ئامېرىكا زۇڭتۇڭى ئوباما بىلەن كۇبا رەھبىرى لاۋور كاستىرو 11-ئاپرېل پانامانىڭ پايتەختىدە ئۆتكۈزۈلگەن 7- قېتىملىق ئامېرىكا قىتئەسى باشلىقلىرى يىغىنى مەزگىلىدە ئۇچراشتى، ئىككى تەرەپ ئىككى دۆلەت مۇناسىۋىتىنى نورماللاشتۇرۇش مۇساپىسىگە داۋاملىق تۈرتكە بولىدىغانلىقىنى بىلدۈرۈشتى.
لاۋور كاستىرو مۇنداق دېدى: كۇبا بىلەن ئامېرىكا رەھبەرلىرى ئىختىلاپ بارلىقىنى ئېتىراپ قىلدى، بىراق ئۈستەل ئۈستىگە قويۇپ سۆھبەتلەشكىلى بولمايدىغان مەسىلە يوق. مەن بەزى نازۇك مەسىلىلەردە پىكىر ئالماشتۇرۇشقا تەييارلىق كۆرۈپ قويدۇم.
كۇبانىڭ دىپلوماتىيە مىنىستىرى رودىرگىس مۇخبىرلار يىغىنىدا مۇنداق دېدى: كۇبا بىلەن ئامېرىكا رەھبەرلىرىنىڭ ئۇچرىشىشى ئۆز ئارا ھۆرمەت قىلىش ۋە ئىجابىي خاراكتېرلىك كەيپىياتتا ئىلىپ بېرىلدى. ئىككى تەرەپ دىپلوماتىك مۇناسىۋىتىنى ئەسلىگە كەلتۈرۈش مۇساپىسىدا، ئۆز ئارا مەنپەئەت يەتكۈزۈش ھەمكارلىقى ۋە مۇناسىۋەتنى نورماللاشتۇرۇش قەدىمى قاتارلىق مەسىلىلەردە پىكىر ئالماشتۇردى. ئىككى تەرەپ يەنە دىپلوماتىك مۇناسىۋەتنى ئەسلىگە كەلتۈرۈشكە مۇۋاپىق شارائىت يارىتىشنىڭ مۇھىملىقى توغرىسىدا ئورتاق تونۇش ھاسىل قىلدى.