جۇڭگو ئۇيغۇرچە رادىيو تورى 10-ئىيۇن بېيجىڭ خەۋىرى:
دىپلوماتىيە مىنىستىرلىقىمىزنىڭ باياناتچىسى خوڭ لېي 7 دۆلەت گۇرۇھى باشلىقلار يىغىنىدىكى رەھبەرلەر خىتابنامىسىدىكى شەرقىي دېڭىز، جەنۇبىي دېڭىز مەسىلىسىگە ئالاقىدار مەزمۇنلارغا قارىتا تۈنۈگۈن قەرەللىك مۇخبىرلار يىغىنىدا مۇنۇلارنى بىلدۈردى: جۇڭگو 7 دۆلەت گۇرۇھىنى پاكىتقا ھۆرمەت قىلىپ، يان بېسىشتىن ساقلىنىپ، مەسئۇلىيەتسىز بارلىق گەپ سۆزلىرىنى توختىتىشقا دەۋەت قىلىدۇ.
خوڭ لېي مۇنداق دېدى: شەرقىي دېڭىز، جەنۇبىي دېڭىز مەسىلىسىدە جۇڭگو ھۆكۈمىتى پىرىنسىپال مەيدانىنى ئومۇميۈزلۈك شەرھىيلىدى.
ئۇ مۇنۇلارنى بىلدۈردى: جۇڭگو دىياۋيۇ ئارىلى ۋە ئۇنىڭغا قاراشلىق ئاراللار، نەنشا تاقىم ئارىلى ۋە ئۇنىڭ ئەتراپىدىكى دېڭىز ساھىلىگە مۇرەسسەسىز ئىگىلىك ھوقۇققا ئىگە، جۇڭگونىڭ نەنشا تاقىم ئارىلىدىكى خادا تاشتا قۇرۇلۇش ئېلىپ بېرىشى پۈتۈنلەي ئىگىلىك ھوقۇقلۇق دائىرىسىدىكى ئىش، ھەرقانداق دۆلەتنىڭ ئارىلىشىش ھوقۇقى يوق، ئالاقىدار قۇرۇلۇشلار تاماملانغاندىن كېيىن بەزى مۇداپىئە ئىشلىرىغا ئىشلىتىلگەندىن باشقا تېخىمۇ كۆپرەكى خەلق ئىشلىرىغا ئىشلىتىلىدۇ، بۇنداق قىلىش دېڭىز ئۈستىدە يول باشلاش، قۇتقۇزۇش قاتارلىق خەلقئارا مەجبۇرىيىتىنى تېخىمۇ ياخشى ئادا قىلىش ئۈچۈندۇر.
خوڭ لېي مۇنداق دەپ كۆرسەتتى: جۇڭگو شەرقىي دېڭىز، جەنۇبىي دېڭىزدا قاتناش ۋە ئۇنىڭ ھاۋا تەۋەلىكىدىن ئۇچۇپ ئۆتۈش ئەركىنلىكىنى قوغداشقا ئىزچىل كۈچەپ كەلدى، ئۇزاقتىن بۇيان، ھەرقايسى دۆلەتلەر خەلقئارا قانۇن بويىچە دېڭىز ساھىلىدا قاتناش ۋە ئۇچۇپ ئۆتۈشتە ھېچقانداق تەسىرگە ئۇچرىمىدى، ئەگەر بەزىلەر قەستەن ئىش تېرىپ، دېڭىز ساھىلىدا قاتناش ۋە ئۇنىڭدىن ئۇچۇپ ئۆتۈش ئەركىنلىكىگە تەھدىت سالماقچى بولىدىكەن، جۇڭگو دەس تۇرۇپ قەتئىي قارشى تۇرىدۇ.
خوڭ لېي مۇنداق دېدى: جۇڭگو 7 دۆلەت گۇرۇھىنى پاكىتقا ھۆرمەت قىلىپ، يان بېسىشتىن ساقلىنىپ، مەسئۇلىيەتسىز سۆزلەرنى قىلىشنى توختىتىپ، ماجىرانى مۇۋاپىق بىر تەرەپ قىلىشقا، رايونىنىڭ تىنچلىقى، مۇقىملىقىغا پايدىلىق ئىشلارنى كۆپرەك قىلىشقا دەۋەت قىلىدۇ.