ياخشىلىقنىڭ يۈكسەك پەللىسى
قىش كىرگەندىن كىيىن، چېن خانىم ئوغلى بىلەن بىللە نيۇيوركتىكى يولدىشىنىڭ يىنىغا كۆچۈپ بېرىپ، ئوغلىنى شۇ يەردىكى ھۆكۈمەت باشقۇرۇشىدىكى مەكتەپكە ئاپىرىپ بەردى.
نيۇيوركنىڭ قىشى ھەقىقەتەن سوغۇق بولۇپ، قار – شىۋىرغانلىق ھاۋا رايى دائىم كۆرۈلۈپ تۇراتتى. قار ناھايتى قىلىن ياغقان چاغلاردا بىر قىسىم ئىدارە – ئورۇنلار ۋە دۇكان – سارايلار ئىشتىن توختاشقا مەجبۇر بولاتتى، ئەمما ھۆكۈمەت باشقۇرۇشىدىكى مەكتەپلەر يەنىلا نورمال خىزمەت قىلاتتى. مەخسوس مەكتەپ بالىلىرىنى توشۇيدىغان ئاپتۇبۇسلار قىلىن قاردا ناھايتى تەستە يول يۈرۈپ بالىلارنى ۋاقتىدا مەنزىلىگە يەتكۈزۈپ تۇراتتى.
چېن خانىم باشقا نۇرغۇن ئاتا – ئانىلارغا ئوخشاش مەكتەپنىڭ بۇ ئىشىنى ئىدىيىسىدىن ئۆتكۈزەلمەي، “ مۇشۇنداق سوغۇقتا بالىلارنى قويۇپ بەرسە بولمامدۇ ؟ “ دەپ ئىچى تىتىلداپ يۈردى. شۇنداق كۈنلەرنىڭ بىرىدە ئۇ ئوغلىنىڭ مەكتىپىگە تېلېفۇن بېرىپ، ھاۋا بەك سوغۇق، قار قىلىن يېغىپ كەتكەن كۈنلەردە دەرس توختىتىپ، بالىلارنى قويۇپ بىرىش تەكلىپىنى بەردى. ئەمما، ئويلىمىغان يەردىن مەكتەپ تەرەپنىڭ بەرگەن جاۋابى چېن خانىمنى چوڭقۇر ھاياجانغا سالدى. مەكتەپتىكىلەر تېلېفۇندا ئۇنىڭغا مۇنداق دېگەنىدى: “ سىزگە مەلۇم بولغىنىدەك، نيۇيورك بايلارنىڭ جەننىتى، نامراتلارنىڭ دوزىخى، نۇرغۇن نامرات ئائىلە ھەتتا قىشتا پار پۇلىغا چىقىش قىلالماي، پەرزەنتلىرىنى مەكتەپكە ئەكىلىپ بىرىدۇ، بالىلار مەكتەپتە توڭۇپ كىتىشتىن غەم قىلمايلا قالماي، بەلكى يەنە قۇۋەتلىك چۈشلۈك تاماقتىن ھەقسىز بەھرىمەن بولىدۇ.“
چېن خانىم ھاياجىنىنى بېسىۋالغاندىن كېيىن مەكتەپكە يەنە تېلېفۇن بىرىپ: “ ئۇنداق بولسا، قار – شىۋىرغانلىق ھاۋا رايى كۆرۈلگەن كۈنلىرى ئائىلە شارائىتى ياخشى بالىلارنى قويۇپ بېرىپ، نامرات ئائىلىلەرنىڭ بالىلىرىدىنلا مەكتەپكە كىلىشنى تەلەپ قىلساڭلار بولمامدۇ ؟ “ دەپ سورىدى. مەكتەپ تەرەپنىڭ بۇ قېتىمقى جاۋابى چېن خانىمنىڭ ئۆمۈر بويى ئىسىدىن چىقمىغۇدەك جاۋاب بولدى.
“ ياخشىلىقنىڭ يۈكسەك پەللىسى ــ ئادەمنىڭ غورۇرىغا ھۆرمەت قىلىش. بىز نامرات ئائىلىلەرنىڭ پەرزەنتلىرىگە ياردەم بېرىش بىلەن بىللە، ئۇلارنىڭ غورۇرىغا تەگسەك بولمايدۇ. “
بىلوگ يازمىلىرىنى كۆچۈرۈپ ئىشلەتمەكچى بولسىڭىز مەنبەسىنى ئەسكەرتىڭ.
يازما ھوقۇقى: تۇرمۇش خاتىرىسى
يازما ئادىرىسى: ../?p=714
