ئارگېنتىنادىكى ئوقۇتقۇچىلار ئىش تاشلىدى

چەت ئەل تاراتقۇلىرىنىڭ خەۋەر قىلىشىچە، 25-فېۋرال ئەسلىدە ئارگېنتىنانىڭ يېڭى ئوقۇش مەۋسۈمىنىڭ بىرىنچى ئوقۇتۇش كۈنى ئىدى، بىراق ئوقۇتقۇچىلار بىلەن ھۆكۈمەت ئوتتۇرسىدىكى مۇئاش سۆھبىتى ئانچە ئوڭۇشلۇق بولمىغانلىقى ئۈچۈن، پۈتۈن مەملىكەتتىكى 16 ئۆلكىدىكى باشلانغۇچ مەكتەپ ۋە يەسلى ئوقۇتقۇچىلىرى شۇ كۈنى كوللىكتىپ ھالدا ئىش تاشلىغان.

يېقىنقى ئىككى يىلدىن بۇيان، ئارگېنتىنادا پۇل پاخاللىقى ئېغىرلاشتى، ئوقۇتقۇچىلار ئويۇشمىسى كۆپ قېتىم ھۆكۈمەت بىلەن مۇئاش قوشۇپ بېرىش توغرىسىدا سۆھبەت ئېلىپ باردى، ھازىرمۇ سۆھبەت داۋاملاشماقتا، پۈتۈن مەملىكەتتىكى ھەرقايسى ئۆلكىلىك ئوقۇتقۇچىلار ئۆزلىرىگە %30 مۇئاش قوشۇپ بېرىشنى تەلەپ قىلىۋاتىدۇ، بىراق ھەرقايسى يەرلىك ھۆكۈمەتلەر %22 تىن %25 كىچە مۇئاش قوشۇپ بېرىشكە قوشۇلغان بولۇپ، ئىككى تەرەپ زادىلا كىلىشەلمىدى.

ھەرقايسى ئۆلكىلىك ئوقۇتقۇچىلار ئويۇشمىسىنىڭ ئاشكارىلىغان ئۇچۇرلىرىغا ئاساسلانغاندا، 26-فېۋرال پۈتۈن مەملىكەت دائىرىسىدە كۆپ قىسىم ئوقۇتقۇچىلار يەنىلا ئىش تاشلاشنى داۋاملاشتۇرغان. ئىگىلىنىشىچە، بۇنىڭ تەسىرىدە پۈتۈن مەملىكەتتىكى بەش مىليوندىن ئارتۇق باشلانغۇچ مەكتەپ ۋە يەسلى ئوقۇغۇچىلىرى ئوقۇشسىز قالغان.