ئاسىيا كىندىكى تورى خەۋىرى: ئۈرۈمچى مېترو 1-لىنىيەسىنىڭ تۆگىدەڭ بېكىتىدە 8-ماي قۇرۇلۇش باشلانغانىدى، ئەمدى نۆۋەت تەڭرىتاغ رايونى ئاققوۋۇق بېكىتىگە كەلگەن بولۇپ، 16-ماي سائەت نۆلدە قۇرۇلۇش باشلىنىدۇ.
مۇخبىرنىڭ 11-ماي ئۈرۈمچى شەھەرلىك ج خ ئىدارىسى قاتناش ساقچى تارماق ئەترىتىدىن ئىگىلىشىچە، قۇرۇلۇش مەزگىلىدە ئاققوۋۇق يەر ئاستى يولى پۈتۈنلەي چېقىۋېتىلىدىغان بولغاچقا، كىشىلەر يەر ئۈستىدىكى پىيادىلەر يولىدىن ئۆتىدىكەن، بۇ ئەتراپتىكى خەلق يولى، جەنۇبىي ئازادلىق يولى ۋە شىنخۇا كىتابخانىسى ئالدىدىكى يوللار توسۇۋېتىلىپ، خەلق يولىدىن شىنخۇا كىتابخانىسى ئالدىدىكى يولغىچە قاتناش توختىتىلىدىكەن. خەلق كىنوخانىسى يېنىدا قوش يۆنىلىشلىك ئاپتوموبىل يولى قالدۇرۇلۇپ، بۇ يول بويلىرىدىكى ئىدارىلەر ۋە ئاھالىلەر ئاپتوموبىللىرىنىڭ يۈرۈشىگە قولايلىق يارىتىلىدىكەن.
قاتناش ساقچىلىرى ئاققوۋۇق يول ئېغىزىدىن ھەر قايسى يول بۆلەكلىرىگە قاتنايدىغان ئاپتوموبىللارنىڭ جۇڭشەن يولى، شىنخۇا جەنۇبىي يولى، جىنيىن يولى، يۆجىنگەي كوچىسى، جەنۇبىي تىنچلىق يولى، يېڭى شەھەر يولى، شىنخۇا جەنۇبىي يولى، بۇلاق بېشى كوچىسى، ئىتتىپاق يولى قاتارلىق يوللاردىن ئايلىنىپ مېڭىش تەكلىپىنى بەرگەن.