13 ياشلىق پەلەستىنلىك قىز 23-يانۋار پەلەستىن ئىئوردان دەرياسىنىڭ غەربىي قىرغىقىدىكى يەھۇدىيلار ئولتۇراق نۇقتىسىدا پىچاق بىلەن ئىسرائىلىيەنىڭ ساقچىسىغا ھۇجۇم قىلماقچى بولغاندا، ئېتىپ تاشلانغان.

          ئىسرائىلىيە ساقچىلىرىنىڭ باياناتچىسىنىڭ دېيىشىچە، دەسلەپكى قەدەمدە تەكشۈرۈشكە ئاساسلانغاندا قىزنىڭ ئىسمى رۇقىيە ئەبۇ ئېيد بولۇپ، ئىئوردانە دەرياسىنىڭ غەربىي قىرغىقىدىكى ئاناتا كەنتىدە تۇرىدىكەن.

باياناتچىنىڭ قارىشىغا ئاساسلانغاندا، رۇقىيە «ئۆلۈمنى ئىستىگەن». ئۇ ئىسرائىلىيە ساقچىسىغا ئېتىلىپ كەلگەندە، «ساقچى ئوق چىقىرىپ ئۇنى ئېغىر يارىدار قىلغان، دوختۇر كېيىن ئۇنىڭ ئۆلگەنلىكىنى جاكارلىغان».

ساقچىنىڭ دېيىشىچە، رۇقىيەنىڭ دادىسى ئەينى چاغدا قىزىنى ئىزدەۋاتقان بولۇپ، نەق مەيدانغا يېتىپ كەلگەندا ئاللىقاچان كېچىككەن. ساقچىلار ئۇنىڭ قىزىنىڭ نېمە ئىش قىلماقچى بولغانلىقىنى بىلىدىغان بىلمەيدىغانلىقىنى سوراق قلغان، كېيىن دادىسىنى قويۇۋەتكەن.

ئىسرائىلىيە تېلېۋىزىيە ئىستانسىسى تارقاتقان كۆزىتىش كامېراسى سىن فىلىمىدا كۆرسىتىلىشىچە، قوراللىق ساقچى ئولتۇراق رايوننىڭ كىرىش ئېغىزىغا قېچىپ كەلگەن، ئارقىسىدىن بىر قىز ئەگەشكەن بولۇپ، ئۇنىڭ قولىدا پىچاققا ئوخشاش نەرسە بار ئىكەن.

رۇقىيەنىڭ ئائىلىسىدىكىلەر ئۇنىڭ ئۆلۈم خەۋىرىنى دەلىللىدى. ئانىسى رىدا ئەبۇ ئېيد قىزىنىڭ شۇ كۈنى ئۆيدىن چىققاندا ھېچقانداق مەسىلە يوقلىقىنى ئېيتتى.

پەلەستىن ئەمەلدارى دېيىشىچە، ئىسرائىلىيە ساقچىلىرى رۇقىيەنىڭ جەسىتىنى ئائىلىسىدىكىلەرگە قايتۇرۇپ بەرگەن. ئىسرائىلىيە مېدىيەلىرىنىڭ خەۋەر قىلىشىچە، رۇقىيەنىڭ نامىزى 24-يانۋار چۈشۈرۈلگەن.