[مۇئەللىم بولماق تەس ! (مەرھۇم رۇزى سايىتنىڭ « دېھقان بولماق تەس » ناملىق شېئىرىغا تەقلىد ) نۇرمۇھەممەت مۇھەممەتئىمىن ئادەم كۆپ جايلاردا سۆزلىشىپ بەس-بەس ، مۇئەللىمنىڭ كۈنىگە قىلمىغىن ھەۋەس . مۇئەللىم بۇلاركەن باسسا كىمنى نەس ، جاھاندا ھەممىدىن مۇئەللىم بولماق تەس . سودىدا تالاششاق گېرىكەن دەيدۇ ، يا كاسسىر مائاشنى جىق-جىق بەرمەيدۇ . پۇلى ئاز ئادەملەر سۇغۇق تەرلەيدۇ ، جاھاندا ھەممىدىن مۇئەللىم بولماق تەس . ئىشتىھار بار لېكىن يىيەلمەس پۈتۈن ، تويمىغان يېرىگە تويغىزار تۈتۈن . شۇ سەۋەپ چىرايى ئەمەستۇر سۈتۈن ، جاھاندا ھەممىدىن مۇئەللىم بولماق تەس . ئېسىلراق  كىيىمگە مائاش يەتمەيدۇ ، توك پۇلى سۇ پۇلى نېرى كەتمەيدۇ . توي-تۈكۈن مەرىكە بىزنى ئەپلەيدۇ ، جاھاندا ھەممىدىن مۇئەللىم بولماق تەس . ئىئانە ئەڭ ئاۋال يوقلايدۇ بىزنى ، بەرمىسەك باشلىقلا دوقلايدۇ بىزنى . جېق بەرسەك ئاياللا سوتلايدۇ بىزنى ، جاھاندا ھەممىدىن مۇئەللىم بولماق تەس . خىزمەتنىڭ دەستىدىن نەچچىمىز بويتاق ، كىر يوتقان كىر كۆرپە ئىشتانلا شالتاق . بويتاققا ھەمرا كەن رەتلەنمەس ياتاق ، جاھاندا ھەممىدىن مۇئەللىم بولماق تەس . پۇلى ئاز نامرات دەپ قىزلا تەگمەيدۇ ، پۇل تېپىش پۇرسىتى بىزگە كەلمەيدۇ . مۇئەللىمنىڭ دەردىنى قىزلا بىلمەيدۇ ، جاھاندا ھەممىدىن مۇئەللىم بولماق تەس . كەپتۇرار ھەپتىدە باھالاش ئۈمەك ، ئۇلارغا ھەقىقى سان ساناق كېرەك . ئىشلەيسەن نەچچە رەت ئارخىپنى دىمەك ، جاھاندا ھەممىدىن مۇئەللىم بولماق تەس . باشلىقلار تۇرىدۇ خۇددى داھىدەك ، ئىشلەيمىز بىز خۇددى باخشۇ يايىدەك . بىز ماتا ئۇلاردۇر ئەتلەس شايىدەك ، جاھاندا ھەممىدىن مۇئەللىم بولماق تەس . 10-سىنتەبر بايرام كۈنىمىز ، دەرت چەككەن بولساقمۇ مەجبۇر كۈلىمىز . شەرەپكەن مەيدىگە قىسقان گۈلىمىز ، جاھاندا ھەممىدىن مۇئەللىم بولماق تەس . مۇشەققەت دەستىدىن ئاقارسىمۇ چاچ ، ئۈمۈدۋار بوپ كەلدۇق پارتىيە بولغاچ . مىڭ شۈكرى قالمىدۇق لېكىن يالىڭاچ ، جاھاندا ھەممىدىن مۇئەللىم بولماق تەس . يەتمىگەچ بىراۋغا بىزدىن قىلچە نەپ ، ھاجەتمەن بوپ بارساق قۇيار ئەدەپلەپ . مەسخىرە قىلىدۇ ئەپەندىكەن دەپ ، جاھاندا ھەممىدىن مۇئەللىم بولماق تەس . بىر سائەت سورىساڭ مائاشىڭ كەمدۇر ، تاقابىل تۇرمىقىڭ ئۈلۈمگە تەڭدۇر . سىردىشىڭ بور كىتاپ دوسكا ھەم رەڭدۇر ، جاھاندا ھەممىدىن مۇئەللىم بولماق تەس . مەكتەپتە مۇھىمى ئوقۇ-ئوقۇتۇش ، سەبىيلەر قەلبىنى پەندە يۇرۇتۇش . ھالبۇكى ئۇنتۇلدى بۇ مۇقەددەس بۇرچ . جاھاندا ھەممىدىن مۇئەللىم بولماق تەس . تەكشۈرەر پات-پاتلا تەييارلىق قېنى ، تەييارلاپ تۇرمىساڭ چىقىدۇ جېنى . كىچىك پىت ھەممىدىن قىينايدۇ سىنى ، جاھاندا ھەممىدىن مۇئەللىم بولماق تەس . ھەركۈنى بار ساڭا ئالىي يول-يۇرۇق ، چۇلاڭ يوق مۈگدەيدۇ غېرىپ تاپشۇرۇق . ئاخشىمى ئۆيۈڭنىڭ چىرىغى يۇرۇق ، جاھاندا ھەممىدىن مۇئەللىم بولماق تەس . سانى يوق تازىلىق سانى يوق ئەمگەك ، بۇ دىمەك چارچاشتىن ھالىدىن كەتمەك . كۈنىمىز ساختىلىق يوقنى بار ئەتمەك ، جاھاندا ھەممىدىن مۇئەللىم بولماق تەس . توشقۇزماي قۇيۇپ باق بىر كاتەكنى ئاق ، كىملەدۇر دوق قىلىپ تويغۇزىدۇ جاق . بۇرمىلاپ قەستەنلا چىقىرار چاتاق ، جاھاندا ھەممىدىن مۇئەللىم بولماق تەس . دەرتلەر كۆپ ئاڭلاشقا ئادەم يوق بىراق ، بىز شۇنداق تىنىمسىز كۆيگەن شام-چىراق . يۈرەكنى ئۆرتەيدۇ ھەسرەتلىك پىراق ، جاھاندا ھەممىدىن مۇئەللىم بولماق تەس . يازغىنىم ئىشەنسەڭ ھېچ يالغان ئەمەس ، بىر ئۆمۈر يازساممۇ دەردىم تۈگىمەس . توختىتاي سۈزۈمنى ئەمدى بولدى بەس ، تەس دىسە جاھاندا مۇئەللىم بولماق تەس !