بۇلۇت سۇپىسى ھېسابلاش مۇلازىمىتى تەمىنلەش كارخانىسى Akamai ئېلان قىلغان ئەڭ يېڭى دوكلاتتا كۆرسىتىلىشىچە، 2013-يىلى 4-پەسىلدە، يەرشارى مىقياسى بويىچە ئېلىپ بىرىلغان تور ھۇجۇمىنىڭ يېرىمى دېگۈدەك جۇڭگو چوڭ قۇرۇقلۇقىدىن كەلگەن، ئۇندىن باشقا، كورىيە ھېلىھەم دۇنيا بويىچە ئوتتۇرىچە تور سۈرئىتى ئەڭ تېز بولغان دۆلەت بولۇپ تۇرغان.
Akamai تەمىنلىگەن سانلىق مەلۇماتلارغا ئاساسلانغاندا، بۇلتۇر 4-پەسىلدە يەرشارى بويىچە ئېنىقلانغان تور ھۇجۇمىنىڭ %43 ى جۇڭگودىن كەلگەن بولۇپ، بۇنىڭ نىسبىتى باشقا ھەرقانداق دۆلەت ۋە رايوننىڭكىدىن ئېشىپ كەتكەن.

تىلغا ئېلىشقا ئەرزىيدىغىنى شۇكى، بۇ ھەرگىزمۇ بارلىق تور ھۇجۇمى جۇڭگو چوڭ قۇرۇقلۇقىغا ئالاقىدار دىگەنلىك ئەمەسكەن. Akamai تەرەپ پەقەت IP ئادرىسىغا ئاساسلىنىپ تۇرۇپ، ھۇجۇم قىلغۇچىنىڭ كېلىش مەنبەسىنى ئىزدەيدىغان بولۇپ، ھەقىقىي ھۇجۇم قىلغۇچىنىڭ سالاھىيىتىنى بېكىتىشكە ئامالسىزكەن. مەسىلەن، بىر روسىيەلىك جىنايەت ئۇنسۇرى جۇڭگو چوڭ قۇرۇقلۇقىنىڭ تور سىستېمىسىغا بۆسۈپ كىرىش ئارقىلىق، باشقا يەرلەرگە قارىتا تور ھۇجۇمى ئېلىپ بارالايدىكەن.
بۇندىن باشقا، بۇلتۇر 4-پەسىلدە، ئامېرىكا دۇنيادىكى بارلىق تور ھۇجۇمى مىقدارىنىڭ %19 ىنى ئىگەللىگەن، كانادا %10 ىنى ئىگەللىگەن، ھىندونېزىيە %5.7 نى، تەيۋەن %3.4 نى ئىگەللىگەن. ئومومەن ئالغاندا، Akamai تەرەپ بايقىغان ھۇجۇم مەنبەسىنىڭ ئادرىسى دۇنيادىكى 188 دۆلەت ۋە رايونغا تارقالغان.

Akamai تەرەپ يەنە پۈتۈن دۇنيادىكى ھەرقايسى دۆلەت ۋە رايونلارنىڭ تور سۈرئىتىگە قارىتا سېلىشتۇرما ئانالىز ئېلىپ بارغان. بۇلتۇر 4-پەسىلدە، يەرشارىنىڭ ئوتتۇرىچە تور سۈرئىتى %5.5 ئېشىپ، ئوتتۇرىچە تور سۈرئىتى3.8Mbps گە يەتكەن. ئوتتۇرىچە چوقا قىممىتى %30 ئېشىپ، 23.2Mbps گە يەتكەن.
سانلىق مەلۇماتلاردا كۆرسىتىلىشىچە، كورىيە ھازىرمۇ ئوتتۇرىچە تور سۈرئىتى دۇنيا بويىچە ئەڭ تېز دۆلەت بولۇپ، دۆلەتنىڭ ھەرقايسى جايلىرىدىكى ئوتتۇرىچە تور سۈرئىتى 21.9Mbps گە يېتىدىكەن، چوقا قىممىتى ئەڭ يۇقىرى بولغىنى شىياڭگاڭ بولۇپ، ئەڭ تېز تور سۈرئىتى 68Mbps گە يەتكەن. ئامېرىكىنىڭ ئوتتۇرىچە تور سۈرئىتى 10Mbps بولۇپ، چوقا قىممىتى 43.7Mbps ئىكەن.
كۆچمە تېرمىنال جەھەتتىكى ئوتتۇرىچە تور سۈرئىتى ئوتتۇرىسىدىمۇ زور پەرق مەۋجۇت بولۇپ، ئەڭ تۆۋەن قىممەت0.6Mbps ، ئەڭ يۇقىرى قىممەت 8.9Mbps بولغان. كۆچمە تور ئېقىم مىقدارىمۇ تېز سۈرئەتتە ئېشىپ بېرىۋاتقان بولۇپ، سانلىق مەلۇماتلاردا كۆرسىتىلىشىچە، 2013-يىلى 4-پەسىل ئىچىدە، يەرشارى مىقياسىدىكى كۆچمە تور سانلىق مەلۇمات ئېقىم مىقدارى ئوخشاش مەزگىلدىكىدىن %70 ئاشقان.