان ئاھالە (FTTH) نىسبىتى %50 دىن ئېشىپ كەتكەن؛ «ئەقلىي ئىقتىدارلىق ۋوجىيا» (智慧沃家) كەسپى ئابونتلىرىنىڭ سانى 9.59 مىليونغا يەتكەن.

4G ئاساس پونكىتى قۇرۇش جەھەتتە، 2015-يىلى، بىرلەشمە خەۋەرلىشىش شىركىتى 306 مىڭ 4G ئاساس پونكىتنى يېڭىدىن كۆپەيتكەن، 4G ئاساس پونكىتلىرىنىڭ ئومۇمىي سانى 399 مىڭغا يەتكەن، 4G تورى ئاساسىي جەھەتتىن شەھەر، ناھىيە بازىرى ۋە تەرەققىي قىلغان يېزا-بازارلارنى قاپلىغان.

كەڭ بەلباغ تورى قۇرۇلۇشى جەھەتتە، بىرلەشمە خەۋەرلىشىش شىركىتى ئۆتكەن بىر يىلدا پۈتۈنلەي نۇر كابىللىق تور بىلەن قاپلانغان ئالتە ئۆلكە ۋە 100 دىن ئارتۇق شەھەرنى بارلىققا كەلتۈرگەن، كەڭ بەلباغ تېرمىنال ئېغىزى سانىنىڭ ئېشىش نىسبىتى %22.2 گە يېتىپ، ئومۇمىي سانى 165 مىليون بولغان، بۇنىڭ ئىچىدە FTTX تېرمىنال ئېغىزى ئىگەللىگەن نىسبەت %93 بولغان.