ئاپتونوم رايونلۇق پارتكومنىڭ مۇئاۋىن شۇجىسى، ئاپتونوم رايوننىڭ رەئىسى نۇر بەكرى 2 – سېنتەبىر رۇسىيە فېدېراتسىيەسى چىلىيابىنىسكى ئوبلاستىنىڭ باشلىقى دوبلوۋىسكى باۋرىس ۋە ئۇنىڭ ھەمراھلىرى بىلەن كۆرۈشتى.

نۇر بەكرى دوبلوۋىسكى باۋرىس ۋە ئۇنىڭ ھەمراھلىرىنىڭ 4 – نۆۋەتلىك جۇڭگو ئاسىيا – ياۋروپا كۆرگەزمىسىگە قاتنىشىش ئۈچۈن كەلگەنلىكىگە مىننەتدارلىق بىلدۈردى، ئۇ مۇنداق دېدى: دوبلوۋىسكى باۋرىس ئەپەندىنىڭ ھۆكۈمەت ئەمەلدارلىرى ۋە كارخانىچىلارنى باشلاپ كۆرگەزمىگە قاتنىشىشقا كەلگەنلىكى چىلىيابىنىسكى ئوبلاستىنىڭ جۇڭگو شىنجاڭ بىلەن ھەر تەرەپلىمىلىك ھەمكارلىق مۇناسىۋىتى ئورنىتىش ئىرادىسىنىڭ بارلىقىنى بىلدۈرىدۇ. بۈگۈن چۈشتىن بۇرۇنقى تونۇشتۇرۇش يىغىنىدا، ئوبلاست باشلىقى چىلىيابىنىسكى ئوبلاستىنىڭ ئەۋزەللىكى ۋە يوشۇرۇن كۈچى، ھەمكارلىق ئورنىتىش، مەبلەغ سېلىش جەھەتلەردىكى ئېتىبار سىياسەتلىرىنى تەپسىلىي تونۇشتۇرۇپ، جۇڭگو شىنجاڭدىكى كەسىپداشلارغا چوڭقۇر تەسىر قالدۇردى ھەمدە جۇڭگو شىنجاڭ بىلەن چىلىيابىنىسكى ئوبلاستىنىڭ ھەرتەرەپلىمىلىك ھەمكارلىق ئورنىتىش ئىشەنچىنى كۈچەيتتى.

نۇر بەكرى مۇنداق دېدى: جۇڭگو شىنجاڭ بىلەن چىلىيابىنىسكى ئوبلاستى ئاسىيا قىتئەسىنىڭ كىندىكىگە جايلاشقان بولۇپ، ئوخشاش جۇغراپىيەلىك ئورۇن ۋە تەرەققىيات ئەۋزەللىكىگە ئىگە، ياۋروپا – ئاسىياغا تۇتاشقان ئەشيا ئوبوروت مەركىزى قۇرۇش ئىككى جاينىڭ ئورتاق ئارزۇسى. بىر نەچچە يىللىق قويۇق ئۇچرىشىش ئارقىلىق ئىككى تەرەپنىڭ ھەمكارلىق دائىرىسى بارغانسېرى كېڭەيدى.
نۇر بەكرى مۇنۇلارنى بىلدۈردى: جۇڭگو شىنجاڭ يەرلىك كارخانىلارنى چىلىيابىنىسكى ئوبلاستىغا تەكشۈرۈشكە بېرىشقا، مەبلەغ سېلىشقا ئىلھاملاندۇرىدۇ، ئىككى تەرەپ ھەمكارلىقىنىڭ جۇڭگو – رۇسىيە ھەمكارلىقىدىكى نەمۇنە بولۇشىنى ئۈمىد قىلىدۇ.

دوبلوۋىسكى باۋرىس مۇنۇلارنى بىلدۈردى: بىز جۇڭگو شىنجاڭ بىلەن سودا، ئەشيا ئوبوروتى، مەدەنىيەت قاتارلىق ساھەلەردىكى ئۆزئارا مەنپەئەتلىنىدىغان ھەمكارلىق مۇناسىۋىتىنى يەنىمۇ كېڭەيتىشنى ئۈمىد قىلىمىز.