ئىنساننىڭ ھاياتى قىممەتلىك بولۇپ، كىشىگە پەقەت بىرلا قېتىم كېلىدۇ. شۇڭا، ھاياتنى قەدىرلەپ، ئۇنىڭدىن ئۈنۈملۈك پايدىلىنىش، ئۇنى نۇرلاندۇرۇش ھەركىمنىڭ ئۆزىگە باغلىق. ۋاقىت بولسا ئىنسانغا بېرىلگەن ئەڭ چوڭ سوۋغا، ھاياتلىق بىزگە ئەنە شۇنداق قىممەتلىك سوۋغىنى بەرگەن ئىكەن، ئەنە شۇ قىسقىغىنا قىممەتلىك ھاياتىمىزدا شانلىق ئىزلارنى قالدۇرۇپ، ھاياتىمىزنى مەنىلىك ئۆتكۈزۈشىمىز زۆرۈر.    كىشىلىك تۇرمۇش گويا بىر ئەينەك، سىز ئۇنىڭغا قانداق قارىسىڭىز، ئۇمۇ سىزگە شۇنداق قارايدۇ. رېئال تۇرمۇش ھامان ئەمەلىي سىناقلار بىلەن تولغان بولىدۇ. ئارىمىزدا داڭلىق مەكتەپلەرنى پۈتكۈزۈپ كەلگىنى بىلەن ھېچ ئىش قىلالمايدىغان، پۇرسەتنى قولدىن بېرىپ قويىدىغانلارمۇ ئاز ئەمەس. ئىش ئورنىغا ئېرىشەلمەسلىك ھەرگىزمۇ تەلەيسىزلىك ئەمەس، بەلكى شۇنىڭغا لايىق ئىجتىھات قىلغان – قىلمىغانلىقى، تىرىشچانلىق كۆرسەتكەن – كۆرسەتمىگەنلىكى، پۇرسەتنى ئىگىلىگەن – ئىگىلىمىگەنلىكىگە باغلىق بولىدۇ. ھەر قانداق كىشى ئۆز غايىسىنى ئەمەلگە ئاشۇرىمەن دەيدىكەن، جاپا – مۇشەققەت، ھېرىپ – چارچاش ۋە شۇنىڭدەك تۈرلۈك قىيىنچىلىقلار ئۈستىدىن غالىب كېلىپ، ئەمەلىي سىناقلاردىن قورقماي، قىيىن ئۆتكەلگە جەڭ ئېلان قىلىش روھى بىلەن ھەر بىر قەدەمنى دادىل، پۇختا بېسىشقا توغرا كېلىدۇ. لېكىن رېئال تۇرمۇشتا بىر قىسىم ياشلىرىمىز چوڭ – چوڭ ئىشلارنى قىلىشنى ئارزۇ قىلسىمۇ، كىچىككىنە جاپا – مۇشەققەت ئالدىدا ئاسانلا بەل قويۇۋېتىپ، ھېچ ئىشتىن نەتىجە چىقىرالماي، قىيىنچىلىق ئالدىدا چېكىنىدۇ. بەزىلەر ئۆزىگە قاتتىق تەلەپ قويۇپ تىرىشىپ ئۆگىنىدۇ ۋە كەسىپتە ئەستايىدىل ئىزدىنىپ، ئۇتۇق قازىنىدۇ. چۈنكى ئۇلار ھاياتىنى بىر مىنۇتمۇ مەنىسىز ئۆتكۈزۈشنى خالىمايدۇ، قىيىنچىلىق، خەۋپ – خەتەر ئالدىدا باش ئەگمەي، ئۆز غايىسىنى، ئارزۇسىنى تىرىشىپ – تىرمىشىپ ئىشقا ئاشۇرىدۇ. شۇنى بىلىش كېرەككى، ئادەم ئۈچۈن كىشىلىك تۇرمۇش بىر سەھنە، بۇ سەھنىدە ھەممە ئادەم ئۆز ماھارىتىنى كۆرسىتىشى كېرەككى، تىرىكتاپ، ھۇرۇنلارغا ئەسلا ئورۇن يوق! بىزدە ‹‹تەدبىرىڭ قانداق بولسا، تەقدىرىڭ شۇنداق بولىدۇ›› دېگەن ھېكمەت بار، بۇ يەردىكى تەدبىرلىك بولۇش دېگەنلىك دەل كىشىلىك تۇرمۇشتىكى بىر سىناق بولۇپ، ئۇ پۇرسەت، ئىجتىھات، پەم – پاراسەت قاتارلىق مەسىلىلەرنى تەدبىر بىلەن ئۈنۈملۈك ھەل قىلىشنى، توختاۋسىز تىرىشىش، قىيىنچىلىقلارنى قەتئىي يېڭىش ئىشەنچىسى ئارقىلىق ھەل قىلىشنى تەكىتلەيدۇ. دېمەك، ھەرقانداق بىر ياش ئارزۇسىنى ئەمەلگە ئاشۇرۇش ئۈچۈن، توختاۋسىز ئىزدىنىشى ۋە ئەقىل – پاراسىتىنى ئۇرغۇتۇشى كېرەك. ئۇنداق بولمىغاندا رولسىز ئاپتوموبىلغا، نىشانسىز پاراخوتقا ئوخشاپ قالىدۇ. سىزنىڭ رېئاللىققا، تۇرمۇشقا تۇتقان پوزىتسىيەرىڭىز ئەمەلىيەتتە دەل ئۆزىڭىزگە تۇتقان پوزىتسىيەرىڭىزدۇر. مانا بۇنى چوڭقۇر ھېس قىلىپ يەتكەندىلا، ئاندىن ھاياتنىڭ ھەربىر قەدىمىنىڭ ئەمەلىي سىناقلار بىلەن تولغانلىقىنى ھېس قىلغىلى، شۇنداقلا ھەر خىل سىناقلاردىن ئوڭۇشلۇق ئۆتۈپ، غەلىبە مەنزىلىگە قاراپ ئىلگىرىلىگىلى بولىدۇ. بەزىدە كىشىلىك تۇرمۇشتىكى ئويلىمىغان ئەگرى – توقايلىق، مۈشكۇلاتلار، تالاي قېتىم يىقىلىشلار ئادەمگە ئورنىدىن قانداق تۇرۇشنى ئۆگىتىدۇ، مەغلۇبىيەتنىڭ كىشىگە ئاتا قىلىدىغىنى ھەرگىزمۇ پۇشايمان بولماستىن، ئەكسىنچە تەجرىبە – ساۋاقتۇر، يىقىلغان جايىدىن دەس تۇرالماسلىقنىڭ ئۆزى ئىنسان ئۈچۈن ئەڭ چوڭ ھاماقەتلىكتۇر.

   شۇنى ئەستە ساقلاش زۆرۈركى، ھايات مۇساپىمىز ھەرگىزمۇ باشقىلارغا يۆلىنىپ، ئېغىناپ ياتىدىغان پاراغەت قەسىرى ئەمەس، بەلكى ئۇ ھاياتلىق كېمىمىزنى ئېلىپ ماڭغۇچى سىرلىق ئېقىن، ئۇ توختاۋسىز كۈرەش جەريانىدىن ئىبارەت. ھاياتلىق چەكسىز، ئەمما، ئىنسان ئۈچۈن تولىمۇ چەكلىك، ئۇ خۇددى بىر ئاقار يۇلتۇزغا ئوخشاش تۇرمۇشىمىزدا بىرلا قېتىم چاقنايدۇ، لېكىن ئاشۇ بىر قېتىملىق چاقناش ھاياتىمىزنى يورۇقلۇق ۋە ئىشەنچكە تولدۇرىدۇ، بىز ئۇنى قىسقا ۋاقىتتا ئۆچۈرۈپ قويۇشىمىزمۇ، ئۇزاق نۇر چاچقۇزالىشىمىزمۇ مۇمكىن، بۇ پەقەت ھاياتىمىزنى قەدىرلەشكە ۋە ھاياتقا بولغان قىزغىنلىقىمىزغا باغلىق، كىشىلىك ھاياتتا بەزىلەرنىڭ ئىرادە يوللىرى ئۇپۇققا قەدەر سوزۇلغان، بەزىلەرنىڭ يوللىرى ئۆزىنىڭ چەكلىك ئۆمرىگە قەدەر سوزۇلغان بولىدۇ، بەزىلەر ھەممە ۋاقتىنى، ئۆمرىنى پەقەت مېڭىپ تۈگىتىش ئۈچۈنلا سەرپ قىلىۋېتىدۇ، مەيلى قانداقلا بولسۇن، ئۆمۈردىن ئىبارەت بۇ غەنىيمەت پۇرسەت ھاياتلىق سادىقىدىن ئېتىلغان ئوق بولۇپ، ئۇ نىشانغا تەگسۇن – تەگمىسۇن، بەرىبىر ئاخىرلىشىدۇ، شۇڭا، ھاياتنىڭ بىزگە بەرگەن ئەڭ چوڭ سوۋغىسى بولغان ۋاقىتنى چىڭ تۇتۇپ، ھۇرۇنلۇق ۋە يۆلىنىۋېلىش قالپىقىنى چۆرۈپ تاشلاپ، قەتئىي ئىرادە ۋە ھاياتقا بولغان چەكسىز ئىشەنچنى ئۆزىمىزگە ھەمراھ قىلساقلا، ھاياتىمىزدا چوقۇم يارقىن ئىزلارنى قالدۇرۇپ، ھاياتقا ۋە ئۆزىمىزگە مۇناسىپ سوۋغىلارنى بېرەلەيمىز، ھاياتىمىزمۇ يېڭى – يېڭى مەزمۇنلار بىلەن تېخىمۇ رەڭدارلىشىپ، قەدىر – قىممىتىمىز ئاشىدۇ، مەۋجۇتلۇقىمىز مەنىلىك نامايان بولۇپ، ھاياتلىقتىكى بارچە گۈزەللىكلەردىن ۋە مېھىر – مۇھەببەتلەردىن بەھرىمەن بولۇش ئىمكانىيىتىگە ئېرىشەلەيمىز.