يەر شارى خەۋەر تورى 13-ماي خەۋىرى؛ لەگلەك تورى تەرجىمىسى: ئامېرىكا پايتەختى ۋاشىنگتوندىن نىيو يوركقا قاراپ ماڭغان يولۇچىلار پويىزى فىلادىلفىيا شەھىرى ئەتراپىدا رېلىستىن چىقىپ كېتىپ ئۆرۈلۈپ چۈشتى، بۇ ۋەقەدە ئاز دىگەندە 5 يولۇچى ئۆلدى، نۇرغۇن يولۇچى يارىلاندى، يارىدارلاردىن 6 كىشىنىڭ يارىسى ئىنتايىن ئېغىر ئىكەن. فىلادىلفىيا شەھەر باشلىقى مىچىل نۇتىر مۇخبىرغا قىلغان سۆزىدە، پويىز ئۆرۈلۈپ چۈشۈش ۋەقەسىدە 5 كىشىنىڭ ھاياتىدىن ئايرىلغانلىقى، نۇرغۇن كىشىنىڭ يارىلانغانلىقىنى ئېيتتى. Amtrak شىركىتى ئېلان قىلغان باياناتتا، پويىزنىڭ ئۆرۈلۈپ چۈشۈش سەۋەبىگە ئالاقىدار تەكشۈرۈش خىزمىتىنىڭ داۋاملىشىۋاتقانلىقى، تەپسىلى باياناتنىڭ تەكشۈرۈش ئاخىرلاشقاندا ئېلان قىلىنىدىغانلىقى بىلدۈرۈلدى. پويىزنىڭ ئۆرۈلۈش سەۋەبىنى تەكشۈرۈش گۇرۇپپىسىغا ئامېرىكا فېدراتسيە تەكشۈرۈش ئىدارىسى FBI خادىملىرىمۇ قاتنىشىدىكەن. شىركەت، پويىزنىڭ 10 ۋاگونىنىڭ رېلىستىن چىقىپ كەتكەنلىكىنى، پويىزدا 238 يولۇچى ۋە 5 پويىز خادىمىنىڭ بارلىقىنى بىلدۈردى. ۋەقە يۈز بەرگەن نەخ مەيدانغا نۇرغۇن ساقچى، ئوت ئۆچۈرۈش خادىمى ۋە سەھىيە خادىملىرى يۆتكەلدى.