دۇنيا خەۋەرلىرى تورى 13-ئاپرېل خەۋىرى؛ لەگلەك تورى تەرجىمىسى: سۇدان خەلقى پرېزىدېنت سايلىمىغا قاتنىشىش ئۈچۈن دۈشەنبە كۈنى بىلەت تاشلاشنى باشلىدى. ھازىرقى نەتىجىلەرگە قارىغاندا 25 يىلدىن بۇيان دۆلەتنى ئىدارە قىلىۋاتقان ئۆمەر بەشىرنىڭ قايتىدىن سايلىنىشى مۆلچەرلەنمەكتە. سۇداندىكى بۇ قېتىملىق سايلامدا خەلق ۋەكىللىرى ۋە دۆلەت رەئىسى سايلىنىدۇ، سۇداندا يېقىندىن بۇيان ھۆكۈمەت قىسىملىرى بىلەن «سۇدان خەلق ئەركىنلىك ھەرىكتى» ناملىق قۇراللىق گۇرۇپپىلار ئارىسىدا تۇقۇنۇشلار يۈز بېرىۋاتىدۇ. پرېزىدېنت ئۆمەر بەشىر باشچىلىقىدىكى مىللى قۇرۇلتاي پارتىيىسىنىڭ قايتىدىن ھاكىمىيەت بېشىغا چىقىشى ئېنىق دەپ قارالماقتا. 13 مىلىيۇن سايلامغا قاتناشقۇچىنىڭ ئۈچ كۈن ئىچىدە 11 مىڭ سايلام بىلەت تاشلاش ئورنىدا ئاۋاز بېرىش خىزمىتى تۇنجى كۈنىدە كۈتۈلگەن مىقداردا بولمىدى. دۆلەتتىكى ئاساسلىق ئۆكتىچى پارتىيە سۇداندىكى ئىچكى تۇقۇنۇشلارنىڭ توختىتىلىشى ۋە ئۆكتىچى سىياسەتچىلەر بىلەن مۇخبىرلارنىڭ تۈرمىدىن قۇيۇپ بېرىلىشىنى تەلەپ قىلىپ سايلامنى بايقۇت قىلماقتا. ئۆمەر بەشىرنىڭ سايلامدا 14 نەپەر رەقىبى بار، ئەمما بۇلارنىڭ كۆپىنچىسى بىلەت تاشلىغۇچىلارغا نىسبەتەن ئانچە تونۇش ئەمەس.
سۇدانلىق 22 ياشلىق ئوقۇغۇچى ئابدۇللاھ ئابدۇرراھمان مۇخبىرغا مۇنداق دېدى؛ «سايلام نەتىجىسى ئېنىق بولغانلىقى ئۈچۈن سايلامغا قاتناشمايمىز، بىز قىلىدىغان ئەڭ ياخىشى ئامال سايلامنى بايقۇت قىلىش. بىز سايلامنى كۆزەتكۈچىلەرگە ئىشەنمەيمىز، چۈنكى ئۇلار ھۆكۈمەت تەرىپىدىن تەھدىتكە ئۇچرايدۇ، ھۆكۈمەت سايلامدا ھىيلە ئىشلىتىشنى ناھايتى ياخشى بىلىدۇ، سۇداندا ئۆزگىرىش بىر رەھبەر باشچىلىقىدىكى ئىنقىلاب بىلەن بولىدۇ، ئەمما ھازىر ئۇنداق رەھبەر يوق» دەپ سۆز قىلدى.
19 ياشلىق ئەلى سالىھ؛ «دۆلەتنى باشقۇرۇشنى بىلىدىغان بىردىنبىر كىشى ئۆمەر بەشىر بولغاچقا ئۇنىڭغا بىلەت تاشلايمەن» دېدى. 61 ياشلىق سائاد ئەلدىن ئوسمان مۇخبرىغا؛ «مىللەتنىڭ كەلگۈسى ئۈچۈن سايلامغا قاتنىشىدىغانلىقىنى ۋە ئۆمەر بەشىرگە بىلەت تاشلايدىغانلىقىنى» ئېيتتى.
سۇداندىكى ئۆكتىچى رەھبەر ھەسەن تۇرابى سايلامنى بايقۇت قىلىدىغانلىقىنى ئۆتكەن يىلى ئۆكتەبىردە ئېلان قىلغان ئىدى. 1989-يىلىدا ئۆمەر بەشىرنى ھاكىميەتكە چىقارغان سىياسىي ھەرىكەتنىڭ ئەڭ مۇھىم رەھبىرى بولغان ھەسەن تۇرابى، 10 يىلدىن كېيىن بەشىر بىلەن يولىنى ئايرىپ مىللى قۇرۇلتاي پارتىيسىدىن ئىستىپا بەرگەن ۋە ئۆزى مۇستەقىل پارتىيە قۇرغان.
سۇداندىكى سايلام ساندۇقلىرىنى 75 مىڭ ساقچى قوغدايدۇ، بۇ قېتىملىق سايلام خىزمىتىنى ئەرەب ئەللىرى ئىتتىپاقى، ئافرىقا ئىتتىپاقى، ئىسلام ھەمكارلىق تەشكىلاتى قاتارلىقلار كۆزىتىدۇ. سايلام بىلەتلىرى 15-ئاپرېلدا ساناپ چىقىلىدۇ، سايلام نەتىجىسى 270ئاپرېل ئېلان قىلىنىدۇ.