جاھان ئاگېنتلىقى 16-مارت خەۋىرى؛ لەگلەك تورى تەرجىمىسى: يەمەندە ھۇسىي شىئە قۇراللىقلار، 57 كۈندىن بېرى تۇتقۇن قىلىۋالغان يەمەن باش مىنىستىرى خالىد باھھاھنى قۇيۇپ بەردى، باھھاھ بۇنىڭدىن بۇرۇن ۋەزىپىسىدىن ئىستىپا بەرگەن ئىدى.
يەمەندە شىئە ئەنسارۇللاھ ھەرىكىتى «ھۇسىيلەر» 57 كۈندىن بېرى تۇتقۇن قىلىۋالغان باش مىنىستىر خالىد باھھاھ ۋە باشقا مىنىستىرلارنى قۇيۇپ بەردى. باھھاھ ئىجتىمائى ئالاقە تورى فايىسبۇكتا ئېلان قىلغان باياناتىدا، «شىئە ئەنسارۇللاھ ھەرىكىتىنىڭ رەھبەرلىرى بىلەن بىرلەشكەن دۆلەتلەر تەشكىلاتى يەمەن ئالاھىدە ۋەكىلى جەمال ئىبنى ئۆمەرنىڭ تىرىشچانلىقى ۋە سىياسى ھەرىكەتلەر بىلەن پۇقراۋى جەمئىيەتلەرنىڭ چاقىرىقى سايىسىدە بۈگۈن ماڭا ۋە باشقا مىنىستىرلارغا يۈرگۈزۈلگەن قامال بىكار قىلىندى» دېدى.
باھھاھ، قامالنىڭ بىكار قىلىشىنىڭ ، يەمەن كىرزىسىدىكى تەرەپلەرنىڭ ب د ت نازارەتچىلىكىدە يۈرگۈزگەن سۆھبەتنىڭ ئىلگىرلىشىگە ھەسسە قوشىدىغانلىقىنى تىلغا ئالدى.
باھھاھ، 22-يانۋار ئىچكى كابىنېت ئەزالىرى بىلەن بىرلىكتە ئىستىپا بەرگەن بولۇپ، ھۆكۈمەتنىڭ دۆلەتنىڭ ھازىرقى ئەھۋالىدا ھاكىمىيەت يۈرگۈزۈشنى ئۈستىگە ئېلىش نىيىتى يوقلىقىنى تەكىتلەپ، سىياسىي ھەرىكەت ۋە گۇرۇپپىلارنى يەمەننىڭ مۇقىملىقى ۋە پۈتۈنلىكىنى قوغداشقا چاقىرغان ئىدى.
باھھاھ، ئۆيىدە 57 كۈن قامالدا تۇرغان مەزگىلنى «مىسلىسز بىر تەجرىبە» دەپ سۈپەتلەپ، سەنئادىن ئايرىلىپ ھەزەرمەۋتتىكى ئائىلىسىنى يوقلاش ئۈچۈن بارىدىغانلىقىنى بىلدۈردى.
يەمەندە ئىران قوللىشى ئاستىدىكى شىئە ئەنسارۇللاھ ھەرىكىتى، 4 ئايدىن بېرى يەمەن پايتەختى سەنئانى كونتروللىقىغا ئېلىۋالدى. ھۆكۈمەت بىلەن پايتەختكە بۈسۈپ كىرگەن ھۇسىي قۇراللىقلىرى ئارىسىدا 2014-يىلى 21-سىنتەبىردا «تىنچلىق ۋە مىللىي ھەمكارلىق كېلىشىمى» ئىمزالانغان ئىدى.