جۇڭگوخەلق ئاۋىئاتسىيەسى تورى خەۋىرى لەگلەك تورى تەرجىمىسى.مەركىزىي تېلىۋىزىيە ئىستانسىسىنىڭ خەۋىرىگە قارىغاندا، ئاسىيا ئاۋىئاتسىيە شىركىتىنىڭ ئۆتكەن يىلى 12-ئاينىڭ 28-كۈنى ۋەقەگە ئۇچراپ چۈشۈپ كەتكەن QZ8501 ناملىق يولۇچىلار ئايروپىلانىنىڭ قۇيرۇق قىسمى 10-چېسلا كۈنى سۇ ئاستىدىن سۈزۈپ ئېلىنغان بولۇپ، ئايروپىلاننىڭ قارا قۇتىسى ۋاقتىنچە تېپىلمىغان، لېكىن مەزكۇر ئايروپىلان قارا قۇتىسىنىڭ سىگنالى بارغانسېرى كۈچەيگەن بولۇپ، ئايروپىلان قارا قۇتىسىنىڭ ئايروپىلان قۇيرۇق قىسمى تېپىلغان جاينىڭ ئىككى مېتىر ئۆپچۆرىسىدە بولۇشى مۇمكىن ئىكەن.
خەۋەر قىلىنىشىچە، ھىندونېزىيە سۇغا شۇڭغۇش ئەترىتىنىڭ باشلىقى قارا قۇتىنىڭ ئايروپىلان قۇيرۇق قىسمىنىڭ ئىچىدە ئەمەسلىكىنى بايقىغانىكەن.
ئاسىيا ئاۋىئاتسىيە شىركىتىنىڭ ھىندونېزىيىنىڭ سۇرابايا شەھىرىدىن سىنگاپورغا قاراپ ئۇچقان QZ8501 تىپلىق يولۇچىلار ئايروپىلانى 12-ئاينىڭ 28-كۈنى رادار ئېكرانىدىن يوقاپ كەتكەن بولۇپ، ئايروپىلاندىكى 162 نەپەر ئادەمنىڭ بىرىمۇ ھايات قالمىغان.. .

ئامېرىكا «ۋاشىنگىتون كۈندىلىك پوچتا گېزىتى» نىڭ 7-چىسلا خەۋەر قىلىشىچە، ئاسىيا ئاۋىئاتسىيىسى (Air Asia) بۈگۈن (7-چىسلا، چارشەنبە كۈنى) 8501 نۆۋەتلىك يولۇچىلار ئايروپىلانىدىكى ھەر بىر يولۇچىنىڭ ئائىلە-تاۋاباتىغا 100 مىڭ دوللار تۆلەم بەردى. مەزكۇر ئايروپىلان 2014-يىلى 12-ئاينىڭ 28-كۈنى جاۋا دېڭىزى (Java Sea) رايونىغا چۈشۈپ كەتكەن.
ئاسىيا ھىندىنوزىيە ئاۋىئاتسىيىسى (AirAsia Indonesia) نىڭ باش ئىجرائىيە ئەمەلدارى سۇنۇ ۋىدياتموكو (Sunu Widyatmoko) مۇخبىرنىڭ زىيارىتىنى قوبۇل قىلغاندا مۇنۇلارنى بىلدۈردى، مەزكۇر يولۇچىلار ئايروپىلانىدا 155 نەپەر يولۇچى بار بولۇپ، شىركىتىمىز ھەر بىر يولۇچىنىڭ ئائىلە-تاۋاباتىغا تۆلەم بەردۇق، ھەر بىر كىشىگە بەرگەن ئومۇمىي تۆلەم سوممىسى جەمئىي بىر مىليارد 250 مىليون ھىندىنوزىيە رۇپىيەسى (Indonesian Rupiah) (تەخمىنەن 98 مىڭ 200 ئامېرىكا دوللىرى) بولدى. خەۋەردە دېيىلىشىچە، بۇ قېتىم ئېلان قىلىنغان ۋە ئەمەلىي بېرىلگەن تۆلەم سوممىسى ھىندىنوزىيە ھۆكۈمىتى ئالدىنقى كۈنى قانۇنى تەلەپ بويىچە بېرىشى كېرەك دەپ ئېلان قىلىنغان تۆلەم سوممىسى بىلەن ئوخشاش بولغان. ھىندىنوزىيە ھۆكۈمىتى سۇغۇرتا شىركىتىدىن مەزكۇر ئايروپىلاندىكى ھەر بىر يولۇچىنىڭ ئۆلگەنلىكىنى جاكارلاشنى ياكى ئايروپىلان چۈشۈپ كېتىش ۋەقەسىنى تەكشۈرۈش نەتىجىسىنى ئېلان قىلىشتىن بۇرۇن تۆلەم بېرىش مەسىلىسىنى بىر تەرەپ قىلىپ بولۇشنى تەلەپ قىلدى.

ئامېرىكا «ۋال كوچىسى كۈندىلىك گېزىتى» ئېلان قىلغان بىر پارچە مۇناسىۋەتلىك سانلىق-مەلۇمات ماتېرىيالىغا ئاساسلانغاندا، بىر قىسىم يولۇچىلارنىڭ ئائىلە-تاۋاباتلىرى 24 مىڭ دوللارلىق تۇنجى تۈركۈندىكى تۆلەم سوممىسىنى تاپشۇرۇپ ئالغان. گىرمانىيە ئالىئانىز سۇغۇرتا شىركىتى (Allianz SE) ئالدىنقى كۈنى مۇنۇلارنى بىلدۈرگەن ئىدى، بىزنىڭ قارمىقىمىزدىكى بىر شىركەت ئاسىيا ئاۋىئاتسىيىسىنىڭ سۇغۇرتىغا قاتناشتۇرغان شىركىتى بولۇپ، مەزكۇر تارماق شىركەت ئالدىنقى يىلى چۈشۈپ كەتكەن ئىككى دانە مالايسىيا ئاۋىئاتسىيىسى (Malaysia Airlines) نىڭ يولۇچىلار ئايروپىلانى ئۈچۈن تۆلەم تۆلىگەن ئىدى.

لەگلەك تورى ئۈندىدار سالونىنى قۇشۇۋېلىڭ ،ئىزدەش نومۇرى :LEGLEK