ئالىي مەكتەپكە ئۆتكەن قىزلار ئوقۇش ياردەم پۇلىغا ئىلتىماس قىلسا بولىدۇ.

شىنجاڭ ئاياللار، بالىلار تەرەققىيات فوندى يېقىندا 2013- يىللىق «مېھرىبانلىق يەتكۈزۈپ بىر يۈەن ئىئانە قىلىش» ئۇقتۇرۇشىنى چىقىرىپ، بۇ يىل ئالىي مەكتەپكە بارىدىغان، ئائىلىسى نامرات 200 قىز ئىستودېنتقا 2000 يۈەندىن ئوقۇش ياردەم پۇلى بەرمەكچى بولۇۋاتىدۇ.
ئوقۇش ياردەم پۇلىغا ئېرىشىدىغان ئوقۇغۇچى چوقۇم ئاپتونوم رايونىمىزنىڭ 2013- يىللىق ئادەتتىكى ئالىي مەكتەپ ئىمتىھانىغا قاتناشقان، ئائىلىسى نامرات قىز ئوقۇغۇچى بولۇشى ھەمدە ئىمتىھان نەتىجىسى ئادەتتىكى ئالىي مەكتەپلەرنىڭ 2013- يىللىق ئوقۇغۇچى قۇبۇل قىلىشتىكى تولۇق كورس 2- تۈركۈمدىكى كەسىپلەرگە ئوقۇغۇچى قۇبۇل قىلىش نومۇر چېكىدىن يۇقۇرى بولۇشى كېرەك.
ئوقۇش ياردەم پۇلىغا ئىلتىماس قىلىدىغان قىز ئوقۇغۇچىلار 7- ئاينىڭ 20- كۈنى سائەت 16:30 دىن بۇرۇن تىزىملاش جەدۋىلى، كىملىكى، ئاپتونوم رايونىمىزنىڭ 2013- يىللىق ئادەتتىكى ئالىي مەكتەپ ئىمتىھانىغا قاتنىشىش كېنىشكىسىنىڭ كۆپەيتىلگەن نۇسخىسى، شەھەر- بازار ئاھالىلىرىنىڭ تۆۋەن تۇرمۇش كاپالىتىدىن بەھرىمەن بولۇش ئىسپاتى، يېزا، كەنت ئاھالىلىرىنىڭ تۆۋەن تۇرمۇش كاپالىتىدىن بەھرىمەن بولۇش ئىسپاتى ياكى ئۆزى تۇرۇشلۇق مەھەللە باشقارمىسى، يېزا، بازارلارنىڭ نامراتلىق ئىسپات خېتىنىڭ كۆپەيتىلگەن نۇسخىسى ھەمدە شۇ يەرلىك ھۆكۈمەتنىڭ مۇشۇ تۈر خىزمىتىگە مەسئۇل خادىمنىڭ ئىسمى  ۋە  ئالاقىلىشىش ئۇسۇلى قاتارلىق ماتېرىياللارنى شىنجاڭ ئاياللار، بالىلار تەرەققىيات فوندىغا تاپشۇرۇپ بەرسە بولىدۇ.